抵周杰倫有咁多死忠粉絲。
台灣天王周杰倫每次開騷都必定爆場，尋晚周杰倫就喺西安開演唱會，當然都係爆棚坐滿粉絲歌迷，期間有保安將前排粉絲舉起嘅燈牌掹走再掉喺地上，喺台上嘅周杰倫見到咁嘅情況，即時叫停演唱會，對住個保安話：「你不要丟我歌迷的燈牌，有沒有聽到？你要控制秩序你把她燈牌丟了幹嘛？」見個保安人員冇乜反應，怒火爆發嘅周杰倫即時怒吼：「你給我滾出去！」之後周杰倫仲安慰番嗰位粉絲畀佢點歌，見到偶像咁型保護粉絲，現場即刻響起一片歡呼聲。
周杰倫喺完咗騷之後，了解番究竟保安人員點解要掉咗歌迷嘅燈牌？原來係因為前排歌迷舉起燈牌遮住咗後面啲粉絲，搞到好多人睇唔到，所以保安人員先攞走歌迷嘅燈牌。周杰倫知道事件真相之後，喺微博到發文道歉表示：「我今天晚上在西安演唱會看到一位維護秩序的工作人員為了維護秩序把歌迷朋友的燈牌放在地上，我為這位歌迷感到心疼而說了衝動的話，我對這位辛苦的工作人員說聲抱歉，不是有心的，對於維護演唱會秩序的安保人員我衷心的感謝！」
來源 source: http://hk.on.cc
|
鍾意就快D Share啦！
|
|
|