2017年5月20日 星期六

靠賣避孕套養家 林秀怡撒嬌上位開餐廳 __,

林秀怡捱足九年用盡力慳錢養家。無綫藝員林秀怡近期憑熱播劇《不懂撒嬌的女人》獲得網民注意,捱足九年的她多年來努力慳錢養家,靠藝人朋友二手衫接濟及撈多份兼 ...


林秀怡捱足九年用盡力慳錢養家。

無綫藝員林秀怡近期憑熱播劇《不懂撒嬌的女人》獲得網民注意,捱足九年的她多年來努力慳錢養家,靠藝人朋友二手衫接濟及撈多份兼職,更曾網賣避孕套!最近秀怡拋全副身家與友人合資開餐廳,並親力親為做清潔及樓面,忙到一頭煙!

清潔樓面一腳踢

劇集中多位演員都演出搶眼,當中飾演唐詩詠閨蜜的林秀怡,與孫慧雪、鄧佩儀負責搞搞震令劇情輕鬆不少,其麻甩男仔頭角色獲網民大讚自然又搞笑!現年25歲的秀怡已入行九年,一直默默耕耘收入不算多,但甚有計劃的她多年來勁慳儲錢,兩個月前與友人在旺角女人街開餐廳,秀怡投資全副身家六位數金額,她笑言是破釜沉舟,目標三年來回本,因沒有多餘錢請人,她要在拍劇期間返餐廳洗碗,平日也要做清潔及樓面工作,兩邊走非常忙碌。

朋友二手衫接濟

由入行頭幾年月薪不足七千港元,到現時約九千港元,秀怡身為家中經濟支柱要供養媽咪,只好慳自己不敢亂買嘢,更試過減肥減到暈!她說:「我性格男仔頭,比較少買衫,好多謝朋友會畀我一啲二手衫、化妝品,好似趙希洛、蔚雨芯都幫過我,之前我試過上網賣嘢搵錢,喺第二度拎啲貨返嚟買,賣過避孕套㖭!但就唔使見面交收嘅。」年前秀怡曾被偷拍在食肆兼職做傳菜,她直言感到尷尬:「以前唔知人哋點睇,點解藝人會去做傳菜?依家就厚面皮咗,會同啲客人傾偈!」

曾對前景迷惘偷泣

個性開朗的秀怡樂觀面對星途,直言自小已熱愛演戲,會繼續等待有發揮的角色,但回想年前低潮期,生活壓力加上對前景迷惘,曾多次半夜偷泣:「嗰陣成日都喊,但又唔可以畀媽咪知,屋企細,惟有趁沖涼時喊,搣住個鼻喊就冇咩聲,不過我樂觀底好快冇事!(媽咪有冇叫你轉行?)冇呀!媽咪好支持我追求夢想,我哋關係似兩姊妹!」問到如此辛苦,會否想找個男人倚傍?秀怡即Bling Bling眼笑說:「想呀!我都想人照顧吓,擇偶條件係成熟、高大、靚仔!但要肥少少,好攬啲,但依家我喺屋企係男人咁,慣咗。」

較令人深刻作品

秀怡於2008年參加第23期藝員訓練班入行,較令人深刻的作品包括《依家有喜》的「暉暉」、《女人最痛》的肥妹「Kitty」、《怒火街頭2》的未婚懷孕少女「胡智穎」、及《潮拜武當》的「毛瓜」,秀怡為《女》劇的肥妹角色狂增磅至120磅,而在《怒》劇則要裸身跳樓,為好角色絕對肯去得很盡!今次秀怡在《撒》劇中戲份不算太多,但一樣被觀眾讚好,之後在《三個女人一個因》及《抱佣情人》中亦有發揮機會。


來源 source: http://hk.on.cc
鍾意就快D Share啦!
Related Posts Plugin for WordPress, Blogger...