掃呢頁CODE去手機

2017年5月29日 星期一

吳岱融賤賤格格雞性大「發」 __,吳岱融,

呢啲老婆邊度搵!薑愈老愈辣,唔係青靚白淨扮韓仔做小鮮肉就可以出位,依家興起一股中佬潮,即係四十歲以上嘅中佬先至夠Charm夠襟睇,男人味、戲味乜味都有 ...


呢啲老婆邊度搵!

薑愈老愈辣,唔係青靚白淨扮韓仔做小鮮肉就可以出位,依家興起一股中佬潮,即係四十歲以上嘅中佬先至夠Charm夠襟睇,男人味、戲味乜味都有,唔單止班師奶,甚至OL或妹妹仔都冧到震,話好有「暖男」感覺喎!

專玩重口味

你睇憑一句「臭雞」成名、今年57歲嘅吳岱融大鬧李佳芯臭雞,姦污陳凱琳,唔重口味唔做,查實呢啲場口對佢嚟講,真係小兒科想當年佢話晒係「新加坡第一美男」,出位拍三級片露械,大佬,露械喎!男人最忌soft同small,吳岱融當然自恃「器量」唔小,先至夠膽show off終極一露晒冷,反而都唔夠爆seed一句:「攞去使啦,臭雞!」咁大回響,行尾運一鋪返晒嚟仲贏埋個朶「港版佐治古尼」,仲唔威咩!

先雪藏後解約

就係多得呢句「臭雞」,令吳岱融食正中佬潮成功翻身,早排仲同老婆鍾淑慧夫妻檔拍雞粉廣告搵真銀,唔使三個月極速勁賺7位數,雖然唔肯坦白交代有幾豬籠入水,但就被人撞到佢喺老家新加坡睇豪宅,唔疊水都冇人信你睇吳岱融依家乜都好順,不枉鍾淑慧早喺廿年前就已經默默支持老公,同老公做一對夫唱婦「除」嘅典範!話說吳岱融80年代喺新加坡出道,之後嚟香港發展拍唔少劇,包括同梁朝偉演過《絕代雙驕》,話咁快就俘虜咗一眾電視撈飯嘅師奶同妹妹仔,但之後無厘頭走去亞視宣傳個人唱片,無綫惟有將佢先雪藏後解約。

全裸拍三級片衰咗

身為戲癡嘅佢,轉投當時勁蓬勃嘅電影圈,做過演員、編劇、導演同投資者,對電影出晒名夠搏嘅佢,仲同鍾淑慧先喺《滅門慘案之孽殺》合演大膽床戲,再喺《替天行道之殺兄》嚟個正面全裸,毫無保留勁晒生殖器,能夠擺埋自己女友上枱拍三級片,夠潮喇啩!嗰種開通思想,同《巨輪II》鷲哥咪一樣!可惜當年啲觀眾睇到嘩嘩聲,唔係好受,搞到吳岱融喺影圈只能浮浮沉沉,未能成功戙起自己支旗!

後生爛蒲鬧事

咁瞓身赤裸裸貢獻電影事業,到頭來被嫌走得太前,點會唔覺得自己懷才不遇先?難得鍾淑慧情願自己辛苦啲,去內地登台商演搵錢,孭起頭家,偏偏2001年吳岱融同人喺夜店打交,受傷送院,諗吓嗰陣鍾淑慧淨係忙住湊仔都已經夠煩,個老公仲要咁唔生性爛蒲鬧事,難怪鍾淑慧有諗過離婚,好彩兩公婆始終雨過天青,吳岱融講番當時喺夜店受襲,鍾淑慧趕到後第一句說話,佢話:「我諗住佢入到嚟會嘈我,但佢冇,佢嚟見到我受傷,淨係關心點樣可以醫好我,太太真係好錫我,事實上係應該安撫咗傷者先,而唔係一嚟就『抦』,但呢一下唔係好多人做到,太太做得好好,我好感動!」

好老婆等於避風港

正所謂,娶到一個好老婆,就似喺暴風雨中搵到避風港;娶到一個衰老婆,就係喺避風港中遇到暴風雨。覓得賢妻嘅吳岱融自此洗心革面,將爛蒲愛玩嘅性格投放到角色演繹當中,化身鷲哥,盡情壞個夠本!諗番轉頭,若果當年畀吳岱融露J露到一炮而紅,可能佢就變咗現實中嘅鷲哥都話唔定,話晒銷金窩,英雄地,酒色財氣,既然有過夜蒲講手前科,喺夜總會鬧爆人:「成個地球都知你係乜呀,臭雞!」又有幾奇?可想而知,鍾淑慧當年以問候代替鬧爆,足可媲美太空人岩士唐:「個人一小步,人類一大步!」,鍾淑慧一少抦,吳岱融即知醒!


來源 source: http://hk.on.cc
鍾意就快D Share啦!