肥媽在《關你家事》節目中爆曾受家暴，講到聲淚俱下。
探熱針
又係《關你家事》 肥媽爆遭家暴：佢攞住把刀對我
由麥長青（麥包）與江美儀主持，下週才出街的大台新節目《關你家事》，因為以黃宇詩男友彭慶餘（ Peter）的前妻現身節目爆料作招徠，未播先轟動。
近日在《關你家事》的宣傳片段，做嘉賓的肥媽聲淚俱下說：「見到啲細路遭家暴，又做唔到啲咩，真係好心痛。」原來大件頭，霸氣十足的肥媽，曾是家暴的主角，真係估佢唔到！
十八歲嫁前夫
在節目重提年輕時曾受家暴，六名子女也是受害者，啞忍多年，肥媽才帶着子女離開惶恐生活。
當年只有十八歲的肥媽，下嫁比她年長廿二歲，任酒廊琴師的丈夫，辦婚宴的五百元也由肥媽出錢外，婚後一年老公更失業，從此家庭重擔落在她身上，為養活一家八口（六名子女中，四名是前夫與他前妻所生），她做過多份苦工，但第一任老公竟然冇愧疚，還經常向她動粗。
對於在節目提及一段如傷口的經歷，本週一（五月二十九日）肥媽回應：「我原本唔係好想提，始終仔女唔想再聽番，只係當日節目講開呢個話題，我突然好衝動咁講咗出嚟，係想話俾受家暴嘅人知，唔好忍，打得一次就有第二次。」
兜巴摑兼搶糧
被打的日子，對方甚至拿刀威嚇她。「打到攞刀仔，你諗唔到嘅方法都有。好在我大隻，擋甩咗把刀，但就俾佢兜巴兜巴咁摑埋嚟，好心傷，對啲細路都影響好大，因為佢連仔女都打埋。」
回想，她說對方的暴力源於操控。「佢要嚇我哋，因為佢唔做嘢，我就愈來愈多範疇（八十年代，肥媽做酒廊歌手，一晚走幾場，高峰期月入兩萬元），佢要控制我，每月出糧，連糧袋都俾埋佢，但佢次次未到月尾就使晒。後來啲仔女叫我 keep番啲錢，仲陪我開第一個戶口。」
肥媽：佢要操控我
當年已經貫徹《食平 D》的肥媽，家用主權落番自己手上，幾年後便儲到首期做業主，但家暴情況變本加厲。「儲夠錢買金獅花園兩個單位，當時五萬左右已經包首期連律師費，但佢打我變本加厲，因為一來再冇錢佢過手，二來覺得我有毛有翼，要控制我哋。」
鏡頭前永遠霸氣逼人，但當年面對家暴，肥媽相當軟弱。「成日怕離婚頭家會散，見阿媽永遠長袖衫褲，唔想俾我知周身瘀傷，好女兩頭瞞。後來我啲仔女忍冇可忍，同我坐低傾，話再跟住呢個男人冇前途，於是我的起心肝離婚，帶埋佢哋走。家暴對一個女人嚟講，除皮肉，心靈創傷真係好難修補，我都唔識點講。所以離婚多年，我都唔敢拍拖，怕個個男人都係咁，直至遇到依家個老公（九九年下嫁第二任丈夫 Rick），我先有番幸福。」
撰文、攝影、攝錄：娛樂組
|
鍾意就快D Share啦！
|
|
|
