2017年6月15日 星期四

首創狗仔鮮食磚 月售六千件 圓帶毛孩上班夢 [壹週刊 - 1423 - 財經] __,M1,

Stella於澳洲讀書,也曾於當地工作過一段時間,對於香港慣性超時工作的做法直言不理解,因此希望創業後多了時間照顧愛犬外,並能重新掌握自己的工作節奏。 ...


Stella於澳洲讀書,也曾於當地工作過一段時間,對於香港慣性超時工作的做法直言不理解,因此希望創業後多了時間照顧愛犬外,並能重新掌握自己的工作節奏。

壹盤生意

首創狗仔鮮食磚 月售六千件 圓帶毛孩上班夢

近日四大會計師行( Big4)之一的畢馬威( KPMG),因懷疑有部門會就員工遲到每次罰款一百元而鬧得滿城風雨之際;同是會計師出身,於澳洲生活過八年的阮詠珊( Stella)雖未面對過如此刻薄的條件,但也深明香港的打工仔難撈。

「香港嘅工作氣氛係要準時上班,但遲收工、超時工作卻好應分,就算已經完成晒手頭上嘅嘢,都唔好意思準時走。」

她在去年養了一隻魔天使狗仔後,更感到生命中有很多事情是重要過工作。

「唔希望佢一日十幾個鐘自己一個唔知做咩,所以開始諗可唔可以有份工係俾到自己自由度去對住佢。」她因此毅然辭去正職,創立了 Healthy Little Paws腳板仔鮮食主義,把因一手一腳照顧狗仔研製而成的鮮食磚分享出去。產品的受歡迎程度終令家中廚房不勝負荷,促使她於今年建立了工場,真正完成了帶着「愛兒」上下班的小小夢想。

想同「愛兒」糖黐豆

「記得有次,我返工時睇屋企個 cam,見到 MorBB佢反白眼又郁都唔郁,嚇到我立即雲端開電腦整啲聲出嚟,睇吓佢有無反應。」廿八歲的 Stella繪影繪聲地說起,此雖然是虛驚一場,但令她立下心腸,誓要花更多時間照顧及陪伴 MorBB。訪問期間,只見 Stella不時忙碌地處理食材,不時又難敵「愛兒」苦苦哀求而一手抱起牠,連中午食飯也帶牠到設露天座位的食肆一起用餐,畫面比情侶更痴纏。「之前一直唔敢太用力宣傳公司,因屋企個廚房已經逼爆咗,到後來真係頂唔順,終於上咗工廠,可以大量生產,依家一個月可以生產到六千至八千磚。」說是主人,不少港人愛錫毛孩的程度其實直逼「家長」,應接不暇的訂單令 Stella勇敢擺脫自家小型製作的形式,量產鮮食磚。

而自製鮮食的念頭,正是出自「愛兒」心切。「啱啱帶佢返嚟,發現佢有淚痕、口臭同埋消化不良等問題,好擔心。」 Stella於是在飲食着手,發現狗仔情況在不吃乾糧,改吃她親手下廚的食物後有所改善,她更找上當營養師的妹妹阮詠雯( Mandy)給予進一步意見,擔當其產品顧問。「鮮食同乾糧嘅分別,就好似人類係食罐頭定係新鮮煮出嚟嘅食物,罐頭可能會加防腐劑、添加劑或味精,令狗仔更鍾意食或更快食完。」 Mandy一語中的地說。但狗仔所需的營養組合,卻跟人類有所不同,「最唔同嘅係人類主要嘅能量來源會喺碳水化合物如飯身上,但蛋白質,或者肉類等反而先係狗仔主要嘅力量來源。」目前店內有五款鮮食磚,每款均有一款主要肉類如豬、牛及魚,再配搭十多款食物如蔬菜及豆類,較「估佢唔到」的有小麥胚芽油、蛋殼粉、豬肝及生蠔,以確保能提供足夠的微量元素。

鴨肉磚的成分有鴨肉、南瓜、西蘭花、紅蘿蔔、甜薯、豆腐、鷹嘴豆、藍莓、豬肝、藜麥、亞麻籽、生蠔、魚油、蛋殼粉;身為產品顧問的 Mandy指某些人會認為生蠔含太高碘質,但其實只要分量適中狗仔同樣能食用。

店內大多數訂單均來自網上,有小量客人會親自到工廈單位購買; Stella指跟寵物店合作除了有分成問題未解決外,於運送過程及店鋪如何存放同樣未達成共識,因此希望從長計議以免出現食品變壞的問題。

首創磚形鮮食 棄生肉保安全

一般鮮食的做法,也是把相關食材切碎,再混合成一體,形態較偏向糊狀。「狗仔其實好醒,食多幾次後識將啲菜挑番出嚟,而且糊狀多多少少都有汁,次次都食到佢哋成面都係。」為了把所有食材重塑為一個固體, Stella用了兩個月時間研發出香港首創的磚形鮮食,解決了毛孩們的偏食問題。「食物所含嘅水分都唔同,所以要分階段加入打碎,而我哋用低溫慢煮嘅方法,逼出多餘水分,令食材結合為糕狀固體。」

一直把狗仔健康放於首位的 Stella,卻因為食品安全問題而作出了抉擇。她笑指以往在澳洲,常見有主人親自到農場購買新鮮斬下的肉髀,當晚就會製成生的鮮肉給寵物吃;無奈香港缺乏此等條件。「研究顯示,生肉對狗仔嘅腸胃係較有益,但因為香港生肉嘅入口過程較繁複,加上天氣熱,出問題機會比熟肉高。」而鮮食磚全都經過煮熟,只需解凍便可進食。

客人 May(右)養有兩隻北京狗,每個月訂購大約六十件鮮食磚,她笑說:「雖然每月開支係貴咗,但佢哋食完健康咗,可以使少啲錢去睇醫生,計番係值得嘅。」

鮮食磚會以冷凍配送的方法送貨,確保貨物由離開工場,到送到客人手上也一直保持着負十八度的溫度。

定價接近優質罐頭價格 有利有弊

鮮食磚現時月售雖然可達五至六千磚,營業額接近十萬,但 Stella坦言利潤仍是較為微薄。「一開始係希望定價為廿四蚊,最後決定十八蚊為推廣價嘅原因係唔想買開乾糧嘅客人由每個月二、三百蚊,一下子變成千幾蚊咁大差距。」市面上的優質罐頭,某些定價已提高至十多元一件, Stella希望這群主人願以差不多價錢轉購鮮食磚。

定價低,也暫時窒礙了她跟寵物店的合作。「依家個價係賺好少,如果我哋同鋪頭或經銷商合作,喺分成方面會出現問題。」未想加價,惟有繼續擴展網店,未來更會研製狗仔湯粒,增加貨品款式。由打工仔榮升為老闆, Stella沒忘卻當初在香港職場所感受到的困惑,訪問當天准許因忙於準備寵物展而辛勞了數天的員工可晚點上班。「喺澳洲時可能係我幸運,佢哋着重結果較多,唔會在意你用幾長時間或係咪一定要超時工作,只要你完成就得,佢哋無咩所謂。」她抱着如「貼身膏藥」的 MorBB,從容地說。

市面上的鴨胸肉均會連皮,脂肪含量較高,過量的話會影響狗仔胰臟健康,因此 Stella會在每次返貨後用人手剝皮,每批數量可多達四、五百塊,需時半日至一日。

食材基本處理好後就會被分批放進機器內徹底攪碎及混合;現時出貨量大增,因此 Stella會分日去處理蔬菜及肉類以保持衞生,平均四至五日才完成一批鮮食磚。

製成品會進行真空包裝,放於冰箱內可保存三個月。主人需餵食時可提前一晚把磚由冰箱放落雪櫃自然解凍作凍食,也可即日把食物磚從冰箱拿出,放入滾水中煲三至五分鐘作熱食。

開業資料( 16年 9月)

租金上期:$14,000

按金:$42,000

裝修連機器:$120,000

網店設計:$40,000

總投資:$216,000

營業資料( 17年 5月)

營業額:$99,000

入貨(材料):$40,000

租金:$14,000

薪金:$18,500#

廣告:$2,500

快遞開支:$4,000

包裝:$2,000

雜費:$2,500

盈利:$15,500

#一個全職、一個兼職

寵物營養師可以點入行?

今年廿五歲的 Mandy成為了註冊營養師只有一年時間,但她指自從養狗後就開始關注寵物營養學,留意到香港缺乏相關的資訊,相反外國已有很多寵物營養師。因此建議有意之士可加入有關平台,參考已有權威認證的資料,並以此入門。

•寵物營養學暫未有一個國際的統一標準。

•可加入國際組織交流意見,例如是美國獸醫營養協會( AAVN)。

•需具備營養學背景或獸醫等專業資格才能申請。

•以年費形式成為會員,可定時收到該會發放最新的報告或重要案例。

•會獲得協會內的專業人士聯絡名單,可就題目或範疇索取意見。

撰文:黃綺敏

攝影:林志謙、關永浩

ed_bn@nextdigital.com.hk


鍾意就快D Share啦!
Related Posts Plugin for WordPress, Blogger...