2017年5月21日 星期日

欣宜活出自信寧做「脂」色快樂人 __,欣宜,

肥或瘦唔使咁在意嘅!娛樂圈不少人真心信奉減肥是終身事業,肥等同死罪,稍有不慎就會被形容為「象腿」、「巨籮」及「豬腩肉」等,難堪得令人食住雞髀都想嘔番出 ...


肥或瘦唔使咁在意嘅!

娛樂圈不少人真心信奉減肥是終身事業,肥等同死罪,稍有不慎就會被形容為「象腿」、「巨籮」及「豬腩肉」等,難堪得令人食住雞髀都想嘔番出嚟!偏偏今個月30歲的鄭欣宜唔再玩呢個遊戲,管你閒言閒語,管你指手畫腳,一於肥住做自己!為了做嘉賓撐爸爸鄭少秋入行50周年演出,欣宜可以推掉100 萬酬勞,要Daddy唔要Money,秋官向來瀟湘都嚷着要減肥,站在他身邊的欣宜卻依然唔肯妥協,拒絕稍為減掉一點脂肪迎合大眾的審美觀。

欣宜經歷過辛酸的減肥血淚史,由高峰期的230磅減到130磅,以為瘦會帶來快樂,豬扒可以變貂蟬,的確有人讚瘦咗又靚咗,但亦有人話「瘦咗都冇乜特別啫」,流言蜚語就罷了,可恨的是身體響起警號,持續不退的胃痛,似是時時刻刻在投訴未食飽。以為瘦了有更多人欣賞,有更多朋友,偏偏減肥期間不能開懷進食,連聚會亦不能多出席,朋友反而更疏遠,孤單的減肥路絕不開心。

食嘢同呼吸同步

其實欣宜正是不少「港童」的代表,出世只得8個月,媽媽沈殿霞就與秋官離異。在單親家庭中,沈殿霞只要負擔到都想滿足個女,不論是物質還是食欲,總之可以當作補償缺失的父愛,統統自動奉上。知道個女最鍾意食嘢,就放任佢食盡好西,鮑魚做早餐屬閒事,更灌輸「肥唔係罪」的觀念,讓女兒放心鯨吞天下,人家嘅湯碗係佢嘅飯碗!有次連肥姐都覺得個女食大咗,唔准佢再食,但習慣食嘢同呼吸同步進行嘅欣宜,點會畀個口有一分鐘空虛感?於是佢就含住泡眼淚,用哀求嘅聲音同媽咪講:「one bowl rice,one bowl rice」, 肥姐見心肝椗「乞食」咁可憐,當然變「more rice」。要數最經典食相,就係18年前只得12歲、但重達170磅的欣宜陪媽咪錄影,咬住大大碌珍寶腸嘅一幕,佢就食得滋味,但觀眾梗係覺得重口味!

欣宜由「港童」變身「女神」,並非好似動畫主角小忌廉揮一揮神仙棒咁簡單,當年佢唔得歡心,唔係因為身材或個樣唔夠靚,而係鄭大小姐早早患上「公主病」,當年喺電視台橫行,就算兜口兜面見到媽咪啲星級朋友都唔識自動打招呼,成日頭岳岳睇人唔到,有時仲嘴藐藐,只係人人都畀面肥姐先唔出聲,唯獨鍾意大聲「試咪」的盧海鵬冇有怕,見到有咩唔妥都不留情面直斥其非,仲搣欣宜以示懲戒!

可能是「藐得人多終遇苦」,欣宜進化成為230磅的「巨無霸」,加上踏入少女時期貪靚,佢終於的起心肝減咗成個碼,當堂順眼咗!自信返晒嚟嘅佢連續兩次扮公主,仲錫王子吳卓羲,呢個「死亡之吻」收到唔少投訴。

誓不低頭 只求開心

「落難公主」欣宜禍不單行,肥姐患癌令佢真正長大。當年佢每次喺醫院行出嚟都戴住黑超,唔係扮嘢,而係因為喊到眼腫,怕肥姐睇到報紙知佢喊,惟有戴住黑超遮眼扮冇嘢。直至肥姐病逝,喺紅館舉行追思會,秋官被「公審」力數他未盡做老竇責任,在大庭廣眾下好似喝狗咁畀人叫上台交代清楚,場面尷尬到暈!欣宜表現大方得體,拖住秋官上台話:「咁多事情都係誤會,我哋知道真相就算。」佢呢鋪「關公手腕」真係贏盡,令外界開始對佢刮目相看。

上天真係畀咗欣宜好大磨練,佢在一年內失去阿媽同婆婆兩個最愛,經歷過一段自閉抑鬱期,但好快就企番起身,因為想畀大家睇到佢做得好係肥姐嘅功勞,同時驚覺磅數唔會影響人生,只有性格決定命運!人如其名,肥姐為欣宜改嘅中、英文名都有歡欣嘅意思,佢實現咗媽咪嘅期望,覺得做人最緊要快樂,唔想為取悅別人而瘦身,決定只要健康不要消脂,唱了首《你瘦夠了嗎》為肥人發聲,又着上三點式泳衣喺網上大晒波霸及米芝蓮身材。老老實實,日本有個可愛肥妹渡邊直美,我哋亦有個鄭欣宜,都唔失禮呀!


來源 source: http://hk.on.cc
鍾意就快D Share啦!
Related Posts Plugin for WordPress, Blogger...