「我個人就係咁，鍾意玩就玩，唔玩就唔玩，就行咗去架喇，哈哈…好不負責任地行咗去。」樂隊Blue Jeans主音黃良昇憶述當年解散時嘅心情。悲觀充塞憤怒~~憂鬱掩飾冷酷~~豈有此理~~呢句歌詞「豈有此理」相信好多人想同昇哥講，因為散Band係佢一個人嘅決定，佢話：「係我提出o架，夾Band好容易嗌交，朋友都冇得做，咁唔知為乜。有時隊友要搵食呀，要好多方面發展，咁我冇理由阻住人發展o架？」Blue Jeans係佢由零開始一手一腳搞出嚟，又係佢喺3年後即1990年作終結，佢覺得有好多人會怪佢，但呢個決定對佢嚟講最舒服，「我唔適合娛樂圈，因為我嘅性格唔係好啱，要好市儈、好虛偽，全部都係我唔識做嘅嘢嚟，學極都唔識，咁冇辦法啦。」幕前唔得，咁幕後呢？佢話：「我幾鍾意做監製，我希望將我嘅經驗同大家分享，但係我輸一樣嘢，就係我唔係好叻同人溝通，我唔叻走去我唔識嘅人度，喂，識唔識我呀？你有冇嘢畀我做呀？我講唔出口…我完全清楚，我冇可能可以生存到。」「我覺得做人最緊要有價值觀，做有意義嘅嘢，如果要去到大家都純商業，已經同音樂、藝術好似冇乜關係，咁我就唔玩喇。」自言最叻就係開機關槍掃人嘅昇哥話。昇哥喺04年將Blue Jeans重組，原成員只有蘇德華參與，仲加入劉祖德同霍兆強兩位資深音樂人，莫非同豹哥單立文唔再friend？佢話：「唔friend點會夾band呀，但好多因素架嘛…有嘢搞作就有機會見面囉。我成日喺新界，咁唔通你叫吓吓叫朋友入嚟探我咩，我又少出街，懶到死。同我做朋友係好難頂o架，哈…」「我好戇居，好stubborn(頑固)，哈哈哈…」退出樂隊後幾年，昇哥轉行做保險，令佢對某啲嘢更加堅持：「因為人原來好脆弱嘛，我同你傾完偈行落街俾車車死囉，我點解要受你氣？我點解要買你怕？我點解要包容你？大家要互相尊重o架嘛。」佢一輪機關槍掃完繼續話：「你可以當我係一個傻嘅音樂發燒友，ok，唔緊要，但係你唔好要我諗住一定要奉承你。」生命冇Take 2，昇哥對自己做過嘅決定都一樣：「做咗嘅嘢冇得後悔o架，如果有得返轉頭，我老虎都叫李家誠啦，係咪？！我冇理Q你識唔識欣賞我！」採訪：楊潔雯、懷鈺
攝影：陳俊強
拍攝：馮峰、Neo
剪接：Roy
場地提供：Blue Jeans音樂室
|
鍾意就快D Share啦！
|
|
|