2017年5月11日 星期四

被《壹》仔報導刺激神經 翁靜晶幫毛孩維權 [壹週刊 - 1418] __,翁靜晶,M1,

八卦陣被《壹》仔報導刺激神經 翁靜晶幫毛孩維權新嘅動物繁殖條例上個月實施,《壹》仔上期亦作出專題報導,仲提及一啲猶如人間煉獄嘅非法繁殖場,結果引來唔少 ...


八卦陣

被《壹》仔報導刺激神經 翁靜晶幫毛孩維權

新嘅動物繁殖條例上個月實施,《壹》仔上期亦作出專題報導,仲提及一啲猶如人間煉獄嘅非法繁殖場,結果引來唔少毛孩主人關注,當中包括養咗十幾隻貓嘅翁靜晶,佢仲响 Facebook分享有關新聞。

原來翁靜晶嘅愛貓 Snowflake啱啱過身,身為佛門中人嘅佢,喺心愛毛孩最後十幾個鐘一直陪住牠,寸步不離,仲為佢誦經。愛貓最後往生,佢就話希望同 Snowflake來生再見。

因為愛貓嘅離開,《壹》仔嘅報導亦刺激咗翁靜晶嘅神經,眼見文明香港竟然存在動物地獄,令到佢決定採取行動,問好朋友們:「我們可以做些什麼,去協助小動物離開煉獄?」佢為咗幫啲毛孩,就提議組織一個法律團隊,監督相關部門有冇正視有關繁殖場嘅投訴、跟進調查同執法嘅效率,仲話自己可以提供辦事處同電話,亦可以聯絡三至五個志願律師。

呢個 post一出,短短兩日就有二千幾個讚好、近五百人分享,唔少網民都話支持佢,仲有唔少人留言話願意做義工添。

翁靜晶嘅愛貓近日過身,佢咁啱又睇咗《壹》仔嘅毛孩報導,因為唔想再見有毛孩受苦,就提議組織一個法律團隊,監督政府部門去正視有關繁殖場嘅投訴。

陳國基未入熱廚房 先被拆祠堂

「特區奶媽」眾裡尋他千百度,最終搵咗前入境處處長陳國基做候任特首辦主任,仲講到明七一之後佢會順利過渡去新班子。外號 KK嘅陳國基,明明已經退咗休,點知撈底再搵多筆,佢如果能夠做足五年,單係人工已經淨袋二千萬。

好多人大讚陳國基為人八面玲瓏,原來佢真係正宗「順德人」,而且仲係順德聯誼總會董事。呢個會係廣東省順德區喺香港嘅同鄉組織,反佔中、反拉布遊行呢啲撐政府行動,都見慣佢哋幫手動員,已故新世界主席鄭裕彤同恒地主席李兆基都係董事之一,反而同樣係順德人嘅保安局局長黎棟國就冇入局。

之不過,陳國基同順德嘅淵源應該唔太深,事關佢上任做入境處處長時,順德鄉下想沾光,點知搞出籍貫爭議,錯指佢係順德樂從人,但陳國基鄉下嘅堂細佬主動搵《南都》澄清,話阿哥其實係容桂人而非樂從人,仲話當地有條陳地大街,曾經有座有九十九扇門聞名嘅陳氏大宗祠, KK父輩就喺嗰度長大,三四十年代為咗逃避戰亂,先輾轉去咗香港,至於當年個祠堂,就早已經俾人拆咗變廠房。

陳國基係順德人,當年佢升任入境處處長,鄉下即刻大鑼大鼓,但原來鄉下人沾錯光,佢其實係順德容桂人,而非樂從人。

75樓做崇拜 郭炳江返全世界最高教會

新地前聯席主席郭炳江同前政務司長許仕仁嘅世紀貪案終極上訴。之前郭炳江保釋等候上訴,一早表明唔會返公司處理工作,反而希望花多啲時間鑽研神學。

郭炳江係一名虔誠基督徒,佢耐唔耐都會去中環廣場嘅 Sky City Church聽道,呢間教堂位處七十五樓頂層,飽覽維港美景,上到去感覺置身空中,難怪被譽為「全世界最高教會」。有教友笑言,上到咁高嘅場地,好似比其他教會更接近天堂,敬拜時特別有感覺。

查實郭炳江信主係有段古,話說當年郭氏三兄弟秉承父親遺願,擴展公司事業,九四年事業進入高峰,可謂有錢、有面、有地位。但當時佢突然覺得好空虛,有地位雖然令佢覺得有自信,但個人同時又好空虛自卑,一日比一日擔心,恐懼感揮之不去。

最後太太俾咗本福音小冊子佢,佢睇完覺得好舒服,第二日就同太太去教堂,開始信主之路。之前喺赤柱監獄服刑大約一年半,郭炳江都修讀神學,保釋時一星期上三日神學堂,所以面對單案,佢引用《聖經》話:「要將一切憂慮卸給神。」

位於中環廣場頂層嘅 Sky City Church居高臨下,盡覽維港景色,業主為新鴻基及信和旗下公司。

郭炳江當年信主,原來是因為感覺空虛,有自信但又自卑,但信主之後,感覺釋懷,一切都交俾神。

黑面零笑容 林鄭唔妥北京操控

林鄭口裡大讚陳國基係最適當人選,但兩人見記者時就冇乜交流,甚至當陳國基提到林鄭時, 777全程黑口黑面唔俾表情,完全冇搵到好幫手嘅喜悅。

林鄭高調「欽點」 KK,當日孖住佢開記招,大讚對方符合晒自己嘅條件,係「出任呢個位置嘅最適當人選」,但口裡說得,身體卻很誠實。

話說當日林鄭介紹咗幾句 KK,就將個時間交俾佢,然後企喺佢身邊,但當 KK用英文講番林太點樣邀請自己,佢又點欣賞林太,所以諗都唔諗就應承入熱廚房時,林鄭一直木口木面冇表情,唔只零笑容,係連眼神交流都欠奉。

究竟陳國基係咪林鄭首選?有傳佢其實係北京安插嘅人馬。有傳媒話,林鄭組班,除咗面對食檸檬之苦,仲要面對阿爺指點之痛。一向要叻嘅林鄭,竟然同北京講,話希望唔好對佢指指點點,結果係點?當然係換來北京訓斥。

《壹》仔仲聽聞,財爺個位已經過咗六輪篩選,進入二揀一階段,但兩個人選,一個係北京屬意但林鄭抗拒;另一個就係林鄭心儀但北京唔多鍾意。照咁發展落去,林鄭呢啲「定格」樣,應該陸續有來。

撰文:巫不言

news@nextdigital.com.hk


鍾意就快D Share啦!
Related Posts Plugin for WordPress, Blogger...