2017年4月6日 星期四

娛刺撈飯:方媛起尾注!城城揸辣跑唔夠推BB車過癮 __,方媛,郭富城,城城,

城城睇嚟揸厭辣跑喇!51歲嘅天王郭富城迎娶細自己22年嘅內地網紅兼女模方媛,堅係震驚全城!點會諗到城城唔做冇腳雀仔,肯貼地做幸福住家男人娶傳有咗嘅方媛 ...


城城睇嚟揸厭辣跑喇!

51歲嘅天王郭富城迎娶細自己22年嘅內地網紅兼女模方媛,堅係震驚全城!點會諗到城城唔做冇腳雀仔,肯貼地做幸福住家男人娶傳有咗嘅方媛,一次過滿足晒阿媽恨飲新抱茶兼抱孫嘅願望!以前偶像話結婚,成批粉絲喊晒口話要生要死,依家時代唔同晒,買大送細雙喜臨門通街都係,之但係全城網民爭相討論,首當其衝話佢哋相差22年係父女戀,其實年齡距離真係濕濕碎,唔使講鄭嘉穎同陳凱琳一樣相差22年,睇吓四哥謝賢先80歲嘅四哥同上海女友Coco年齡相差49歲,拍拖至今12年一樣咁Sweet,人生有幾多個十年呀?早排仲傳到話四哥雄風再現再做老竇!仲講乜Gap先?

中港婚姻近年係社會熱話,個個針對方媛嚟自內地嘅背景,猛話城城係「國貨城」,城城夠同日本性感女神藤原紀香、來自法國嘅名模Amanda S.、加拿大出生嘅鍾麗緹、本地薑嘅姚正菁同朱茵等傳過緋聞或拍拖啦,唔通又話城城係「日本城」、「法國城」、「楓葉城」同「香港城」咩?情場出征多年,唔腳仔軟㗎?追求、拍拖、分手三部曲重複又重複,三年又三年咁循環,舞台王者如城城精壯毅力無限,始終都係人,會攰㗎!每次城城就係唔想磨爛席,情願唔啱就洗牌分手再嚟過,今次正式封盤,證明佢一直以嚟唔係唔想結婚,而係要睇同邊個結!雖然佢成日話自己冇夫妻宮啫,但眼見身邊嘅老友好似張智霖同沈嘉偉個個結婚生小朋友,打邊爐時不斷加雙筷,舉目滿枱老友都拖男帶女,成日都愛回家,自己仲係一條冷條條揈,就算買晒啲辣跑戰車又點?都未必夠同老婆仔女齊齊坐七人車或推吓BB車過癮嘛?

出得廳堂 上得大床

唔少網民話方媛貪錢先嫁,叫城城小心第時畀人分身家,其實城城閱女無數,唔通真係只貪方媛樣靚身材正?做得天王都一定有咁上下轉數,冇理由笨到去娶一個明知吼住自己副身家嘅女人啩?況且娶個靚老婆返嚟,係咪一天光晒?我Nuts哥有唔少老友真係娶咗個靚老婆返嚟,你以為佢真係覺得好威呀?查實有苦自己知!叫老婆洗隻碗,佢話刮花指甲唔洗喎!叫佢幫手掃地執屋啦,又話整粗佢對手,都唔使再問點解就嚟冇廁紙用,但成屋都係化妝品同手袋啲老友仲講笑話,將來年紀大機器壞,出入要推輪椅餵食飯或要插尿袋嗰時,唔知個靚老婆會唔會話驚刮花指甲而唔肯做呢?天仙咁靚,身材超特Cup再奉送長腿蛇腰又如何,齋睇個靚樣,係可以睇一世,但係男人更加明嘅係,唔通可以舉一世咩?出得廳堂,上得大床,好睇唔好用,就嘥氣實用性先係重要,所以有好多美女群下之臣無數,埋門一腳都係結唔成婚,就係咁解囉!我反而覺得方媛夠勇,百分百好似葉蒨文首《瀟灑走一回》咁唱:「我拿青春賭明天,你用真情換此生。」方媛點會冇諗過,依家先至29歲,廿年後即49歲,城城已經71歲,夠晒資格攞生果金同長者醫療券嘅同時,更加需要佢嘅貼身照顧。

行大運 執好籌

身為第十四位「城女郎」嘅方媛,唔似十三號熊黛林咁攻城七年有名無實,唔使兩年貨仔成功食尾胡標尾會,你可以話係timing啱,城城已經去到呢個年紀,多得前人鋪橋搭路,無論身邊係方媛定鍾媛都會結婚,之但係方媛都要有把炮。城城經理人小美讚佢斯文同硬淨,即係外柔內剛 同城城拍拖,好似同全世界拍拖咁,做緊乜或做過乜,都要承受外間嘅評頭品足,幾難聽嘅說話都有,唔通愛就大晒咩?都要有耐力定力去忍!再聽埋城城曾經公開表揚方媛「善解人意」、「好乖」、「關心我健康」,就係咁簡單,足以令佢呢位情場浪子身心康泰,俯首稱臣。所以個個話方媛行大運執到城城呢支好籌,其實愛情係咪好似玩老虎機咁一定要靠運氣先中Jackpot ?就算個天畀你遇到個天王甚至超級富豪,唔代表寫包單幸福一世,關鍵係你都要付出,先可以一直走下去。


來源 source: http://hk.on.cc
鍾意就快D Share啦!
Related Posts Plugin for WordPress, Blogger...