掃呢頁CODE去手機

2017年5月25日 星期四

歐霸盃:【不斷更新】全場完!曼聯2比0贏阿積士捧盃 __,曼聯,

歐霸盃決賽殺到嚟,曼聯將於今晚深夜2點45分,於瑞典激鬥阿積士。曼聯於剛過去英超僅得第6名,如果要參加來屆歐聯,今晚一定要捧盃,所以球隊上下都極度重視 ...


歐霸盃決賽殺到嚟,曼聯將於今晚深夜2點45分,於瑞典激鬥阿積士。曼聯於剛過去英超僅得第6名,如果要參加來屆歐聯,今晚一定要捧盃,所以球隊上下都極度重視呢場波,領隊莫連奴勢必派最佳陣容應戰。阿積士雖然被睇低一線,不過球隊年輕得來天才橫溢,今仗於冇心理壓力之下,或會有更佳演出,呢場波咁有睇頭萬眾觸目,我哋會喺呢個Post入面,落齊賽前消息及即場戰況,大家記得留意!

【04:39】

全場打完!曼聯末段再有後備上陣嘅連格單刀被化解,阿積士末段明顯洩氣,未能製造威脅埋門,最後「紅魔鬼」頂到尾,保住2比0勝局,力挫阿積士勇奪冠軍!

【03:52】

換邊後2分半鐘,曼聯嘅右路角球由桑馬達開出,基斯史摩寧12碼點爭頂作二傳,米希達利恩門前喺阿積士守將力壓下施展「半倒掛」射入,曼聯拉開紀錄到2比0。

【03:35】

歐霸盃決賽阿積士對曼聯,半場啱啱打完,上半場以阿積士控球較多,控球比率有6成半,不過太多球員單打獨鬥,真正有威脅埋門冇乜,合共6射先得1中框。反而曼聯靠突擊,形勢都唔算輸蝕,仲喺開賽18分鐘,憑保羅普巴喺禁區外勁射,個波中途畀阿積士守將達雲臣山齊士閂到改變方向入網,領先1比0。之後「紅魔鬼」仲有次由路爾斯華倫西亞喺右路窄位勁射,僅被阿積士門將奧拿安救出,半場曼聯領先1比0。

【03:18】

31分鐘,曼聯米希達利恩前場踢傷對手,被罰今場第一面黃牌。

【03:04】

18分鐘,曼聯前場右路進攻,費蘭尼傳畀禁區頂嘅保羅普巴,後者起左腳勁射,阿積士守將達雲臣山齊士閂到改變方向入網,曼聯領先1比0。

【03:02】

開賽15分鐘,阿積士攻勢開始到肉,前鋒貝特蘭查奧爾接應地波傳中,禁區內離門15碼左路勁射,曼聯門將羅美路接到實一實!

【02:45】

雙方賽前為曼市恐襲默哀,氣氛凝重。

【01:43】

雙方正選陣容已出

曼聯:

門將:羅美路

後衞:路爾斯華倫西亞、基斯史摩寧、戴利白蘭特、達美安

中場:桑馬達、安達靴里拉、保羅普巴、費蘭尼、米希達利恩

前鋒:拉舒福特

阿積士正選陣容:

門將:奧拿安

後衞:馬菲斯迪歷特、達雲臣山齊士、查洛列迪禾特、祖爾韋特文

中場:舒奧尼、薛耶治、卡拉臣

前鋒:多爾貝治、艾文尤尼斯、貝特蘭查奧爾

01:30

曼聯殺入蘇納友誼球場,即上《東網體育》:http://bit.ly/2ecTF2A 

●今晚曼聯非勝不可,球員壓力應該都唔細,但拉舒福特同連格兩位小將,似乎信心十足。佢哋於決賽場地操練時,畀傳媒影到兩個夾住做手勢,好明顯係練緊入波點慶祝,有信心係好嘅,千祈唔好輕敵就得喇!

●決賽一觸即發,阿仙奴名宿、現任職講波佬嘅基昂,叫曼聯一定要睇實阿積士前鋒多爾貝治:「呢個丹麥射手好犀利,今季踢42場入22球,迪利阿里咁勁,都係55場入23球。如果睇少多爾貝治一眼,就會受到佢懲罰!」多爾貝治今年20歲,早前傳出曼聯都對佢有興趣。

●曼聯名宿兼法國球星簡東拿,在曼聯與阿積士歐霸決賽前在twitter po文,悼念一班死難者。曾經與曼聯一起奪得4次英超、2次英足盃冠軍,在片段中表現哀傷:「我喜歡呢個城市、曼聯同曼市市民。我想同你哋講,呢次慘劇我感同身受,我嘅心係同你哋一齊。」今年51歲的他雖然是法國人,但在英國曼市生活的5年時間,他建立了深刻的感情,希望透過片段去安慰受傷的心。

即睇簡東拿片段:http://bit.ly/2rUaOlu 

●曼聯今晚喺斯德哥爾摩出戰歐霸盃決賽,作為瑞典球壇Icon嘅伊巴謙莫域雖然因傷唔踢得,但依然全家總動員去撐場!據瑞典《體育快報》報道,伊巴謙莫域老婆海倫娜同2個囝囝Maximillian及Vincent,都會喺友誼球場嘅VIP房入面觀戰。至於伊巴謙莫域就連日跟隨曼聯大軍備戰,消息指佢之後會繼續留喺瑞典接受康復治療。

●場地草地勁易掘起

今仗決賽,將於瑞典斯德哥爾摩蘇納友誼球場舉行,呢個場地可以容納5萬球迷,規模頗大,不過呢個場嘅草地就頗有問題,英國記者Duncan Castles,就於網上報道:「個場係好靚,但草地就唔理想。」以佢早前入場所見,阿積士球員練咗波10分鐘後,就掘晒啲草皮出嚟。

●曼徹斯特體育館周一發生恐襲,連環爆炸造成至少22死120人受傷,曼聯球迷擬在今場決賽期間,掛起旗幟悼念死難者。為悼念今次恐襲的傷亡,賽前記招亦會取消。一眾紅魔球迷已經在前往瑞典路上,一群名為Stretford End Flags的球迷正積極與曼聯和歐洲足協聯絡,希望可以在比賽進行期間掛起自製旗幟。另外,在今天晨操前,亦默哀一分鐘來悼念遇難者,十分有心。

●每逢大賽決賽,波飛一定有價有市,今次歐霸決賽曼聯對阿積士咁精彩,買唔到飛點算好,最後一個入場睇波方法,一定係買黃牛飛。呢場決賽黃牛價,已經炒到20000瑞典克朗(約港幣18000),但歐洲足協就出po警告球迷,買黃牛除咗容易買到假嘢之外,都好大機會喺入場對身分證嗰陣被拒門外!除咗歐洲足協之外,瑞典足總都發出警告,買賣黃牛飛都係犯法。

東網體育同你追實體壇每個精彩時刻!

http://bit.ly/2ecTF2A 


來源 source: http://hk.on.cc
鍾意就快D Share啦!