網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2017年6月1日 星期四

誠哥𢱑銀 勁過 Bill Gates [壹週刊 - 1421] __,M1,

誠哥身家喺過去廿年間翻了幾番,唔單只令佢香港首富之位穩如泰山,仲反映佢搵銀能力傲視一眾本地富豪。八卦陣誠哥𢱑銀 勁過BillGates主權移交二十年, ...


誠哥身家喺過去廿年間翻了幾番,唔單只令佢香港首富之位穩如泰山,仲反映佢搵銀能力傲視一眾本地富豪。

八卦陣

誠哥𢱑銀 勁過 Bill Gates

主權移交二十年,香港變化之大遠超大家預期,其中一個變化,肯肯定係香港愈來愈有錢,例如外匯儲備,就由回歸時 817億美元,增加到上月底 4,000億美元,多到就算全港每人派港幣 40萬都派唔晒。香港富裕,同時造就咗富者愈富,咁究竟邊個富豪最識搵銀?

微軟創辦人 Bill Gates多年來長踞《福布斯》富豪榜第一位,但如果計過去廿年身家增長百分比,一樣輸俾李嘉誠。(路透社圖片)

《壹》仔翻查美國財經雜誌《福布斯》富豪榜,原來九七年時嘅香港首富,竟然唔係誠哥,當年打入全球十大排第九位嘅係「四叔」李兆基,佢當時身家有 147億美元,折合超過 1,100億港元,即係當時佢已經係千億富豪;而緊隨四叔之後,係身家有 123億美元嘅郭氏兄弟,至於誠哥,原來佢只係全球排名第 19位,當年身家 110億美元。

不過,二十年過去,誠哥身家早已翻幾番,增加到 312億美元,就算同全球首富、微軟創辦人 Bill Gates比較,增長百分比都跑贏對方,唔只令誠哥香港首富之位穩如泰山,仲拋離埋其他幾位香港富豪;根據《福布斯》最新估計,四叔家陣身家只係有 244億美元,郭氏兄弟更因為分家,郭炳江同郭炳聯加埋只得 150億美元。

大嚿做暖男 帶住老婆去旅行

人民力量陳偉業(大嚿),去年退出政壇後,銷聲匿跡,原來麻甩佬變咗做暖男,退休呢大半年,帶住老婆周遊列國。佢同《壹》仔講,舊年十二月同老婆去加拿大,探喺嗰邊定居嘅三個寶貝女,之後順便去黃刀鎮睇北極光,玩咗兩個月。

到上月初,佢話老婆恨去英國,於是又 plan咗三個月自駕遊,玩勻英國、西班牙、巴爾幹半島同埋希臘。而家仲身在英國嘅佢,越洋向《壹》仔晒幸福,話行程玩咗一半,過多幾日就會上船玩十六日,暢遊波羅的海同聖彼得堡。

佢仲話,今次個 trip意外收穫係瘦咗十磅,「可能行得路多,同埋歐洲食得多橄欖油。」退休遊世界恨死隔籬,大嚿話個 trip暫時使咗十幾萬,不過佢唔會慳住慳住,話會盡情享受喎。佢仲話,對上一次歐遊三個月,已經係四十年前嘅事,嗰時仲係單身寡佬,所以今次同老婆一齊歎世界,係別有一番滋味。

大嚿同老婆去到西班牙昆卡( Cuenca)中部嘅山城,嗰度周圍都係陡峭山脈同深邃嘅峽谷。呢個古城更加喺九六年被列入為世界遺產。

正在遊埠的大嚿,帶住老婆歎世界。五月中身在意大利斯洛維尼亞海邊準備歎下午茶,十分疏乎。

人口變化睇真啲  Hong Kong is dying

上期《壹》仔踢爆,中共對香港殖民,用大陸人口溝淡香港人口,包括每年有近十萬大陸新移民來香港爭地搶樓。

呢班新香港人,大部分都來自香港冇審批權嘅單程證制度,好似上年就有五萬七千幾人,但呢個數字原來唔係最誇,因為回歸前一年,當時足足有六萬一千個單程證新移民嚟咗香港。另一方面,原來遷離香港人口數字都比較飄忽,好似九七年就有三萬左右人口遷離香港,但○二同○七年只得萬多人,不過喺一二年,就錄得高達四萬一千六百人移居外國。至於保安局話呢兩年估計得六、七千人決定移民離開香港,數字真係可信?

其實除咗移民人數,另一個同樣值得擔心嘅人口變化,可能係死亡數字有明顯上升趨勢,由九七年三萬一千幾人,去到○七年近四萬人,上年更有近四萬七千人死亡, Hong Kong is really dying。

香港出生率喺零雙非後一度插水,近年先開始回升,但其實死亡數字一樣有明顯上升趨勢,恐怕是人口老化帶來嘅必然結果。(《蘋果日報》圖片)

回歸廿載,香港多咗近九十萬人,現時平均每八個人中,就有一個係回歸後來港嘅新移民。(《蘋果日報》圖片)

本週圖片: LKS出沒注意?你諗多咗!

據《壹》仔了解,呢架 LKS並唔係誠哥用開嘅坐駕,大家唔好諗多咗。

李嘉誠勤力就係人都知,學佢話齋如果要退休,佢五分鐘就可以退落嚟,只係佢而家唔想退啫!

香港資訊科技商會榮譽會長方保僑早幾日喺 Facebook話晨早九點未到,就見到一架掛住 LKS車牌嘅車,喺長江中心出沒。莫非就係 Li Ka Shing誠哥嘅專用坐駕?方保僑同《壹》仔講,佢好多時出中環開會都見到呢架車泊喺長江中心門口或者停車場,只可惜每次都見唔到誠哥真身。

不過,據《壹》仔所知,誠哥並唔係坐呢架車出入,佢平時其實係以寶馬代步,見到佢每次去打 golf,都係坐住架寶馬,有人仲話,架寶馬有防彈裝置添。至於呢架○五年生產嘅凌志,車牌嘅登記車主係一間叫 Luminescent International Limited嘅公司,屬長和系集團旗下公司。

撰文:巫不言

news@nextdigital.com.hk


鍾意就快D Share啦!