2017年6月13日 星期二

孖叉出鞘!C AllStar兄弟內訌搞散頭家 __,C AllStar,

今次「燒烤叉」,真係成日叉嚟叉去!手足兄弟都有不和、打交或爭產,打牌東南西北四隻腳都未必啱牙啦,更何況同三九唔識七嘅人夾Band搵錢?要和氣生財邊有咁 ...


今次「燒烤叉」,真係成日叉嚟叉去!

手足兄弟都有不和、打交或爭產,打牌東南西北四隻腳都未必啱牙啦,更何況同三九唔識七嘅人夾Band搵錢?要和氣生財邊有咁易!當初C AllStar就係依住呢個玩法上位,一首《天梯》唱到街知巷聞,喺本地樂壇嚟講,雖然唔算係最紅嗰隊,但都算有朵有勢,點知突然宣布做埋10月嘅紅館演唱會後就暫時終結7年合作!好好哋玩拆夥,有毛有翼學做「分飛燕」各自各玩,唔再做粉絲暱稱嘅「燒烤叉」!有大鑊飯唔食,搞到要各自搵食,要破解呢個解體之謎,唔使斷估冇辛苦嘞!咪就係條氣唔順,唔玩「燒烤叉」玩「孖叉」囉!

實行曲線示威

人夾人緣,查實四子性格迥異,當初做新人時,根本冇乜資格去嫌棄對方,你想出聲?留番啖氣暖肚大家都係咁高咁大咋!直到事業逐漸穩步上揚,以前覺得可以啃得落嘅,家陣就會覺得不吐不快,事實上佢哋近幾年喺鏡頭後都懶得交流,就算喺後台得閒到「放蚊」,都唔會圍埋吹水防口氣!當中兩位成員釗峰(梁釗峰)同On仔(陳健安)嘅暗鬥,由地下搬埋去地面!釗峰恃住自己係主音,乜都要做大佬話晒事;On仔就覺得受粉絲歡迎,自問論唱功唔會輸,冇理由長期做阿二要睇人面色,自此兩個男人就好似啲女咁,乜都要爭,爭出位、爭歌、爭排頭,有時㷫起上嚟,連錄音室都照開片,勞氣傷肝事小, 失威冇面事大!

經理人諗住出碟時,每人都有首獨唱歌就可以平息干戈,點知都係收唔到科,其餘兩個成員King(吳崇銘)同Jase(何建曦)就得剝花生。一向唔鍾意玩埋堆嘅釗峰,近年都開始為自己未來鋪路大打公關牌,同DJ打晒交道,逢局必到求人緣,收到風嘅On仔就好唔抵得,話不屑身為音樂人變「天下第一關」,佢仲睇準釗峰身形輸蝕,走去狂做gym谷大隻,無時無刻騷肌,擺明曲線向人示威。

留番啖氣唱歌

C AllStar近年「三日一小叉,五日一大叉」,經理人都明知紙包唔住火,與其日日家嘈屋閉搞到家醜外傳先玩拆夥,不如趁啲火未燒通頂,好嚟好去又好,安撫吓粉絲又好,陰謀論啲臨尾賺埋最後一筆亦好,決定開告別演唱會,仲開埋綠燈畀佢哋明鬥,好似影演唱會海報時,今次就各有不同走Free Style,冇肌賣嘅釗峰、King同Jase要包到實,只得操肌有成嘅On仔露出麒麟臂,令三位忍唔住寸爆On仔扮「步驚雲」。

On仔諗住成功爭取唯一一個可以喺演唱會個人solo當攞番個彩, 喺民選投票活動中,拍個搽油、半裸,仲搵埋Super Girls成員Cheronna上床嘅新歌MV搶票,硬撼搵廖子妤做MV女主角嘅「死敵」釗峰,點知就差嗰一票飲恨輸畀冷門黑面王Jase,當堂氣頂到上頸。雖有粉絲為On仔出頭,話有幕後黑手挫On仔,搞到四幫支持者又拗一餐!贏咗場交,輸咗個家,與其日日諗計鬥氣,不如留番啖氣唱歌好過口舌之爭畀你贏咗又點,凡事睇長線,依家玩解體,個天都畀埋機會你,咪放長雙眼睇吓大家單飛有幾掂囉!邊個單飛飛得掂,真正出人頭地 ,咁先至係大贏家!


來源 source: http://hk.on.cc
鍾意就快D Share啦!
Related Posts Plugin for WordPress, Blogger...