2017年5月27日 星期六

娛樂專題:張兆輝戇男開竅學送花 __,張兆輝,

估唔到張兆輝上年先學識送花氹老婆。與太太今年結婚20周年,現年54歲的張兆輝,是圈中出名愛錫老婆仔女的好老公,雖然經常在外地工作,但張兆輝指太太對他絕 ...


估唔到張兆輝上年先學識送花氹老婆。

與太太今年結婚20周年,現年54歲的張兆輝,是圈中出名愛錫老婆仔女的好老公,雖然經常在外地工作,但張兆輝指太太對他絕對信任,自嘲性格木獨,因此多年來沒有飛來艷福。不過,被太太埋怨不夠浪漫的戇男終於開竅,現在的張兆輝懂得在適當時候為太太製造浪漫驚喜,變成浪漫好老公!

近年成為螢幕搶手貨的張兆輝,回娘家無綫拍攝的劇集《全職沒女》播出後成為熱話,大獲好評。張兆輝劇中的斯文戇直CEO形象更令內地粉絲嗒晒糖,有內地狂迷更誇張地撩他床戰,在現實生活中有個完美家庭,與太太結婚20年,有對寶貝仔女的張兆輝當然不為所動!張兆輝近年在內地相當吃香,有一半時間身在內地開工,太太則要留港打理美容院生意,夫妻難免分開兩地,不過,他直言太太對他十分信任,加上他有顆木獨的心,飛來艷福難以埋身,他說:「講真結婚20年都真係冇狂蜂浪蝶,可能人哋覺得正直,或者叫木獨啦,眼見好多女人鍾意嘅男士都係好健談、好識搞笑、好識搞氣氛。我呢啲木木獨獨咁坐喺度,邊有人埋身呀。」

讚太太不辭勞苦

張兆輝雖然自嘲木獨冇女埋身,但實際是清楚自己所求,潔身自愛保護美好家庭,他說:「好清楚知道自己想要乜嘢,盡量少去一啲場合,要去應酬嘅當然自己可以控制,咩時候要做咩嘢。太太係好信任我嘅,我平時都係返工、放工、返屋企,同埋女人直覺好犀利,少少行歪都感覺到,所以佢好清楚。」

他續說:「大家由拍拖開始已經有共識,結婚、享受二人世界、到有小朋友大家就一心為家庭,努力做嘢搵啲好啲嘅環境栽培小朋友,咁多年大家都好投入去為家庭。太太都好辛勞,又要做生意,又要睇住小朋友好忙,依家仔女大咗,佢有時會陪我去拍劇,喺酒店等我,夜晚食餐飯行吓街偷時間維繫,知道佢鍾意乜嘢就畀啲驚喜佢,以前唔識畀驚喜太太,依家可以兼顧到。」

終於識送花!唔係齋食飯

愛錫老婆仔女又顧家的張兆輝,是不少女士心目中的完美老公,他卻自爆有不足地方,結婚廿年還有進步空間,他說:「今年我哋結婚20周年,上年19周年係最有驚喜,當時我喺大陸拍緊嘢,託咗佢家姐送花同鑽石戒指畀佢,氹到佢好開心,好得意,次次呢啲大日子我都唔喺香港,今年喺香港佢又唔記得咗,第二朝我又要去做嘢,咁大家食餐飯簡簡單單慶祝,有時間就做啦,我都仲未做得夠好,呢啲日子靠記,如果我記得就唔會19年去做,留番20周年先去做,哈哈哈!」

他續說:「不過,老婆都讚我有進步,以前佢覺得結咗婚就咁㗎,依家可以補救番。我就係唔夠浪漫,女性好簡單送花已經好開心,以前覺得送乜花呀,食餐飯咪得囉,但女性係要花,唔係要餐飯,大家睇法唔同,依家學識佢鍾意花咪送畀佢囉,最緊要老婆開心。」

拒做嚴父叮囑仔女讀好書

張兆輝雖然工作忙,但只要在香港,以前必定會一早起身送兒女返學,情願少睡一刻,都要爭取與子女相處,若在外地工作也會每天打電話回家關心子女,因此現在兒女長大了也和爸爸相處得好好,他說:「同對仔女溝通得好幾好㗎,我都做過小朋友知道佢哋諗法,現時為人父母更加明白父母以前點諗,同佢哋講希望佢哋唔使嘥咁多時間。我爸爸好嚴,爸爸一瞪起對眼就好驚,一直到大個都好驚爸爸,係好可惜好想同佢講嘢,但唔敢同佢講,到佢百年歸老,想同佢講都冇得講,自己經過呢啲就用另一啲方法同仔女溝通,有時講吓笑,有時哦佢哋幾句都有,起碼佢哋都肯坐定定聽你講先啦。

不反對入娛圈

張兆輝的兒女漸漸長大,女兒長得亭亭玉立,相信是不少藝人公司的目標,張兆輝對兒女入行既沒有推動,亦不會反對,唯一叮囑他們要先讀好書,他說:「個仔十一、二歲我已經帶埋佢拍戲做我助手,畀佢知我拍嘢係點,學吓做嘢要同人溝通,幫我睇通告,都打點得幾好。我同佢哋講將來做咩行業唔知,佢哋有佢哋嘅理想,冇話反對、亦冇話推動佢哋去做,只係叫佢哋最緊要讀多啲書先,讀多啲書睇劇本程度、理解都唔同,讀多啲書對做任何工作無往而不利。不過,可能仔女都係有遺傳,佢哋唔會驚鏡頭,唔會驚同人講嘢,個仔細細個就畀老師捉去表演、做司儀;個女就好多表情,同佢影相就知,好多甫士。」


來源 source: http://hk.on.cc
鍾意就快D Share啦!
Related Posts Plugin for WordPress, Blogger...