葉翠翠早前就啱啱做咗媽媽，生活都好忙，因為要照顧佢嘅小王子嘛，但點忙都好，翠翠都會喺佢嘅專頁，同fans分享佢用嘅美容產品，fans見到翠翠用嘅產品，都想買嚟用埋一份，而翠翠有時都會幫手買。不過有讀者報料，就指葉翠翠欺騙fans金錢，讀者指翠翠話喺幫fans買嘢嘅時候，一蚊都冇賺，仲包埋運費，質疑點解翠翠可以完全免費：「好奇怪貨大約要$800但她說她會先付款和免費寄給fans已她說完全沒有賺錢，如果每樣產品她可以賺到$100至$200已經賺到笑！但他可以跟fans說完全沒有賺錢只是為fans着想，在Facebook介紹好的護膚品，但不給fans 商品名稱自行訂購，只可她一人訂購從中賺取很多獲利。」讀者因為以上幾點，去推測翠翠有賺錢，但就同fans講係冇賺錢咁。而《蘋果》就問過翠翠，到底點解會發生咁嘅事，佢就話：「我諗佢係嬲我冇幫佢買，因為嗰件產品真係好受歡迎，我都冇時間覆到咁多人，又或者係可能我阻住佢做生意，因為我個page係成日幫fans攞優惠，可能咁啱係開正佢個範疇，阻住咗佢做嘅生意。」翠翠又話最近都有啲好奇怪，就係佢介紹嗰種產品之後，就有商家直接聯絡佢嘅fans。翠翠再指嗰件產品太好賣，加上要照顧小王子，所以都未有時間幫fans處理，翠翠又話：「其實都好奇怪，件事又未發生，錢又未收，但又會有人咁樣做，相信佢應該係別有動機。」
|
鍾意就快D Share啦！
|
|
|
