林文龍、宣萱、唐詩詠、王浩信同黎諾懿主演嘅《不懂撒嬌的女人》噚晚播咗第三集，呢套希望做到係非一般大台劇嘅首部以4K全實景拍攝嘅劇集，出街冇耐已經話題多多，呢套劇一開始講0依家啲香港女仔面對住大陸同台灣啲女仔夾攻，一來性格唔夠溫柔，二來身材又唔夠好，仲話香港係A Cup之城！喺頭兩集劇情主要係話唐詩詠面對呢個拍拖4年嘅黎諾懿，剩係識得喺自己身上套料，最後仲要發現佢同白雲有路，好彩最後詩詠夢醒，喺條街到狠摑黎諾懿三巴再分手，呢三巴嘅力度都好狠，感覺拍得住14巴港女摑男友嘅力度，真係隔住個mon都覺得痛。不過黎諾懿俾人叫得做「賤han」，劇情又點會咁快玩完。聽講去到第6集，黎諾懿帶咗白雲返去佢同詩詠夾份供嘅樓，希望可以攞返啲錢，本來詩詠話俾返首期同供樓錢，但係黎諾懿梗係唔肯，佢話樓價已經升咗好多，要俾就要連埋差價一齊俾。最後梗係傾唔埋喇，黎諾懿咪用賤招迫詩詠就範，佢同白雲霸住間大房，又成日喺間屋做啲煙靱嘢，詩詠梗係唔係就範，搵咗幾個好姊妹返屋企，日日開p兼打牌，務求搞到冇日安靈，結果係王浩信出手幫詩詠買咗業權，佢哋呢條感情綫又會移師去台南發展！本來因為輸咗俾宣萱而辭咗職嘅黎諾懿，冧掂咗大老細請返佢，於是乎佢又諗計要踢走宣萱同林文龍，仲要向詩詠同王浩信報復！講番「賤han」黎諾懿俾詩詠當街狠摑，聽講呢場戲唔係一take過，嗰日用咗幾個角度同拍攝，前前後後都打咗10幾巴，而且巴巴都係堅打冇留力，不過話晒出嚟有咁大迴響，黎諾懿都話值得。噚日黎諾懿接受傳媒訪問，佢話收到劇本都預咗會俾人鬧：「其實即係做得到先會俾人鬧，嚟緊有賤han個角色會仲出！」之後又講佢俾詩詠狠摑，黎諾懿話：「我睇到啲網民話大快人心呀，我都唔記得係2take定3take，因為要唔同角度，但係10零巴肯定有，巴巴仲係堅打。」之不過有網民覺得呢場戲啲感覺熟口熟面，覺得好似佢做嘅角色似崔建邦，黎諾懿就話：「咁啱啫，如果嗰個唔係唐詩詠做，就唔會有呢個感覺。」另一方面，做小三嘅白雲，接受傳媒訪問都話：「有得參與呢套劇真好開心，同以前拍劇嘅感覺好唔同，大家合作好好，拍嗰陣可以好放開去做，變咗出嚟嘅效果好立體，唔係淨係得性感feel，我自己好期待嚟緊嘅故事發展。」
| 「賤han」黎諾懿為咗層樓，又出招對付詩詠。 | | |
| | | |
| | | |
| | | |
|
鍾意就快D Share啦！
|
|
|