掃呢頁CODE去手機

2017年4月20日 星期四

三度柄埋談心 樂易玲細仔偷嘴裕美 [壹週刊 - 1415] __,裕美,樂易玲,M1,

摸手仔傾得興起,Ryan再主動出擊,捉住裕美玉手度手腕。探熱針三度柄埋談心 樂易玲細仔偷嘴裕美修葺變靚的裕美,去年被踢爆背夫偷食同是奀星的黃子恒,搞到 ...


摸手仔

傾得興起, Ryan再主動出擊,捉住裕美玉手度手腕。

探熱針

三度柄埋談心 樂易玲細仔偷嘴裕美

修葺變靚的裕美,去年被踢爆背夫偷食同是奀星的黃子恒,搞到離婚收場。

上週五( 14日),曾志偉舉行 64歲生日派對,裕美同狄易達等拉隊到賀,孭住偷食、失婚的污名,裕美依然有 market,於派對中惹來樂易玲細仔 Ryan起勢力溝,兩人三度離席戶外僻靜地方談心,「抄牌」攞電話、咬耳仔、摸吓手唔在講,還趁人少少、無人為意偷吻裕美,猴擒到冇朋友!

摸黑談心

樂易玲細仔 Ryan已經二十歲大,上週五(十四日)與哥哥( Adrian)孖咇陪母親大人到馬會出席曾志偉六十四歲生日派對,開席多個小時, Ryan與一名全黑打扮的長髮女子到戶外吹水,細望原來是宣布回復單身的裕美,兩人異常啱嘴型,當女方向 Ryan展示手機上的照片時更一度頭貼頭,舉止親暱,之後 Ryan更一手捉實裕美玉手,互度手腕粗度,但隨着「打邊爐」的煙民湧現,兩人無癮離開。

不夠一小時,兩人再走到露台位置繼續談心,眉精眼企的樂大媽眼見寶貝仔同裕美走得好埋,忍唔住走出露台做「電燈膽」監視,無奈 Ryan眼中只有裕美,兩人 keep住密密斟,還當面耍花槍,完全當樂易玲透明,令樂大媽極度無癮,忍不住黑面離開,兩人才醒水惹怒阿媽/高層,死死地氣跟着走人。

準備離開, Ryan秒速偷吻裕美,好狼!

頭貼頭

裕美開心「些牙」電話內的照片, Ryan乘機挨近,女方都沒有抗拒避開。

樂易玲細仔 Ryan同裕美離開派對,到僻靜角落談心。

樂易玲做電燈膽, Ryan同裕美完全懶理,繼續打情罵俏。

偷嘴裕美

寶貝仔中個大八年,失婚兼偷食的女仔,做阿媽的樂易玲即時做嘢,不到十二點馬上拉隊走人,孭住背囊的 Ryan第一時間同裕美走到餐廳門口爭取時間傾多兩句,眼見視線範圍無人望見, Ryan秒速偷吻對方面頰,裕美還未來得切反應, Ryan再拖她至戶外繼續傾,但不到十分鐘,追魂 call殺到, Ryan焗住同裕美講再見,臨上車前發現門外有大批記者守候拍照, Ryan極抗拒,一度以手遮面避鏡頭,行為稚嫩。

今時今日姊弟戀好平常,只可惜 Ryan有個大台高層辣媽到實,裕美失婚之餘又同黃子恒搞男女關係,睇怕樂大媽必定棒打鴛鴦,想要有進一步發展好有難度!

一三年樂易玲帶住苟芸慧,要她陪兩個寶貝仔 Adrian(左)與 Ryan睇戲,之後於圓方行街 shopping時更被逼要俾兩個仔繑住手行。

同圈外人林恩浩的婚姻維持了兩年,隨着裕美搭上黃子恒,兩人亦告離婚。

未夠十二點,樂易玲同兩個仔 Adrian(右)及 Ryan(左)提早走人。

撰文、攝影、攝錄:娛樂組


鍾意就快D Share啦!