2017年6月15日 星期四

疑墮老千局 筱靖餐廳欠街數過百萬 [壹週刊 - 1423] __,筱靖,M1,

生日月發生事,筱靖本來無心慶祝,但朋友都自動波要請食飯,這日接受訪問後,打扮靚靚的她便跟朋友食飯慶祝。娛樂偵訊疑墮老千局 筱靖餐廳欠街數過百萬有亞視D ...


生日月發生事,筱靖本來無心慶祝,但朋友都自動波要請食飯,這日接受訪問後,打扮靚靚的她便跟朋友食飯慶祝。

娛樂偵訊

疑墮老千局 筱靖餐廳欠街數過百萬

有亞視 Do姐之稱的筱靖, 14年撐員工公開叫亞視出糧而慘被雪藏,最後索性劈炮唔撈搞生意,去年一月,她跟朋友夾份投資幾百萬在銅鑼灣開德國餐廳,一味信朋友冇𥄫實盤數的她,疑墮入老千局,上月度假返港發現餐廳現金不翼而飛,欠街數過百萬。她說:佢哋所有數都拖住唔俾,浮面街數有成百萬,未計我唔知嘅。

一年填數四次

亞姐出身的筱靖,去年一月餐廳開張,好姊妹包括羅霖、宮雪花、黎淑賢等出席撐場。由於筱靖信任做開食肆生意的拍檔,放晒手給他們,但最近她懷疑從一開始已墮入老千局。

「其實呢年幾,我一共俾過四次錢出嚟,佢哋(拍檔)每次話餐廳生意唔好、冇錢,我就填數。今年年頭,佢哋又話要找數,如果唔係 supplier唔會再俾貨。因為自己仲有其他生意,突然需要咁多現金,惟有問屋企人,爺爺二話不說,攞咗一嚿磚頭咁厚嘅錢俾我周轉。」筱靖說。

上月,她在加拿大放大假,又收到拍檔通知,指員工因冇糧出而拒絕開工。回港第一件事,她墊支了五十萬出糧給他們,不過卻陸續發現餐廳拖欠了過百萬街數。

「我最初以為拍檔同餐廳員工有拗撬,點知佢哋原來三個月冇出糧,仲趁我放假唔喺香港,攞走晒餐廳現金,佢哋冇交牌費,幾十萬租金唔交,甚至幾百蚊嘅清潔費都唔俾,好多單唔係拖就係欠,從來無找過數,我依家有一大疊欠單喺手。事後我再睇番公司嘅流水賬,原來一直有錢賺,加埋我哋股本,應該有成千萬,我唔明點解要搞成咁。員工同我講番,佢哋其實好少返工,知道我返先會現身。」筱靖說。

開張當日,一班朋友都有去捧場,其中爺爺(右三)更從內地來港做剪綵嘉賓。

雖然少返餐廳睇檔,但餐廳有份參加的大型美食節,筱靖都會落場力谷,幫手煮食同收錢。

早前新產品玫瑰水開發布會,餐廳拍檔睇中機會,叫供應商向她追數,令筱靖下定決心向外澄清跟餐廳拍檔關係。

自責疏忽

浮面欠單已經超過百萬,她怕還有未浮面的欠單:「唔知佢哋有冇攞餐廳名借財務,而家交晒俾律師處理。」

信錯人,將餐廳交給拍檔營運的筱靖自責疏忽,後知後覺,更一度希望可以低調解決。她說:「爹哋話我咁傻,不停注資,呢個係我性格問題,因為唔想見到差嘅結局,所以寧願俾錢,繼續營運唔想冇咗。不過佢哋好殘忍,知我上兩星期搞新產品發布會,特登喺嗰日俾啲欠單傳媒抹黑我,又將我電話號碼俾人,叫佢哋搵我找數,話我返咗香港有錢俾。好多出面嘅人肯同我哋做生意,都係因為我嘅信譽,我本來唔想將盤生意咁樣數出嚟,但我唔出來釐清,人哋誤會我同佢哋一黨。」

搞出大頭佛,筱靖說剛過去的三十二歲生日,是她喊得最多的一個生日,她說:「我可以點呀!屋企人都好嬲,我一個女仔喺香港,我叫 Manecy,但唔係男人呀。」教訓雖大,不過筱靖並未被打沉:「總之,我能力做到幾多就做幾多。」

她跟未婚產女的趙哲妤係好姊妹,由懷孕到生 B全程照顧。今年生日,趙哲妤知她出事,給她意外驚喜在家點蠟燭慶祝,她感動到哭了一晚。

每年亞姐選舉,筱靖都會悉心打扮到場撐自己友。

在亞視七年,筱靖一直支持公司, 13年王征跳馬舞反對發電視牌,她也到場力撐。直至 14年公司拖欠員工薪酬,她表示「出糧是天經地義」而被勒令封嘴雪藏,她才意興闌珊要求解約走人。

同是亞姐出身的羅霖,前年投資賣酒搞開幕禮,筱靖跟亞視之友都有到場支持。

撰文、攝影、攝錄:娛樂組


鍾意就快D Share啦!
Related Posts Plugin for WordPress, Blogger...