2017年6月21日 星期三

娛刺撈飯:坦蕩蕩唔怕腦震盪!王浩信識撈上位男女通殺 __,王浩信,

上位有原因!娛樂圈好多藝人都唔鍾意將感情事張揚,有另一半嘅選擇唔公開,玩地下情,就算斷正畀人影到都死口唔認,為咗乜,咪係Fantasy囉!一句講晒,最 ...


上位有原因!

娛樂圈好多藝人都唔鍾意將感情事張揚,有另一半嘅選擇唔公開,玩地下情,就算斷正畀人影到都死口唔認,為咗乜, 咪係Fantasy囉!一句講晒,最緊要觀眾對你有幻想,咁樣亦係最襟撈,唔理你係咪偶像派,觀眾對你冇幻想,九成玩完!不過,凡事都有例外,就算係結咗婚,都有機會成為萬千師奶、麻甩佬、小朋友心中嘅新寵,連我Nuts哥都愈來愈對佢「心心眼」,邊個?咪係「Signal Wong」王浩信囉!王浩信入行12年終於吐氣揚眉,受盡各界Fans愛戴之餘,仲被網民力推為「民選視帝」,唔少OL都話搵老公要搵好似佢咁喎!依家真係好少有一個結埋婚生埋女嘅男星,咁入屋同受歡迎,你估去到呢個位真係咁易?真係搏到盡、捱得好辛苦先有咁嘅成績,佢有名你叫「Signal Wong」,名副其實係「識撈王」,肯捱肯搏抵得諗!

屋企破產逢巨劫

王浩信查實係有錢仔,自細住薄扶林二千呎豪宅,中小學讀名校,都話人生如戲,好似做戲咁做,明明喺美國浸緊鹹水讀緊番書,點知屋企突然破產,書未讀完就要返香港搵食,大屋搬細屋,由薄扶林搬去住西環六百呎舊樓,自己顧自己。個天要畀機會,擋都擋唔住,就係咁啱得咁橋,同朋友唱K唱到被唱片公司睇中,本來做平面設計嘅佢轉咗做歌手。

當時王浩信得22歲,無啦啦喺街被人執返嚟就捧做歌星,生活富貴、周身名牌、名車接送,經理人、助手、髮型師傍到實,巴閉到當年被人誤會佢係卡啦OK太子爺呀!又係好似做戲咁做,唱片市道唔好,做咗三年歌手愈做愈霉變棄將無人問津,最落難時戶口一舊水都冇,佢都話試過出去食碗麵都驚唔夠錢畀!好彩天生一副高富帥樣,就係憑住呢副面口被睇中拍《野蠻奶奶大戰戈師奶》做二三線角色飾演有錢仔,先開始有運行。

有運行都要識轉彎,王浩信敗走樂壇,入電視台洗歌手底從頭做起,仲抵得諗唔怕受皮肉之苦,先後畀劉松仁同謝雪心左右開弓,勁揪怒摑摑足36巴!咁摑法,唔好話係咪摑到腦震盪,連佢自己都話顎骨移位,但點諗到佢真係「移位」,摑出人氣變「兜巴信」,愈摑愈上位!

爆肌變OL殺手

面皮都出賣得,唔爭在肉體!「兜巴信」將自己升呢做「大兜巴信」,豁出去剝晒衫褲剝晒鞋嚟「裸威」,幾套劇搵件衫着吓都冇,吓吓都要玩半裸,着住條底褲周街跑示眾「鵰蕩蕩」,晒底騷肌凸鵰賣大包,汁都撈埋連出浴戲都唔放過,冒寒零度拍打戲又要剝衫拳拳到肉、腳腳到腹!王浩信仲使出埋原始武器,成個Body坦蕩蕩呀!唔係你話肯就得,係要睇得啲女觀眾開心、震撼所有師奶、OL眼球先得㗎!為咗做男女都like強心嘅妙品,王浩信為keep住副偈,喺「裸」威前三個月冇啖好食,烚蛋烚菜烚肉食到口寡寡,開住工都要日操夜操,連佢老婆陳自瑤都被佢感染,齊齊玩「健體」!

騷肌凸鵰都係表面嘢,王浩信堅係搏到盡,拍追車戲時發生意外,搞到腦震盪兼差啲毀容!王浩信咁多年嚟好似滿清十大酷刑咁受盡皮肉之苦,正所謂人棄我取,依家邊個無綫小生肯咁搏命呀!畀佢上位都好正常,仲成為民選視帝添!淨係個勢都贏開巷! 加上佢又娶咗宅男女神陳自瑤做老婆,呢樣嘢最令天下男人心服口服,捱得咁辛苦,有個靚老婆錫番都抵晒


來源 source: http://hk.on.cc
鍾意就快D Share啦!
Related Posts Plugin for WordPress, Blogger...