2017年6月12日 星期一

衛蘭 衛詩重拾童夢 愛不太遲 __,衛蘭,

衛蘭、衛詩與父親Joey第一次出動放風箏,一於時光倒流回到童年。
衛蘭衛詩重拾童夢愛不太遲自小父母離異的樂壇孿生姊妹衛蘭(Janice)和衛詩(Jill),對於父親節這個節日,Janice和Jill小時候根本沒有特別 ...


衛蘭 衛詩重拾童夢 愛不太遲

自小父母離異的樂壇孿生姊妹衛蘭(Janice)和衛詩(Jill),對於父親節這個節日,Janice和Jill小時候根本沒有特別慶祝,相反最佳親子活動就是三父女相依為命到酒廊賣唱,Janice更爆出當年因家貧,被父親Joey Vidal要兩姊妹賣唱搵錢,令兩人錯失到英國讀大學的機會,妹妹Jill更因此嬲了父親好一陣子!

Janice和Jill小時候曾有幾年分隔兩地生活,因父親與韓裔媽媽離異,她們跟隨媽媽在韓國生活,直到10歲時Janice獲父親從韓接返港生活,因家境清貧,三父女相依為命,故小時候很少親子活動,莫說一家人去旅行,就算去主題公園玩一日都是奢侈的事。父親節將至,兩人想和父親重拾親子樂,因她們從父親口中得知,父親只在七歲時放過一次風箏,更是在他出生地菲律賓,之後沒再玩過,因此想一圓三父女放風箏滋味。

窮到冇錢修理雪櫃

日前「雙J」帶同父親Joey及父親的女友往大埔海濱公園放風箏,雖然三父女對放風箏零經驗,但見「雙J」拎住兩隻風箏,父親在兩人旁邊跟住跑,玩到滿頭大汗,就像時光倒流回到童年時。Janice對首次放風箏笑言:「真係好難,要跑得好快,又要夠大風,我哋三個都盡量跑快啲。」Janice問到父親覺得如何?不多言的Joey爸開心說:「Good,因為冇試過呢啲經歷,同埋我哋太忙,好少時間咁樣一齊玩,難得有呢個機會。」

「雙J」回憶小時候,父親在尖沙咀某酒店酒廊彈結他,她們放學後便流連酒店後面的公園玩耍,現每次經過,都會想起往事。Janice稱以前屋企太窮,家中沒冷氣,連雪櫃都壞了也沒錢修理:「因為太熱,我哋成日都好想爸爸帶我哋出街食飯,因為有冷氣歎,又可以行商場。」在旁的Joey爸亦指家中只有風扇。

當年生活艱難,Joey爸做了一個令兩女至今仍感到遺憾的決定,Janice自爆:「當年冇得去讀大學好唔開心,當年我同Jill係可以飛去英國讀書,但爸爸話唔夠錢,一定要我哋出嚟做嘢先得,本身我哋入到英國一間好好嘅跳舞學校,有獎學金去讀,因為覺得我哋有潛質,但最終冇得去,因為住宿生活費畀唔起,如果當年去咗讀書,我哋嘅人生應該好唔同。」

Janice(右)和Jill姊妹情深。
  • Janice(右)和Jill姊妹情深。
錫錫老竇
  • 錫錫老竇

品流複雜中打滾

妹妹Jill回想當年錯失往英國讀書,仍感可惜:「我係唔開心,嬲咗爸爸一排。」Janice替爸爸說好話:「當然會有啲唔開心,因為爸爸要我哋唔好讀書,出嚟幫手搵錢,當時我哋好唔想,好想繼續讀書,但冇法,爸爸真係冇錢畀我哋。到同爸爸一齊做嘢唱歌後,發現自己好鍾意唱歌,所以好多嘢都係個天一早安排好,要我同Jill做歌手。」時至今日,Janice和Jill都成為歌手,當日父親為她們選的路是否算不差?Janice只謂:「開頭係差嘅,因我哋十七、八歲就喺啲品流複雜環境長大,細細個就見到好多嘢。我哋大咗都明白爸爸,佢好想我哋讀書,只係冇能力。」

難得一次「家庭樂」,三父女盡情又跑又跳。
  • 難得一次「家庭樂」,三父女盡情又跑又跳。
父女點會有隔夜仇,現在爸爸開心健康,孖妹已經好滿足。
  • 父女點會有隔夜仇,現在爸爸開心健康,孖妹已經好滿足。
Joey爸現有一個關心他的女友,令Janice和Jill好放心。
  • Joey爸現有一個關心他的女友,令Janice和Jill好放心。

文:音樂組

攝:司徒國榮

化妝:Samuel@江中平化妝室

服裝:5cm

Janice髮型:Haysses Ip@HAIR

Jill髮型:Carmen Ngai@HAIR


鍾意就快D Share啦!
Related Posts Plugin for WordPress, Blogger...