2017年6月29日 星期四

戒毒 77次 [壹週刊 - 1425] __,M1,

坦白講戒毒77次何偉強,五十二歲,裝修師傅。曾經無父無母、無家、無依靠,他的前半生,只有兩個字:白粉。一次又一次想戒毒,但一次又一次的失敗。前半生,出 ...


坦白講

戒毒 77次

何偉強,五十二歲,裝修師傅。

曾經無父無母、無家、無依靠,他的前半生,只有兩個字:白粉。

一次又一次想戒毒,但一次又一次的失敗。

前半生,出入監獄十次,從冇令他有悔意,卻因一次工業意外,令他與死亡擦身而過,為了太太及女兒,他決心戒除毒癮。

我冇阿爸阿媽,印象中阿爸喺我三歲時死,阿媽將我同細佬送咗去孤兒院。阿爺阿嫲接番我哋出嚟一齊住,之後搬咗去柴灣徙置區。當時屋企冇乜錢,但兩老好錫我哋。

小學已經唔鍾意讀書,成日走落街玩,跟住入咗黑社會,未讀完中二就輟學。 78年白粉荒,當時大佬拎到白粉,叫我幫手賣,一日都搵到二千幾蚊,大把錢使,仲多咗班朋友圍住自己。圍內有人食白粉,為咗要威,我都夠膽試。一日流流長,食完後會渾渾噩噩又一日。直到俾警察拉被控藏毒,先知自己染上毒癮。阿嫲知道後好大反應,嗰刻我先知,原來我爸爸都係食白粉死。我呃阿嫲話會戒,會做番個乖孫。

戒唔到,一踏出戒毒所又食番。為咗搵錢買白粉,我打劫、老爆。三十年來,進出監房十次。阿爺阿嫲過身,我都送唔到。出返嚟就瞓街,入面起碼有張床,反正我無人無物。

○三年出監,細佬送咗部電腦俾我,無聊會開 QQ,識到祖籍黑龍江嘅老婆。結婚前,我向佢坦白。為咗佢,我戒毒,跟老婆返鄉下,貪嗰邊買不到白粉。每日自己減量,我將白粉溝入鹽水。兩地溫差好大,鄉下負 25度,啲白粉有細菌變壞,食完成個人發燒發冷,就飲鴉片煙水止住,如果癮起就沖凍水涼。婚都未結,一返香港又食番。老婆對毒品唔認識,我搵好多唔同藉口呃佢,始終冇下定決心戒。

到個女出世前,想喺無毒品下睇佢出世。將太太送返鄉下待產,我再戒毒。點知,當接佢哋返香港,一過關我就去食番。當時一個月搵萬幾,食白粉一日都要四百,捉襟見肘。試過拎太太啲首飾去當,連自己手上隻婚戒都當過十次。

有次喺地盤,我發生意外,個人清醒但手腳無知覺。我不斷諗,如果我癱咗,兩母女點算?我開始驚。死過翻生,今次決心要去戒。一出院就去搵美沙酮診所見社工,佢話戒毒要一年,最後我三個月就完成。有次,我同老婆和個女返大陸玩,前後三日都冇飲美沙酮。人生之中,我冇試過冇毒品多過三日,我好想自己成功,做番個好榜樣俾我個女睇。

吸毒係一個人嘅事,但戒毒好靠身邊嘅人支持。以前我太太,好怕俾人知我吸毒,依家佢仲鼓勵我坦誠講番以前的經歷。好多謝佢無放棄我。

撰文:黎雅婷

攝影:葉漢華

news@nextdigital.com.hk


鍾意就快D Share啦!
Related Posts Plugin for WordPress, Blogger...