2017年4月28日 星期五

盛女婷婷愈食愈西!四哥送塵封鮑做嫁妝 __,四哥,婷婷,謝賢,

鷹眼哥~你點諗先?34歲嘅謝婷婷日前出席品牌活動,咁啱佢老竇謝賢(四哥)喺附近路過,行晨運似乎早咗啲嘅四哥,飲唔到早茶,女婿茶都照殺,佢當住記者面話婷 ...


鷹眼哥~你點諗先?

34歲嘅謝婷婷日前出席品牌活動,咁啱佢老竇謝賢(四哥)喺附近路過,行晨運似乎早咗啲嘅四哥,飲唔到早茶,女婿茶都照殺,佢當住記者面話婷婷:「咁老仲唔嫁,做咩?」搞到婷婷鬼咁尷尬,試問兩父女有乜嘢唔可以私訊講先?硬係要大庭廣眾爆響口嘅!何況依家唔係婷婷唔想嫁,而係樣靚身材正,image夠型夠smart,經濟獨立大把水,屋企又車又樓乜都畀,碌卡多過你嘟八達通!你估佢淨係識扮靚買衫?錯!佢以前喺加拿大打網球打到全國排十八,潛水、瑜伽、烹飪樣樣皆能!

貴為鑽石級盛女嘅婷婷門檻太高,敢高攀接貨嘅男人太少,所以婷婷就算「當打、有態、有身材」,都嫁杏無期,只可以拍住拖先,情況就好似只係細婷婷兩、三年嘅四哥女友Coco咁囉,個男友唔想結婚,唔通一巴打佢埋牆咩?係都等Joe Junior出院先啦,冇人揸咪呀,老四!

有得嫁邊個想攝灶罅

正所謂「有頭髮,邊個想做瘌痢?」、「有得嫁,邊個想攝灶罅?」都係婷婷EQ高,㩒得住自己道火,唔似得佢老竇81歲人仲成日喊打喊殺,溫文有禮嘅婷婷絕對唔會公開爆粗,大庭廣眾Fxxk You、Fxxk You,貪好睇咩!睇吓佢早排回應四哥被驚傳再做老竇嘅一次示範: 「我打畀爹哋問,終於感受到記者平時點畀佢鬧。(佢話一巴打你埋牆?)爭啲,所以我只講Love You就收線。」甚有當年馮淬帆「金山橙你個沙田柚」嗰招化粗口為生果嘅精髓,仲要講完收線,真係骰寶開出三條一之「你冇得再小」!

鬼佬易話為

婷婷作為一個目睹老竇謝賢、阿媽狄波拉、阿哥謝霆鋒都係離婚收場嘅過來人,婚姻有幾莊嚴而有約束力,佢心中有數,婚就算要結都係遲結好過早結,免得雙方多咗時間去反悔,何況謝賢都話準備咗已經擺咗N年嘅鮑魚畀婷婷做嫁妝,塵封鮑魚?有冇腰心腰肺添呀?可以畀埋腰膶我喎!

婷婷唔只吸取咗父母、阿哥嘅離婚教訓,仲喺佢哋身上悟出搵男人要「一路向西」嘅道理!事關唔係人人好似自己阿爸阿媽咁,離咗婚都可以三日唔埋兩日帶埋各自嘅新歡出嚟飲飲食食, 但唐人倫理觀念深啫,鬼佬易話為得多,唔理兄定弟,一律brother,唔理表定堂兄弟姊妹,一概cousin,如果婷婷唔「一路向西」嘅話,佢擇偶只能揀台灣藝人小豬羅志祥,因為小豬話:「不用分那麼細,我們都是中國人」,所以你話婷婷係咪好應該愈食愈西?

三唔識七最穩陣

若果婷婷好似佢阿哥霆鋒咁不假外求,效法佢植根香港,同天后王菲、影后張栢芝,仲有趙學而、盧巧音、戴辛尉等談情說愛,到時唔係「十二道鋒味」,係「六度分隔理論」, 即係指世上兩個唔相識嘅人,佢哋之間只需要5至6個朋友、同事、同學、親戚,就可以藤㨢瓜,瓜㨢藤咁扯上關係,咁你話,婷婷要搵個有頭有面嘅男友,又要佢同阿爸、阿媽、阿哥、前阿嫂、前哎吔阿嫂全無關係,最灑脫嘅做法係咪「一路向西」先?

所以婷婷繼打碟DJ Drafus、動作演員安志杰、名媛之子戴尚安等ABC或半唐番後,直頭唔鬼唔食,呢期就同荷里活影星「鷹眼」謝洛美維拿(Jeremy Renner)發展得唔錯,仲講明唔介意另一半有仔女,的確smart !首先謝賢都話唔識邊個鷹眼,其次鷹眼前妻Sonni Pacheco,霆鋒都應該唔識啦啩!至於鷹眼啲舊情人, 據講都同霆鋒取向好唔同,Clear!

千祈咪心軟呀

不過婷婷千祈唔好心軟,走去介紹鷹眼畀老竇認識,事關憑西片《拆彈雄心》彈起嘅Jeremy,如果知道謝賢絕技唔只識chok蕉,仲可以徒手爆開合桃,佢唔走頭就有鬼,婷婷唔生小朋友都得啫,Jeremy唔想變拆「蛋」雄心呀!


來源 source: http://hk.on.cc
鍾意就快D Share啦!
Related Posts Plugin for WordPress, Blogger...