萬眾矚目嘅歐聯決賽轉頭會喺威爾斯嘅加的夫正式爆發，今場波由祖雲達斯對皇馬，前者對上4次打入歐聯決賽都落敗而回，今次除咗上重奪冠軍之外，亦都希望實現球會史上首個意甲、意盃同歐聯嘅三冠王。至於皇馬則力爭成自1990年AC米蘭衞冕歐冠後，喺歐聯年代嘅首支衞冕球隊，同樣極具歷史意義。想知戰況發展如何，大家記得留意住我哋《東網體育》呢個「鋪」，為大家不斷更新最新消息！
[04:41]
全場打完，皇馬以4比1打低祖雲達斯奪標，C朗以12個入球做埋神射手，今鋪佢威晒！
[04:36]
90分鐘，後備登場嘅馬高阿辛卡奧近射得手，皇馬贏到4比1，穩奪冠軍！
[04:29]
83分鐘，後備登場嘅祖雲達斯翼鋒古達度推跌沙治奧拉莫斯，上陣17分鐘領得個人第2面黃牌被逐，祖記10個打11個，要追和難上加難！
[04:09]
64分鐘，皇馬右路進攻，莫迪歷底線傳中，C朗近柱搶點射入，皇馬拉開到3比1喇！
[04:06]
61分鐘，皇馬中場卡斯米路離門30碼冷箭狂抽，省中基迪拉輕微改變方向直飛龍門左下角入網，皇馬2比1再度領先！
[03:35]
祖雲達斯對皇馬嘅歐聯決賽啱啱打完半場，雙方互有攻守，踢得實在精彩。比賽初段以祖記形勢較好，但先開紀錄嘅反而係皇馬，20分鐘一次快速反擊，C朗接應丹尼爾卡華積傳中，離門18第一時間撞射入網領先。失守後嘅祖記之後積極反撲，7分鐘後就靠文迪蘇傑接應希古恩禁區內二傳，離門18碼倒掛射入死角，幫祖記追和1比1。半場雙方打完，皇馬控球比率稍高有52%，但射門就只得3射1中，反而祖記就係8射4中框，場波非常刺激！
[03:13]
27分鐘，祖記左路阿歷士辛度傳中，希古恩12碼點附近作二傳，文迪蘇迪心口一控，喺兩名皇馬守將力壓下，施倒掛射入死角，祖記追和1比1。
[03:07]
開賽20分鐘，皇馬反擊，前鋒C朗拿度禁區頂傳右，丹尼爾卡華積禁區內再回傳中路，後上嘅C朗離門18碼第一時間撞射入網，皇馬領先1比0。
[02:55]
開賽6分鐘，皇馬防線傳祖記傳中波頂出唔遠，祖記中場比真歷禁區頂心口一控，「半窩利」狂抽死角，但畀基羅拿華斯超快飛物救出。
[02:52]
祖記開賽初段壓得好前，踢到4分鐘已經攞到2次攻門，其中希古恩一記離門25碼勁射，皇馬門將基羅拿華斯成功接住。
[02:03]
兩軍都公布晒正選陣容，祖雲達斯都係一如所料，派出到最強陣容，包括有「盃王」丹尼爾同阿歷士辛度嘅雙翼衞陣式，仲有前線就有保羅戴巴拿、希古恩同文迪蘇傑嘅三條A。至於皇馬嘅「4-3-1-2」陣式，主帥施丹最終都冇派出傷愈嘅「大聖爺」加里夫巴利做正選，寧願用狀態較好嘅艾斯高擔正。此外，哥倫比亞中場占士洛迪古斯竟然連後備名單都冇份，睇怕佢都可以正式告別巴拿貝喇！
祖雲達斯正選(3-4-3)
門將：1/保方
後衞：15/巴沙利、19/邦路斯、3/基亞連尼
中場：23/丹尼爾、5/比真歷、6/基迪拉、12/阿歷士辛度
前鋒：21/保羅戴巴拿、9/希古恩、17/文迪蘇傑
皇家馬德里正選(4-3-1-2)
門將：1/基羅拿華斯
後衞：2/丹尼爾卡華積、4/沙治奧拉莫斯(隊長)、5/華拉尼、12/馬些路
中場：8/卻奧斯、14/卡斯米路、19/莫迪歷
攻中：22/艾斯高
前鋒：7/基斯坦奴朗拿度、9/賓施馬
東網體育同你追實體壇每個精彩時刻！
http://bit.ly/2ecTF2A
|
鍾意就快D Share啦！
|
|
|
