2017年4月17日 星期一

英超 寸王奇招反車 曼聯出番齣好戲! __,曼聯,

(GettyImages)即上英超刨績王:http://win.on.cc/epl 「寸王」復仇成功!英超壓軸「魔車」戰,曼聯為留力歐霸收起王牌伊巴謙 ...


(Getty Images)

即上英超刨績王:http://win.on.cc/epl 

「寸王」復仇成功!英超壓軸「魔車」戰,曼聯為留力歐霸收起王牌伊巴謙莫域,反而出奇制勝,靠「福仔」拉舒福特及安達靴里拉各省1粒,喺主場以2比0擊敗「1哥」車路士,連續22場聯賽未輸過之餘,亦為倒戈主帥「寸王」莫連奴出番啖氣,同時令原本放到甩轆嘅車仔,只領先次席熱刺4分,爭標形勢出現暗湧。

曼聯主帥莫連奴今季聯賽連足總盃2度倒戈車仔輸波,但由於紅魔周中有歐霸8強次回合對安德列治嘅後顧,今仗大膽將王牌伊巴謙莫域放喺後備席,用「福仔」拉舒福特同連格打雙箭頭。不過車仔亦有門神泰拔高圖爾斯因傷缺陣,左翼衞馬高斯阿朗素熱身嗰陣又受傷,臨時讓葛特蘇馬打正選,並將艾斯派古達移任左翼衞,明顯對防線有影響,開波僅7分鐘球證睇唔到安達靴里拉於後半場隻手掂到個波,佢即放個靚直線,「福仔」長驅直進射成1比0。

易邊後曼聯食住個勢繼續搶,49分鐘車仔後防遲遲解唔到圍,畀安達靴里拉於禁區邊勁射,省中葛特蘇馬改變方向成2比0。之後福仔接二連三有機會埋門,但唔係射中網側,就畀對手門將接實,但曼聯依然全取3分,連續22場聯賽未輸過,仲幫上季畀車仔炒魷嘅主帥莫連奴一吐烏氣,唔單止報番被炒及今季兩敗之辱,順便搞亂車仔嘅爭標大業,因為車仔依家同熱刺一樣打咗32場,但只領先對手4分,令原本形勢大好嘅車仔隨時甩轆。至於頭場傷兵滿營嘅利物浦靠羅拔圖法明奴建「頭」功,作客以1比0擊敗西布朗重返「3哥」位,對爭前4嘅下屆歐聯入場券非常有利。

東網體育同你追實體壇每個精彩時刻!

http://bit.ly/2ecTF2A 


來源 source: http://hk.on.cc
鍾意就快D Share啦!
Related Posts Plugin for WordPress, Blogger...