2017年5月18日 星期四

密會黎諾懿已婚大舅 翻撻老外咀對咀 袁嘉敏連夾兩佬 [壹週刊 - 1419] __,袁嘉敏,黎諾懿,M1,

袁嘉敏鍾意浪漫,難得人夫Ivan肯抽半日時間陪佢去淺水灣開餐。不過,袁嘉敏話對方係大忙人,好耐先會見一次!卻承認同Ivan好啱傾!娛頭密會黎諾懿已婚大 ...


袁嘉敏鍾意浪漫,難得人夫 Ivan肯抽半日時間陪佢去淺水灣開餐。不過,袁嘉敏話對方係大忙人,好耐先會見一次!卻承認同 Ivan好啱傾!

娛頭

密會黎諾懿已婚大舅 翻撻老外咀對咀 袁嘉敏連夾兩佬

去年同富貴鬼佬男友 Kenneth分手,雖然堅稱同對方有愛冇性,但實情袁嘉敏一點都唔 dry,而且不愁寂寞,原來兩個月前她同 Kenneth秘密翻撻,上週六,更著埋火辣三點式泳衣,倒奶陪鬼佬淺水灣游水,直落撐枱腳然後嘴住走,睇落相當痴纏,同一時間袁嘉敏還有另一有米追求者,同黎諾懿已婚「 5億」大舅 Ivan Lee過從甚密,人夫 Ivan還以百萬 Tesla接載袁嘉敏淺水灣兜風,左右逢源好 happy。

夜蒲認識

三十二歲袁嘉敏,一五年撻着家族做紡織生意,歐洲開酒店的鬼佬男友 Kenneth,二人拍拖極之纏綿,在公眾地方亦隨時隨地攬攬錫錫,不過,去年六月,袁嘉敏自爆同老外分手,更火速𠝹掂金融猛人謝昭平,點知兩人戀情見光死,不過袁嘉敏不愁寂寞,仍有大班追求者,近月她與黎諾懿的已婚大舅 Ivan Lee就密密約會。

黎諾懿這位有米大舅,父親李志強坐擁五億美容王國,旗下有十三間美容纖體中心,近年李父有意退休,更將家族生意全交兒子打理。

「 Ivan好叻仔,好幫得爹哋手,啲家族生意差唔多俾晒佢打理,細妹 Nicole(李潔瑩)都係幫佢手,佢同 Nicole好好感情,同黎諾懿一樣好 friend,成日會一齊家庭聚會!」

生得高大威猛的 Ivan,一早已婚老婆是韓國人,更已經有小朋友,外表好好先生的他,原來喜歡夜蒲。

「 Ivan本身好鍾意黐娛樂圈人玩,成日去中環夜店蒲,佢都係喺夜場識到 Candy(袁嘉敏),佢哋有一班共同朋友會出嚟玩,但同 Candy特別啱傾,因為佢好鍾意運動同行山,就係咁成日都約埋出去!

早前, Ivan就以他的百萬 Tesla,接載袁嘉敏到淺水灣撐枱腳,兩人在露天餐廳飲酒吃 pizza,對住 Ivan,打扮樸素的袁嘉敏更是零化妝,可見二人相當熟絡,食完嘢袁嘉敏更成個身攤喺梳化度,同 Ivan傾足個幾鐘才捨得走。

外表好好先生的 Ivan,俾韓籍老婆繑到實,與家人合照。

袁嘉敏傾到攤喺梳化度,真係當正喺屋企咁。

Hea咗兩個幾鐘,由 Ivan埋單,二人孖住走。

嘴到拗晒腰

同 Ivan約會頻密,但原來袁嘉敏同老外 Kenneth亦同時翻撻,重燃愛火。上週六,袁嘉敏身邊換了鬼佬 Kenneth,兩人同樣又係去淺水灣,出發前袁嘉敏更著住火辣三點式泳衣自拍, post上社交網站大晒逼爆湯碗胸,好明顯心情大靚。

兩人游完水,更一齊在沙灘曬太陽,跟住再到附近露天餐廳撐枱腳,身穿白色短裙的 Candy,似乎相當肚餓,不停大口大口吃沙律,望住鬼佬男友,全程表現冧爆,鬼佬唔知講咗啲乜,袁嘉敏更加掩嘴姣笑,又忽然雙手㩒住塊面扮 cute,鬼佬又有樣學樣。

吃了個幾鐘,袁嘉敏同鬼佬攞住頭盔行去停車場攞電單車,沿途袁嘉敏講嘢講到拍打鬼佬隻手,係咁笑唔停!當鬼佬幫袁嘉敏戴頭盔時,更突然激嘴女友,袁嘉敏被錫到拗晒腰,之後,擘腿騎上電單車時,袁嘉敏又不慎露底!

「之前係 Candy提出分手,所以 Kenneth一路放唔低,一路都無識其他女仔,本身 Kenneth生意好忙,成日要飛歐洲,好少時間喺香港,但一返嚟佢就要搵 Candy,明知 Kenneth好大男人,但 Candy好易心軟,兩個又喺番埋一齊!」袁嘉敏身邊人說。

同鬼佬愈傾愈 high,袁嘉敏多次冧到掩嘴姣笑。

袁嘉敏忽然雙手㩒住塊面扮 cute,鬼佬竟然有樣學樣。

鬼佬赤腳望實女友,相當 relax。

騎上電單車,袁嘉敏動作豪邁奔放!

本週二,袁嘉敏回應同鬼佬翻撻一事,揚言大家仲相處 sweet,珍惜生命裡面有呢個人!

美容王國太子爺 Ivan

Ivan揸住百萬 Tesla載袁嘉敏返家。

Ivan Lee是黎諾懿老婆李潔瑩胞兄,其父李志強投資美容公司,坐擁十三間「儷凝美聚纖體美容中心」,及十多間上市公司外,多年來投資有道,現持有八個物業及鋪位,遍布港九、新界;美容王國一直由李潔瑩及其兄 Ivan負責打理,家族身家以億計算。

同樣有米 意法混血 Kenneth

現年 39歲的意大利法國混血闊少 Kenneth De Trazegnies,於比利時長大,家族做歐洲有名的紡織企業生意,打理家族生意的 Kenneth於比利時投資開酒店, 07年,他隻身來港,將業務拓展到香港, Kenneth手持市價近四千萬的何文田半山壹號二千多呎單位,身家豐厚。

分手一年,袁嘉敏再翻撻鬼佬 Kenneth,行去攞車都 sweet過人。

臨上車前,袁嘉敏同鬼佬激嘴到拗晒腰。

去年六月,袁嘉敏被拍到與金融界猛人謝昭平約會。

15年撻着鬼佬,食住嘢都要嘴!

袁嘉敏近日帶父母歐遊,做孝順女。

書展出寫真

對自己身材充滿自信,袁嘉敏出寫真預咗無底線。

13年約滿離開無綫,袁嘉敏之後簽約太陽娛樂; 15年拍完《鴨王》後,回復自由身的袁嘉敏密密返內地登台,大小通吃,一直希望於 32歲前推出個人寫真集的她,最近已簽經理人公司,並計劃今年書展推出個人寫真。

撰文:娛樂組

攝影:楊紫、蕭敬漁、瀚鍾、森美


鍾意就快D Share啦!
Related Posts Plugin for WordPress, Blogger...