陳茵媺同陳豪結婚4年連生3個，舊年兩公婆如願追到囡囡Camilla。老婆專心留喺屋企湊仔，孭起頭家嘅陳豪，最近忙於拍大台重頭劇《誇世代》，15年喺荃灣開咖排工廠賣自家品牌Blooms嘅佢，最近有傳再擲2千萬出嚟投資，推出自家品牌茶。力不到不財，除咗擲錢投資，陳豪近排忙於為新產品做推廣宣傳，又要現身工場視察。拍劇嗰陣，仲要分心隔空做總指揮，真係忙到瞓覺都冇時間。不過好老竇唔係得把口，要俾到仔女優質生活，物質以外，親子活動都好緊要。日前《蘋果》獨家見到陳豪一家五口喺機場出現，據知陳豪趁拍劇空檔，抽咗幾日同老婆帶三個仔女去新加坡旅行，享受家庭樂。當晚11點半，陳豪一家五口連一個外傭浩浩蕩蕩現身機場時，兩公婆分工合作，陳豪先推坐喺孖B車嘅兩個哥哥步出先，而陳茵媺就揹實囡囡，至於外傭就推住仿如成座山嘅行李行出嚟。現場所見，戴住帽、着住短褲嘅陳豪，明顯曬黑咗，雖然面露疲態但沿路keep住笑容，心情睇嚟唔錯。至於化咗淡妝、戴住黑框眼鏡嘅陳茵媺，心廣體胖、手圓腳圓面圓比前豐腴咗唔少。兩公婆面露微笑向記者揮手，記者趁機問佢哋係咪帶仔女去新加坡旅行，但二人都只係禮貎微笑冇回應。到停車場時，陳豪先安頓小朋友上車，繼而同外傭夾手夾腳將4、5個行李篋放上後尾箱。而陳茵媺亦好有手尾，自動波將機場行李車推埋一邊，免得阻到其他人，之後先上七人車，返回大埔比華利山屋企。
| (採訪、攝影：羅德光、梁繼光) | | |
| | | |
| | | |
| | |
|
鍾意就快D Share啦！
|
|
|
