去年 10月，譚詠麟擔任阿 Sam演唱會嘉賓，相隔 32年再同台合唱。
娛樂偵訊
世紀合體 許冠傑×譚詠麟唱 10場
許冠傑譚詠麟兩位樂壇大哥大，都曾經在樂壇呼風喚雨，成就驕人，本來大纜扯唔埋，合作機會極少，但據可靠消息透露，兩人將破天荒攜手，在八月合作舉行十場演唱會，可一不可再，歌迷又要搶飛嘞！
落力拉攏
去年十月許冠傑在紅館舉行三場演唱會，主辦單位除了合作慣的大名娛樂，還有太陽娛樂和特高娛樂，當中特高娛樂是譚詠麟所屬藝能的姊妹公司，頭場更請來阿倫擔任嘉賓，當時阿倫就在台上表示，自己有一首作品《雨絲情愁》，和阿 Sam《是雨是淚》好夾，希望日後兩首歌會做成 Medley一齊唱。
原來二人合作唔止一首歌咁簡單，今個暑假，更會世紀合體舉行演唱會！
早於去年，李克勤約滿藝能跳槽英皇，同阿倫組成的左麟右李將成絕響，而向來鍾意玩新嘢的譚詠麟，已經密謀搵另一位巨星合作開騷，開始游說許冠傑合作，更攞定紅館暑假檔期。
「上次阿 Sam演唱會，請咗阿倫做嘉賓，當時藝能高層，已經密密斟阿 Sam同阿倫一齊開騷，但阿 Sam性格唔似阿倫，阿倫同過好多歌手合作開騷，阿 Sam就未試過孖人做騷，諗嘢好謹慎，拖咗好耐都無答應！」阿 Sam友人說。
許冠文幫口
能夠促成今次合作，阿倫落足嘴頭，還要多得阿 Sam大佬許冠文幫口撮合。
「 Michael同阿倫一路都好老友，兩個成日約埋一齊打波食飯，上次 Michael開棟篤笑，特高娛樂都係搞手之一，知道阿倫斟阿 Sam合作， Michael都有幫口，始終阿 Sam好重兄弟情，好信任 Michael，始終唱咗咁多年，都想喺舞台上有啲新火花！」知情者說。
今年二月，許冠傑到澳門威尼斯人開演唱會，阿倫再次任阿 Sam演唱會嘉賓，終於誠意打動阿 Sam。
「阿倫咁遠去到澳門幫阿 Sam做嘉賓，兩個夾歌，多咗機會接觸，話晒大家都係樂壇大哥，又同樣出身寶麗金，講起以前樂壇啲嘢好啱傾，真係惺惺相惜，嗰次終於達成合作共識！」知情者說。
成績驕人
許冠傑譚詠麟兩代樂壇猛人，均創下不少驕人紀錄。 83年，當年是寶麗金唱片鎮山之寶的許冠傑，被康藝成音重金撬走，寶麗金揚言力捧譚詠麟接棒， Alan憑《遲來的春天》、《霧之戀》走紅， 84年首次在紅館舉行六場演唱會，至 89年舉行三部曲彩色/濃情/再續浪漫，合共 38場演唱會刷新紀錄，直至 92年被許冠傑《光榮引退演唱會》 41場打破。
而至近年，兩位巨星仍是紅館開騷常客， 04年，許冠傑復出舉行演唱會，短短八個月，合共開了 44場，至於譚詠麟， 03年開始同李克勤合組左麟右李，半年間 part I及 part II亦開了 18場，在中國、澳門、東南亞、美加合共開了過百場世界巡迴！
籌備影海報
近日雙方終於簽妥合約，亦開始拍攝個唱 poster。
「呢兩日啱啱簽晒約，個騷八月中舉行，其實距離開騷而家只係得番四個月，好多嘢都好趕，話晒兩個都咁有要求，製作肯定好揼本，呢排已經密密開會！」
雖然同樣出身寶麗金，但兩位獨當一面的巨星，絕少合作，追溯番當年同台合唱，已經係八四年，當年譚詠麟在紅館舉行演唱會，阿 Sam同老婆去睇騷，誰知台上阿倫一眼就發現阿 Sam，更拉阿 Sam上台，二人最終合作了一首 Beatles作品。
直至八八年，阿 Sam推出《 Sam& friends》大碟，與不少歌手合作，阿倫亦寫了一首歌《愉快皆因你》給阿 Sam，不過，當年反而是阿 Sam跟張國榮合唱的《沉默是金》大熱受歡迎。
檔期難求
紅館檔期難求，演唱會一年到尾排到密密麻麻，劉德華因腰部受傷取消 12月的跨年演唱會，有期騰出，人人爭住頂上。
撰文、攝影、攝錄：娛樂組
|
鍾意就快D Share啦！
|
|
|
