2017年5月18日 星期四

波叔摸龍床摸出慈姑椗 [壹週刊 - 1419 - 財經] __,M1,

位於清水灣的佛堂天后廟,又稱大廟,屬一級歷史建築,有近八百年歷史。中環人語波叔摸龍床摸出慈姑椗過緊財爺癮的陳茂波,攀上司長級位置後當然無人不識,就連鄉 ...


位於清水灣的佛堂天后廟,又稱大廟,屬一級歷史建築,有近八百年歷史。

中環人語

波叔摸龍床摸出慈姑椗

過緊財爺癮的陳茂波,攀上司長級位置後當然無人不識,就連鄉紳都想黐吓其官威,聽西貢村民爆響口,波叔與太太結婚之初都好誠心,有次包隻艇,傍晚時分到達清水灣佛堂天后廟(俗稱大廟)拜神,戲肉係入去廟內摸龍床求子,哇,後來波叔果然一索得男再生個女湊夠個「好」字,咪理波叔係基督徒, work就得啦,每樣嘢都有個價嘅,家陣入大廟摸龍床盛惠十八元,廟內有三張床,分別求財、健康及求子,以每張每次計,明碼實價十分均真!

廟內有個天后寢宮,分別求財、健康及求子,每次每張收十八元正。

陳茂波與妻子許步明結婚之初,已識得坐船去大廟「摸龍床」,夫婦育有長子陳天行及幼女陳天欣。

紅底新抱旺老爺

李國棟(右二)甚有交際手腕,曾任馬會大董,與堂兄李國能(右三)較為投契。

與李國寶同李國章同輩的李國棟( Donald)醫生,雖然去年卸任醫專主席一職,接着就當選為世界家庭醫生組織候任主席,其政治行情看漲,成為名醫飯局中的焦點人物;今時今日要做名醫,並非要搭橋通波仔,最緊要搭通大陸天地線,飯局中有名醫謂 Donald Li是目前在市場上最搭到路去大陸的醫生,此乃非靠其「李氏家族」助力,而係佢娶咗個背景非凡的新抱,親家就是中國駐紐約的外交高官;潮流大趨勢也,內地高幹子女已成為「世家望族」之後的目標「筍盤」,唔少名人之後如前大法官胡國興及新地主席郭炳聯新抱都係好紅㗎。

中環寸嘴 過萬蚊支酒……渣燴牛尾

楊國佳

工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

睇電視É PURE呢間法國餐廳 sponsor紅酒節目,話酒窖有成千支酒,同半島酒店有得「撼」,即管又 book間房去食餐晏仔,不過睇完 set lunch餐牌,都唔想難為自己,都要叫à la carte,呢間餐廳重金禮聘三個正宗法國佬做 Sommelier、廚師同經理,都好揼本。

即場考吓個 Sommelier,睇吓食餐小便飯介紹乜春春俾我,任你斬,睇吓有幾多斤兩,介紹過萬蚊嘅 Burgundy 2000 Domaine Comte Georges de Vogue Musigny Grand Cru,話晒法國佬都有啲料到,飲到剩番啲渣, Sommelier考番我轉頭,問啲紅酒渣點處置,我話拎走佢,粗粗哋過萬蚊支紅酒渣攞返屋企醃吓牛尾「揦」鬆啲肉都唔知幾過癮。嗰支法國礦泉水仲話係全港只有呢家餐廳至有。

再考吓鬼佬,問佢有冇甜品 Souffle,須知道喺我個年代,所有在英國貴族 High School讀書嘅女仔,上家政班必須學曉整 Souffle,才為之大家閨秀,而唔係好似香港啲土炮高官去海外修讀短期 course就當自己有卡士,食呢個 Souffle最緊要攪屎棍,沉咗底嘅酒好重口味呀。

過萬蚊支紅酒(右),梗係要配番支貴貴嘅法國礦泉水(左)。

菜式有啲日本 fusion味道,又魚生,又柚子。

呢個 Souffle酒味夠重。

本週壹篤

福臨門下週搞 Wine Dinner,成兩千銀一位,不過中英文字欠兩點,美點「雙輝」英文寫作 Signature Petit Fours,之不過要福臨門補多兩點都唔係難事!

路易十三欲借何猷龍過關

澳門的「路易十三酒店」老細洪永時( Stephen Hung),以往衣著品味突出,拖住個 model老婆揚威波場,酒店以全球最奢華作招徠,但動工多年至今仍未開張,睇嚟世界難撈,賭業吹冷風,手揸賭牌嘅公司都唔容易捱,純粹做酒店的「路易十三」可想而知;不過公司的跑腿四出度橋,聽講有意向 Studio City何猷龍借賭牌,跑腿仲話只要何猷龍肯借出賭牌,就可以向銀行借定錢開賭枱,講到好容易咁。不過洪永時間上市公司去年已改名,由本來的路易十三酒店改為十三集團,奉勸開賭的話不要玩廿一點,事關手揸十三點就好容易爆煲。

路易十三酒店命名為「 The 13」,中文又叫十三第,聲稱每間別墅式套房耗資逾七百萬美元。

洪永時與太太衣著突出,配合其酒店歐洲宮廷式設計。

本週圖片

週六,何超瓊匆匆忙忙在 IFC Robuchon餐廳同閨密俞琤食晏,三扒兩撥就搞掂,不愧女強人本色!


鍾意就快D Share啦!
Related Posts Plugin for WordPress, Blogger...