香港亞洲流行音樂節2017在會展舉行，亞洲超級新星三強歌手再次演出後，就到李克勤出場。唱《一個都不能少》時，大會安排不同行業人士上台，克勤大叫「香港人加油」，引來全場掌聲。他以主場歌手身份叫觀眾給他多些掌聲，又笑說：「小朋友喺邊度？你哋爸爸媽媽好鍾意聽我唱歌。呢一年好特別，因為由我出第一隻碟到依家已經30年，你哋一定要話睇唔出！」他演唱由《高妹》、《戀愛大過天》及《花花宇宙》等歌曲組成的Medley，自言這樣才夠誠意。這時前排大部份觀眾已站起來，克勤脫下大褸走下台與觀眾握手，再走上中間的小舞台，拿起攝錄機拍攝觀眾，令全場High爆！
Fashion嘅嘢我識條鐵咩！
受訪時他笑言：「你見我今日隆重其事就知係主場歌手打扮啦，呢啲fashion嘅嘢我識條鐵咩，梗係老婆（盧淑儀）搞啦唔使問。我淨係知道張單好貴，好似個垃圾膠袋咁咋喎，咁多個位嘅！五位呀，好似我個仔返學嗰啲包書紙咁，佢話你識咩呀？啱啦呢啲場合，我唔會認屎認屁。」問到老婆有嬲他說是垃圾袋嗎？他謂：「我唔識係咁㗎啦，佢畀咩我就着咩。（佢畀咩你都要食咩？）呢啲大家互相遷就啦，唔係會有爭執。」他表示自己的衣着通常很穩陣，只是今日比較隆重，除了過年與《左麟右李》開騷，其他時間都是穿黑白灰：「我信佢嘅品味，唔信佢仲信邊個？我依家唔係18、22，太花喱碌我都carry唔到。」而自己在家的衣服，克勤指當然由自己負責：「自己襯完畀佢過目，除咗波衫波褲佢冇得出聲，嗰啲我就話番佢，你識條鐵咩？」
撐關淑怡係好人
至於關淑怡（Shirley）日前於愉景灣一間酒店餐廳涉嫌刑事恐嚇及普通襲擊被拘捕，克勤說：「呢啲愉景灣嘅嘢，我哋呢啲城市人就唔理得咁多。其實係咪拍戲咋？咁得意嘅嗰啲劇情？我都唔係好知，又唔知問邊個，唔係好方便亂問，我又唔似一個八公，都係睇新聞知，反正依家啲新聞追得咁快。」他希望Shirley快點沒事，又指對方是個好人，可能是言語間有誤會：「希望一人行一步，快啲冇事。」
|
鍾意就快D Share啦！
|
|
|
