喺噚晚嘅金像獎，曾志偉就喺擊敗咗秦沛、吳孟達、姜皓文同廖啟志，成為咗最佳男配角，不過好多網民就話其實姜皓文喺《樹大招風》嘅表現好好，佢先應該攞男配咁話。而噚晚曾志偉喺台上講感言嘅時候，先話秦沛、吳孟達同廖啟志係好強嘅對手，網民就話佢點解唔提姜皓文，之後就同黑仔講咗番說話：「黑仔，比心機，我1部撼你26部，跟住就係你喇，知唔知啊？」有網民就指曾志偉係寸緊黑仔咁多套都攞唔到，同樣都有網民就話呢個係志偉鼓勵緊黑仔。而《蘋果》就問過黑仔點睇志偉嘅呢番說話，佢就話：「冇咩喎﹐佢鼓勵我﹐我同志偉好熟好熟好熟﹐佢當我後輩﹐語氣嘅嘢係咁﹐冇事冇事冇事發生﹐佢鼓勵我﹐鼓勵得好好﹐佢攞獎我好開心﹐第一我貼中咗﹐哈哈﹐同埋佢應得嘅﹐賽果非常靚仔﹐我...下次啦，我梗有機會撼番佢嘅，佢實至名歸，多謝晒。」黑仔同志偉咁好朋友，睇嚟都只係講下笑嘅。而志偉就未有回覆。
來源 source: http://s.nextmedia.com
|
鍾意就快D Share啦！
|
|
|