2017年6月1日 星期四

新聞之花變怪獸家長 蔡雪瑩:抑制自己唔好咁癲 [壹週刊 - 1421] __,蔡雪瑩,M1,

9個月的媽媽生涯,蔡雪瑩一個字總結——攰。名人動態新聞之花變怪獸家長 蔡雪瑩:抑制自己唔好咁癲近年無綫新聞主播貨如輪轉,當中除了跳槽,部分更轉攻名人、 ...


9個月的媽媽生涯,蔡雪瑩一個字總結——攰。

名人動態

新聞之花變怪獸家長 蔡雪瑩:抑制自己唔好咁癲

近年無綫新聞主播貨如輪轉,當中除了跳槽,部分更轉攻名人、娛樂圈,曾經有「最索主播」之稱的蔡雪瑩是其中一個。

客串過郭富城同發哥周潤發套《寒戰 II》,又孖過張智霖拍護膚品廣告, Snowy(蔡之洋名)趕緊在踏入三字頭前,一口氣完成結婚生仔的人生大事,今年踏入「 29+1」,榮升媽媽只有九個月, Snowy亦步亦趨朝住怪獸家長的方向進發,安排囝囝 Wesley上 playgroup、做 baby gym,新手媽媽坦言是大勢逼成,皺一皺眉頭說:「盡量抑制住自己唔好咁癲!」

唔想變怪獸

去年四月蔡雪瑩佗住五個月 B,下嫁全國政協朱銘泉兒子、上市公司太子爺朱威霖,同年八月,眼大大同爸爸倒模一樣的 Wesley出世,由於身邊有太多家長朋友,在小朋友未出世時已籌謀定將來讀書大計,由 playgroup鋪路入 nursery、幼稚園到中、小學,甚至誇張到選好外地升學地方,眼見大部分家長都有同樣計劃,迫使原本零計劃的蔡雪瑩都要提早做嘢,安排小 Wesley返 playgroup和上 baby gym。「聽好多呢啲嘢(安排學校)嘅時候,都盡量抑制住自己唔好咁癲,可能就算好好嘅學校,未必啱佢嘅,唔想俾咁大壓力(囝囝),講真讀書仲有廿幾年讀,係咪?咁盡量抑制住。」蔡雪瑩說。

不想做怪獸家長,蔡雪瑩計劃有階段、有限度安排囝囝上興趣班,發掘小朋友的興趣同專長,希望對未來入學有幫助。至於現時參與的 playgroup及 baby gym, Snowy意想不到後者對小 Wesley好有幫助。

「佢 physical(體能上)嘅發展好咗,見多啲人之後,見到其他 BB會自己去撩佢玩,摸吓人哋塊面!」蔡雪瑩一臉滿足地說。

變身自由工作者,蔡雪瑩成為廣告代言人,同 Chilam、劉心悠拍廣告。

客串《寒戰 II》時,撞啱要飛外地拍旅遊節目,令原定的戲份刪減至只有兩場。

去年 11月,蔡雪瑩同老公為滿三個月的小 Wesley切蛋糕慶祝。

小 Wesley面圓圓眼大大,同爸爸朱威霖一個餅印。

小 Wesley對球體分外感興趣,導師安排小朋友躺在膠波上,有助訓練上身肌肉發展。

小 Wesley對導師手上的公仔大感興趣,唔通佢當埋係另一個朋友仔?

上完 BB體操班,小 Wesley變得活躍,不時主動撩其他小朋友傾偈。

9個月大的小 Wesley淡定過人,全個訪問未見過他大吵大鬧發脾氣。

攞命之旅

蔡雪瑩同丈夫朱威霖都愛旅行,因為不捨得放低囝囝,所以小 Wesley只有九個月大已經出門三次,但幾乎每次都自己攞嚟辛苦,她記得第一次帶囝囝去泰國之旅,由於當時冬天出發,溫差加上不太適應陌生環境, BB原定傍晚食完奶要瞓覺,最終演變成爆喊個多小時,喊到收唔到聲。

「有一刻我係驚佢窒息嗰隻,到佢瞓着咗,仍然不停索鼻,好可憐!」蔡雪瑩說,雖然辛苦但她仍堅持每次旅行都帶埋囝囝一齊去。

蔡雪瑩指大台新聞部未如外傳像《宮心計》一樣複雜。

蔡雪瑩同葉昇瓚老友鬼鬼,兩人離開大台後 keep住有聯絡見面。

秋後算賬

現在是幸福少奶奶的蔡雪瑩,一四年離開大台,當時有指是因為她簽下「一群無綫新聞部記者公開信」被秋後算賬,舊事重提,當事人哈哈大笑說:「邊有咁多《宮心計》(鬥爭)吖,新聞部冇報紙講得咁複雜,通常我呢啲讀傳理系嘅人好多嘢講,好 outgoing嗰種,反而啲深藏不露,成日唔講嘢,笑騎騎放毒蛇嗰種先至會篤你背脊,好多 office politics(辦公室政治)。其實嗰陣係有個 Big Four(安永會計師事務所)空缺,老闆親自搵我,個 offer(條件)又 OK啦,我嗰時嘅諗法係 PR可以長遠啲,做到五十歲冇人嫌我老,加上走嘅前一年爸爸過身,我覺得自己太忙,無時間陪屋企人,所以先決定走!」蔡雪瑩說。

原本蔡雪瑩主力做公關工作,豈料一年內電影客串、節目主持、廣告、 MC,有關幕前工作乜都試齊,現時主力做媽咪的蔡雪瑩坦言只要小朋友長大後,一定會全面復工,收復失地,不過她講明想再生兩至三個小朋友,那豈不是復工無期?

變身自由人的蔡雪瑩,做過公開活動的主持,亦曾與 ViuTV主持陳子豐拍旅遊節目《歐遊全細界》。

去年 8月,大肚五個月的蔡雪瑩同上市公司太子爺朱威霖拉埋天窗。

撈過界

昔日主播轉行,不外乎是投身公關行列,但近年有多位主播跳出既定的框框,變身 KOL、做主持、拍廣告,更甚的是投身大銀幕,嘗試做演員。

方健儀

12年告別十多年的主播生涯,轉投 ICAC做公關,四年後港台開咪做 DJ、幫大台做節目主持、出席活動、廣告代言人,亦分別在《寒戰 II》、《導火新聞線》客串。

周嘉儀

現為興業證券市場拓展部聯席董事,工餘時間變身 KOL,亦以名人身份出席各大品牌活動。

柳俊江

現於九巴出任社區事務經理,同時變身演員,拍過 ViuTV《瑪嘉烈與大衞》,又拍住蔡卓妍主演的《雛妓》,而且戲份仲唔輕。

撰文:娛樂組

攝影、攝錄:余一駱、方文初

場地提供: The Little Gym、É pure

髮型: Alex Chung( Aveda)

服裝提供: Phase Eight


鍾意就快D Share啦!
Related Posts Plugin for WordPress, Blogger...