2017年6月3日 星期六

【7年開10間舖】登龍街再開分店 「十舖生煎王」Oscar每月孭7位數 __,Oscar,蕭潤邦,

【新增回應】江若琳上月公開戀上「生煎包王子」蕭潤邦(Oscar),佢哋係當年07年樂壇新人,Oscar同拍檔古馳組成組合Bliss,Oscar同江若琳 ...


【新增回應】江若琳上月公開戀上「生煎包王子」蕭潤邦(Oscar),佢哋係當年07年樂壇新人,Oscar同拍檔古馳組成組合Bliss,Oscar同江若琳識咗十年後先撻着,Oscar雖然愛音樂,但喺樂壇玩咗3年,勢色唔對就淡出,去咗上海學整生煎包,3年之後,即2010年先喺旺角開100呎立食舖賣生煎包,因為貨真價實,佢分店越開越多,去年又開咗兩間西餐廳,加埋上月大埔生煎包店又開分店,Oscar升呢「九舖生煎王」,佢前晚喺facebook宣佈喺銅鑼灣開分店:「經常呼喚我開港島區嘅朋友,日後多多支持喇!多謝你哋!我愛你們!」Oscar上月中先喺大埔開分店,唔夠一個月又話喺出名貴租嘅老銅開分店,即將成為「十舖生煎王」,睇嚟同女友江若琳拍拖,女方好旺佢,Oscar今日接受《蘋果》電話訪問時,冧爆咁話:「佢幾旺我㗎,佢鼻頭有肉。」咁咪旺夫相?Oscar話:「呢個唔使睇,佢令我有力量。」愛情魔力咁大,令Oscar做生意更有動力,佢話轉行做生意7年,今年覺得發展成熟可以大搞:「一早諗咗今年係想開3間,大埔試業咗成個月,run順咗,一直都想喺港島開一間,前幾日喺銅鑼灣睇地舖,吼準今年舖租回落兩成,我睇中立即扑搥,至於第三間,我想喺荃灣。」Oscar話每間舖投資都最少要7位數字,而銅鑼灣新店仲係咁多間分店中最大,面積逾千呎,佢話:「咁多間舖,呢間舖租最貴,其實咁多店加埋,租金同燈油火蠟開支,每個月要孭數走唔甩7數字,我營運唔求賺大錢,但求薄利多銷,做出一個香港品牌,一間老字號生煎包店,始終我哋唔係集團式經營,我賣生煎包係想顧客入嚟食到好味食物,無論你有錢或基層,大家都食得起,食得開心。」Oscar回想2010年時開第一間立食舖,至今越開越多,佢冇諗過要賣出特許經營,都冇諗過要設立中央廚房,佢話:「我對每間店師傅好高要求,要佢哋食過啲嘢好味先可以拎畀客人食,如果中央工場,就好機械式,我希望每個包都人手即造即煎,滲住一份人情味。」Oscar自爆屋邨仔出身,所以希望開嘅食肆都係貼地食物,佢唔奢求做飲食業鉅子,佢想逐步穩打穩作,佢話開食肆除咗食物好緊要,經營方針都唔可以忽視,佢話:「我哋近年做出成績,取得銀行信任可以貸到款,加上有咗經驗,新舖裝修一個月就要搞好,甚至店中擺設同揀凳咁細微都有準則,始終我哋食物賣得平,要流量快,店中空間有限,座位一定唔會太寬闊,食客要將就吓,未必可以有多餘位置佢哋放袋,同做唔到高級餐廳咁舒服,食客食完就可以讓出座位畀下一批,我着緊食物質素多啲。」Oscar雖然忙拍拖,但分身有術,一人管理咁多間舖完全冇難度,佢會定期去唔同分店巡視業務。被Oscar大讚旺夫嘅江若琳,今日回覆《蘋果》時話:「我唔回應啦,但佢嘅事業,我點都會萬分支持嘅。」

只係用咗七年,Oscar已經成為「十舖生煎王」
Oscar定期去唔同分店巡視業務
Oscar希望開嘅食肆都係貼地食物

來源 source: http://s.nextmedia.com
鍾意就快D Share啦!
Related Posts Plugin for WordPress, Blogger...