2017年5月15日 星期一

娛樂專題:陳庭欣細個曳曳偷闖「禁地」 __,庭欣,陳庭欣,

好似Toby話齋,愈話唔畀就愈要試。南區的人情味孕育出親民的2010年度香港小姐冠軍陳庭欣(Toby),她由出世到摘下后冠,一直住在黃竹坑警察宿舍,一 ...


好似Toby話齋,愈話唔畀就愈要試。

南區的人情味孕育出親民的2010年度香港小姐冠軍陳庭欣(Toby),她由出世到摘下后冠,一直住在黃竹坑警察宿舍,一住就二十多年。南區的黃竹坑海洋公園、珍寶海鮮舫、已變成港鐵站及車廠的黃竹坑村、香港仔舊大街、淺水灣、赤柱的人情事,陪伴着小女孩成長。當中她更是舊香港仔大街的「地膽」,與老街坊熟稔,還與「鸚鵡哥」相交廿多年,感情深厚!

舊香港仔大街擅闖「禁地」

舊香港仔大街是陳庭欣小時候的主要「蒲點」,她雖然住在黃竹坑,卻經常到香港仔遊玩,買零食、涼果、「禁地」大冒險。在這兒打躉更認識了老友「鸚鵡哥」,轉眼已相知相交廿多年。陳庭欣重遊舊地碰到不少舊街坊,她說:「細個成日嚟呢條街,呢間裝修舖有隻鸚鵡叫寶寶,我到依家都成日嚟探佢,佢認得我㗎,見到我會同我打招呼,佢最鍾意食黑加侖子糖,同佢識咗廿幾年,我諗寶寶都有三十歲,細個佢自由好多,冇困喺籠度,但畀人投訴,依家要隔住個籠同佢玩,因條街成日都有人倒車,佢最搞笑係扮倒車聲。」

人情味小店

小社區的小店與連鎖店最大分別是人情味,零食店四處都有,但一個情字卻吸引陳庭欣不時駕車返香港仔幫襯一間零食小店,她說:「呢間零食舖開咗三十幾年,細個最鍾意嚟夾涼果、糖仔,最鍾意食香腸,舖頭有隻貓仲好鍾意黐住我,撩佢玩會跳上我大髀度,我老竇最鍾意食呢度嘅光酥餅,所以經常返嚟買畀佢食。」短短的街道上亦有陳庭欣的「冒險王國」,小時候的她曾因好奇擅闖「禁地」:「呢度有間遊戲機中心,Daddy話好雜唔准我去,不過細路仔就係咁,愈唔畀就愈想去,偷偷地都入過去幾次,哈哈!」

黃竹坑警察宿舍童年遊樂場

陳庭欣小時候居住警察宿舍,其毗鄰的警校小時候在她眼中猶如「遊樂場」,有大片空地讓她與鄰居小孩到處跑鬧、踏單車、打波、嬉戲,度過快樂童年。最近陳庭欣以交通安全隊宣傳大使,換上工作身份重遊「故鄉」,她笑說:「細個可以走過嚟警校玩,但依家警校唔可以隨便入嚟,今次返到去見到好多以前嘅鄰居,大家傾吓偈好開心。特登去番以前Daddy帶我去過嘅地方影相,最特別係有個廿幾年都未去過嘅地方,就係男學警嘅洗手間,因為去咗嗰度換衫,當然有人幫我把守門口啦。」

陳庭欣最深印象是大操場,小時候每逢警察同樂日,她也會和鄰家同伴湊熱鬧玩攤位遊戲,最深印象是要接受爸爸的「特訓」:「細個成日同我Daddy去操場跑步,我Daddy直情當我係學警咁操練,又要我好似佢哋咁剪短頭髮。Daddy有叫過我考警隊,但媽咪反對,所以最後都冇考。」

每月遊海洋公園恨死同學仔

陳庭欣的小時候屋企就在海洋公園旁邊,當年黃竹坑未有港鐵,她卻因為地利,可以隨時走過去遊玩,令同學羨慕不已:「細個啲同學仔每年可能只係去一次,我就因為買咗年票幾乎一個月去一次,有時食飽飯就行過去海洋公園散吓步,好似落樓下公園咁普通,同學仔聽到好羨慕。去得最多就係拆咗嘅水上樂園,夏天我着件泳衣就同媽咪行過去玩。依家去海洋公園好方便,因為以前嘅黃竹坑村已經變咗港鐵站,我幾乎等咗三十年先等到佢通車,所以港鐵一開,我都特登坐港鐵返嚟黃竹坑行吓。」

珍寶海鮮舫坐船遊皇宮

小朋友都鍾意坐船睇風景,陳庭欣的媽咪經常帶她由屋企慢慢行過去再坐船去珍寶海鮮舫:「細個覺得呢度好似皇宮咁靚,好多時冇幫襯白撞咁坐船過嚟,入去周圍行吓,睇吓啲皇宮裝修,玩完搗亂完一輪,就坐另一架船陪媽媽去香港仔買餸。」她續說:「最近一次返嚟係有同學生咗BB,特登喺呢度擺百日宴,每次返到嚟聞到駁船噴出嘅柴油味、海風吹過嘅鹹水味,就有好熟悉嘅感覺,同埋到依家都仲覺得柴油味好臭,哈哈!」

化妝:Phoebe Yung

髮型:Match Tong@HAi


來源 source: http://hk.on.cc
鍾意就快D Share啦!
Related Posts Plugin for WordPress, Blogger...