掃呢頁CODE去手機

2017年6月6日 星期二

電話畀仔唔畀女!蔡思貝漏電擘髀要慳啲 __,蔡思貝,

蔡思貝出名係發電機!生得樣靚身材正,多仔埋身是常識,被封為萬人迷呢個「正朵」亦是必然玩法,蔡思貝有齊以上優點,更加係電視台肯搏肯捱上位姐仔,唯一係唔識 ...


蔡思貝出名係發電機!

生得樣靚身材正,多仔埋身是常識,被封為萬人迷呢個「正朵」亦是必然玩法,蔡思貝有齊以上優點,更加係電視台肯搏肯捱上位姐仔,唯一係唔識走位唔識避忌,風頭火勢都衝埋去,孭住「姣精」、「發電機」諢名,好似逢仔必啱咁,即使人家打正牌頭有女朋友都照黐,結果咪緋聞十單有九單都入佢數,難怪被網民對號入座評為「小三」,唔係話佢真係做「小三」,而係凡有情侶分手,蔡思貝鑊鑊都開定條路畀位人入,唔做佢做邊個?

先唔講蔡思貝同洪永城點解「賴嘢」,單數往績已經一大籮,蔡思貝同有女友莊思明嘅楊明開工,竟然共用同一支飲管飲奶,自己嗒過嘅匙羹又遞畀人用,又啜又含,作死咩!歌手鄭俊弘同姜麗文拍拖時,佢突襲對方嘅騷仲送埋花,之後孖住去睇蘇打綠,即刻被人話佢激走姜麗文!至於同羅仲謙拍劇埋身講笑兼約食消夜,嘩!你當楊怡冇到呀?

乜仔都玩得埋

搞到被人話主動姣擒,唔係冇原因,明知視帝陳展鵬惹火多粉絲,繼續唔怕死孖住去整車,行到鬼死咁埋;同大隻仔溫家偉玩到攬頭攬頸兼大講有味笑話,大隻仔喺網上講笑留言話食咗佢隻鮑魚,佢又冇反抗喎……不能盡錄。蔡思貝錯在好玩唔玩,乜仔都可以玩得埋,同洪永城齊齊跑步兼「腿張開」玩一字馬,話晒洪永城嘅女友唐詩詠有名叫做「中國好女友」,即係全世界好女友嘅精神領袖,神聖不可侵犯明知自己惹火,擘腿擘出禍,被人話係第三者,全城狂數,做咗「金翅大鑊鳥」!傳緋聞多過食飯嘅蔡思貝,平時可以當無事發生,今次都不敢怠慢,搵男友麥秋成出手公開合照打救!狼來了故事都有教,一次當巧合、兩次當你唔好彩,第三次就當真的了。

鵪鶉樣仰慕前輩

點解畀人覺得逢仔必「吼」?聽聞佢初入行,女記者問佢攞電話號碼,會用「遲啲會轉電話」等理由推搪,但見男記者就秒速奉上,我Nuts哥好想去相信係或然率問題,即係四個去問,咁啱一個中,就係咁啱個男記者中咗囉!有口痕友話佢呢輪同張衞健拍劇,「噸」起一副仰慕嘅鵪鶉樣,呢啲我又覺得睇你點睇,可能佢尊敬前輩啫。

唔好成日抱住「打波先嚟落雨」嘅負面心態,邊度跌低就邊度起番身,查實蔡思貝廿幾歲女,要承受四方八面嘅批評,的確係好難受,不如正面去諗,已經衰無可衰,一次過受晒,當係磨練,又或者學識擘髀唔擘咁遠、注意衞生唔好一支飲筒兩份飲、慳啲使唔好周圍送花,將來總可以百毒不侵,呢啲人生經驗真係去菲律賓讀博士都讀唔到㗎!


來源 source: http://hk.on.cc
鍾意就快D Share啦!