2017年3月19日 星期日

【方媛接旨】郭富城自爆Plan緊開枝散葉 __,方媛,郭富城,

郭富城已經有少少Plan喇~天王郭富城(Aaron)一向熱愛賽車,今日城城創立「富盛車隊」出戰FRDLMP3(原型車)「極級先鋒系列賽」,並羅致法籍賽 ...


郭富城已經有少少Plan喇~

天王郭富城(Aaron)一向熱愛賽車,今日城城創立「富盛車隊」出戰FRD LMP3(原型車)「極級先鋒系列賽」,並羅致法籍賽車手Olivier Lombard任首席車手,今日齊齊現身珠海國際賽車場出席車隊成立發布會,及為出賽的LMP3戰車主持揭募儀式。

想親自落場帶領車隊

榮升車隊老闆的城城西裝畢挺打扮,未有以戰車造型出現,問到有份投資車隊?城城表示:「有投資!(投資幾多?)投資晒落去喇!組車隊係自己夢想,自己都一直想實現,亦會選拔新嘅車手。(要有咩條件,好似你咁靚仔?)今次Olivier係法國人好浪漫,吸引唔少女車迷,佢又靚仔又有潛質,揸車又快。」何時親自落場?城城謂:「遷就到檔期都會,但會以工作行先,不過我又係車隊老闆,精神、力量都會賦予畀車隊,我自己都想落場,作為車隊老闆可以提升技術,參與埋一份都算係賺咗。」

對戰林志穎車隊

親自試過LMP3戰車未?城城謂:「至今都未有機會試,首場賽事5月中舉行,希望5月初試到車。」藝人林志穎(小志)都有車隊落場比試?城城坦言很期待,之前拍內地真人騷節目《我們十七歲》成為好朋友,知小志熱愛賽車運動,城城坦言:「我嘅技術唔夠小志好,都要向佢請教。(會同佢錬車?)睇緣分,相信同場都會有較量,但自己技術冇佢咁好,會傳短訊畀佢叫佢揸慢啲先。」

開口認Plan緊開枝散葉

賽車可怕母親及女友方媛擔心?城城說:「喺跑道上係安全過街道,因為唔會有對頭車,或者有醉駕司機,而且都賽咗咁多年,大家都習慣唔會擔心。」講到上次城城在香港出戰,女友都出現打氣,今次女友可再來?城城開心說:「希望會啦,始終係車隊出賽第一次,但都要睇我落唔落到場先,因電影開工都要到4月。」至於車隊命名為「富盛」是否意味想開枝散葉?城城哈哈大笑:「其實個『盛』字係當年爸爸金舖其中一個字,想記念爸爸,有傳承之意,去培育新一代車手,咁開枝散葉都係好重要,都有少少Plan嘅。」而工作人員即着記者問回賽車問題。

未睇《風雲5D音樂劇》步驚雲造型

問到《風雲5D音樂劇》日前各演員的造型曝光,城城可留意鄭嘉穎的步驚雲造型?城城笑問:「乜步驚雲有好多個造型咩?我未睇呀,不過,天華同譚耀文都係好朋友,祝佢哋舞台劇成功。」


來源 source: http://hk.on.cc
鍾意就快D Share啦!
Related Posts Plugin for WordPress, Blogger...