呢幾日一開電視，都見到張兆煇同陳松伶合作嘅劇集出緊街，兩個好戲之一走埋一齊，故事劇情咪係咪好睇，0依家講仲係言之過早，但係可以肯定嘅，就係今年54歲嘅張兆輝，肯定keep得好好，唔少網民覺得佢同27歲嘅張振朗企埋一齊，似兩兄弟多過兩父子！有讀者張小姐透過《蘋果》嘅爆相爆片，聲稱前日傍晚時份，喺西貢見到張兆輝，之不過嗰陣佢身邊有一個妙齡少女，張小姐話：「嗰陣我食完飯行出嚟，見到張兆輝喺西貢碼頭拖住個女仔沿住海邊行，仲間佢哋都好親熱，又攬腰、又拖住，好親密㗎，仲見到張兆輝攬到實陪個女仔睇海！」佢仲話：「初時以為係佢老婆，但係睇真啲嗰個女仔個樣好後生，我以為佢哋係拍戲，但係睇真啲附近又冇攝影機，之後見佢哋入咗去一間海鮮店，不過見到人多就耷dup低頭，跟住有fans截住男嘅影合照，嗰個女嘅好識做行開，好似好避忌咁！」事後《蘋果》諗住搵張兆輝了解吓，不過因為佢做緊嘢所以冇覆，於是乎去問佢老婆張太，睇吓佢知唔知呢件事，點知佢聽完之後笑住話：「哈哈哈，咁都有得爆？嗰個女仔係阿女嚟㗎！嗰晚大仔有啲同學喺英國嚟咗香港，我哋咪一家人去咗西貢食飯，佢哋兩父女不嬲啲感情都好好，成日出街都會手拖手，一直都係咁癡纏！」其實張兆輝喺圈中出咗名係好男友，一直都好錫老婆同仔女，唔經唔覺佢個女今年已經18歲，最重要嘅係，啲人成日話女兒係爸爸嘅「前世情人」，所以有呢啲舉動，實在一啲都唔出奇！
| （讀者張小姐提供圖片） | | |
| | | |
| |
|
鍾意就快D Share啦！
|
|
|
