2017年6月23日 星期五

【獨家】逃離無綫返大陸開米線店 一線變七線蔡淇俊:喺公司冇存在感 __,蔡淇俊,無綫,中國,大陸,

有人話,你的樣子如何,你的日子也必如何,女嘅生得靚索正,男嘅長得型英帥,機會自然手到拿來,一生順風順水。今年30歲嘅蔡淇俊,17歲參加無綫旗下周刊「至 ...


有人話,你的樣子如何,你的日子也必如何,女嘅生得靚索正,男嘅長得型英帥,機會自然手到拿來,一生順風順水。今年30歲嘅蔡淇俊,17歲參加無綫旗下周刊「至型bug仔」比賽,憑青靚白淨加6呎身高,輕易擊敗過千位參賽者奪冠,讀完藝員訓練班順利進入娛樂圈。02年仲係做閒角,到04年已成功晉升做錢國偉監製嘅青春劇《赤沙印記@四葉草.2》男主角,夥拍司徒瑞祈、陳自瑤。如果有留意無綫用人方針,喺嗰個年代,冇權冇勢冇背景,任憑你演技勁過梁朝偉,都未必有人留意到。蔡淇俊,算係比較幸運嘅一個。之後,蔡淇俊再下一城,得無綫高層曾勵珍(珍姐)欽點做處境劇《同事三分親》,事業運擋都擋唔住。要知道,當時同佢同屆嘅鄭俊弘,都仲係做緊無名小角。少年運得志,但奇怪係,蔡淇俊往後拍嘅劇,卻彷彿中了降一樣,越做越少戲份,甚至喺13年嘅劇集《仁心解碼II》中,角色就只有第25集戲份嘅報導員一角,簡單啲講,連名都冇。歸根究底,蔡淇俊話係性格問題。「可能太細個入行,自己又係比較內向怕醜嗰類人,本身我係好care人哋點睇自己,例如有人搵我做識溜冰、打功夫嘅角色,我就算識,都會預先打定底同人講『我麻麻地咋喎,試吓啦』,但其他人就會話『我得o架,好掂o架』,諗番轉頭,係miss咗好多機會。而當時身邊個個都係大哥哥大姐姐,阿叔阿哥,或者好少接觸其他人,所以同好多人唔熟,冇乜溝通,變咗人哋見到面時認得你,但轉過身就唔記得,即係冇乜存在感。慢慢同公司嘅幕後、監製、導演都唔熟,變咗開始覺得幾難行。」由一線無奈跌落七線,蔡淇俊坦言曾經有唔開心過。「咁當然我都會檢討自己啦,但見到人哋開始上,當時你係諗極諗唔通,其實大家做戲都差唔多喎,都係做咁多年啫,唔通我有啲咩做得唔好,到我呢幾年出去做生意,識得人多,發覺可能係性格上有啲嘢,或者待人處事上,原來做得唔夠好,再加埋你做戲又唔係叫叻,只係一般般,咁導致到冇人咁成功。」已經冇做無綫,現時喺佛山開雲南米線嘅蔡淇俊,間中都會諗番轉頭。「嗰時入行,真係諗住拍戲係自己終身職業,到呢一刻其實真係要多謝Wilson(錢國偉)同珍姐,係佢哋肯俾機會我,不過當時細,好多嘢都未ready,o依家諗翻轉頭,又或者可能會先處理人際關係上。」相比同屆嘅胡定欣同鄭俊弘,一個做咗視后、一個可以開個唱,蔡淇俊坦言:「都冇酸溜溜嘅,係真心戥佢哋開心,哈哈,咁講法,我都成名先啦,有啲嘢冇得比嘅。」雖然脫離幕前做咗生意人,不過蔡淇俊話自己每日都有keep吓fit,同睇戲睇劇留意人演技,間中亦會喺大陸拍吓網劇,希望有朝一日可以重返幕前。起步早有着數,30歲再出發,唔遲!

(攝影:葉君海) 蔡淇俊認為自己太細個入行,加上性格唔識social,結果監製、導演要用人嘅時候,未必會諗到佢。 導致喺公司冇乜存在感。
由於米線舖生意上軌道,經濟穩定嘅蔡淇俊,話希望自己操fit啲再可以拍劇。 同樣係《四葉草2》男角嘅司徒瑞祈,因賭錢欠債事件,至形象插水,原來佢早兩個月,已經執包袱同無綫講bye bye。
當年當紮時,蔡淇俊都曾經同花旦鍾嘉欣一齊做節目嘉賓。 《四葉草2》後,蔡淇俊有份做《同事三分親》,同關詠荷做對手。
02年喺訓練班出嚟嘅蔡淇俊,當年同馬國明、黃宗澤、吳卓羲一齊拍《衝上雲霄》。 近年蔡淇俊喺劇集越嚟越少戲份,甚至係連名都冇嘅閒角。 蔡淇俊現時喺佛山開咗5間米線舖。

來源 source: http://s.nextmedia.com
鍾意就快D Share啦!
Related Posts Plugin for WordPress, Blogger...