掃呢頁CODE去手機

2017年6月25日 星期日

【《踩過界》率先睇】女頭男身浴室全裸 陳庭欣靠CG演跨性別人士 __,庭欣,陳庭欣,

無綫同愛奇藝合拍嘅《踩過界》噚晚喺翡翠台播映,不過喺大陸嘅觀眾已經可以率先睇晒14集,而且仲有廣東話版同普通話版任揀!聽講呢套劇嘅點擊率同口碑都唔錯, ...


無綫同愛奇藝合拍嘅《踩過界》噚晚喺翡翠台播映,不過喺大陸嘅觀眾已經可以率先睇晒14集,而且仲有廣東話版同普通話版任揀!聽講呢套劇嘅點擊率同口碑都唔錯,雖然有啲劇情睇睇落有啲熟口熟面,但係節奏都算明快,故事講失明大律師王浩信,同師爺蔡思貝仲有做偵探嘅張振朗,呢個團隊為咗啲弱勢社群出力。查實今次有唔少劇情都好踩界,好似有禁錮、0靚模傷人、安樂死問題等等,不過最具爭議嘅,就係陳庭欣所飾演跨性別人士涉及一宗非禮案。陳庭欣由細到大都覺得自己鍾意做女仔,佢仲已經見過心理醫生,為變性手術做好準備,點知有一次佢同張振朗去打網球,喺更衣室遇到學生家長,本來陳庭欣見到家長唔小心跣親,佢出於好心幫佢捽條腰,點知最後俾家長發現原來陳庭欣係男扮女裝,於是報警告陳庭欣非禮。喺法庭度陳庭欣憶述不被爸爸接納,連媽咪嘅喪禮都唔俾佢去,搞到佢染上毒癮減壓,陳庭欣試過同女仔拍拖,不過最後都接受唔到!喺前期陳庭欣飾演嗰個男兒身,除咗有一個超短嘅短髮之外,仲搵咗一個身型同佢差唔多嘅男仔,有一場喺後巷露上身賣醉嘅戲,同埋喺浴室俾學生家長發現佢係男兒身嘅全裸戲,做過CG之後,終於唔再得膠味!陳庭欣其後接受傳媒訪問,講到今次嘅演出,佢話:「我自己未睇呀,唔知拍出嚟嘅效果係點,但係拍嗰場浴室戲真係有啲尷尬,因為要做後期,將一個男仔嘅身KEY我個頭上去,於是乎我只可以著住一件肉色嘅tube同衭打底,但係當roll機之後,就冇諗咁多,好專注做場戲。」佢仲笑笑口話:「真係要多謝監製搵個替身俾我,身型同我差唔多,仲有腹肌,搞到我唔使練都有腹肌!同埋啲工作人員都好細心,昅實唔俾我走光」唔知係咪因為有《致命復活》嗰次經驗,所以信心多咗,點知陳庭欣話:「其實接呢個角色,《致命》都未出街,0依家梗係希望可以好似上次反應咁好,今次嘅挑戰仲更加大,因為涉及跨性別人士,題材比較敏感,我唔知我爸爸媽咪睇完之後,又或啲觀眾睇完,會唔會受到嗰場得個頭係我嘅全裸戲,呢個真係一個謎!」造型方面,陳庭欣都落咗唔少苦功,佢話:「其實基本上只係畫咗條粗眉,搽咗啲粉遮咗少少眼圈之外,基本上係冇化過妝,雖然自己都有啲唔慣,要睇多幾次,不過都幾好玩!」

( 《踩過界》截圖) 陳庭欣所飾演跨性別人士涉及一宗非禮案( 《踩過界》截圖) ( 《踩過界》截圖)
呢個頭就係陳庭欣,下身就係男人嚟嘅( 《踩過界》截圖) 呢啲都係夠CG嚟做嘅( 《踩過界》截圖) ( 《踩過界》截圖)
( 《踩過界》截圖) ( 《踩過界》截圖) ( 《踩過界》截圖)

來源 source: http://s.nextmedia.com
鍾意就快D Share啦!