2017年6月15日 星期四

梁粉執包袱  Fact Check馮煒光 「而家我唔等錢使!」 [壹週刊 - 1423] __,M1,

五年前,馮煒光揸波子接受《壹》仔訪問,直言「唔等錢使」。八卦陣梁粉執包袱 FactCheck馮煒光 「而家我唔等錢使!」仲有半個月,唔少梁粉都要執包袱 ...


五年前,馮煒光揸波子接受《壹》仔訪問,直言「唔等錢使」。

八卦陣

梁粉執包袱  Fact Check馮煒光 「而家我唔等錢使!」

仲有半個月,唔少梁粉都要執包袱;馮煒光月初已經响 Fb公布自己無得留低,佢話︰「最後一個月服務市民。之後努力讀書,鍛鍊身體,培養嗜好!」《壹》仔都問候過佢,佢話抖吓先喎。

本月初,馮煒光已經在 Fb宣布無得留低。

查實呢位仲出緊我哋糧、月入過三十萬嘅新聞統籌專員,平時返工,真係好忙;返工時間要不斷上 Fb撩網民鬧交、不斷「些牙」「港人港地」、「幫港出聲」嘅 post,再唔係,就係 post自己响報章嘅專欄、向主子 689獻媚。《壹》仔計過,專員返工時間,起碼响自己 Fb出二三十個 post。咁 free嘅工,喺邊度搵?

《壹》仔好記得 12年 6月嘅時候,馮煒光背住民主黨去考副局長,俾人話佢「賣黨求榮」。當日佢揸住架紅色波子,振振有詞咁同《壹》仔講︰「而家我唔等錢使,我成日經過灣仔一間車行好恨買部保時捷俾自己,舊年日本大地震後覺得人生苦短,就衝入去話即刻買,七十幾萬!」

馮煒光最終做唔到副局長,但就做咗新聞統籌專員,幾年舔咗納稅人接近千三萬,十架波子都買到;不過佢而家唔揸波子,轉咗揸 Tesla。

咖喱飯靠 38吋胸發訊息

梁游被 DQ,立法會十二月刊憲話宣布議席出缺至今足足半年,都仲未同選民交代幾時補選。選舉時聲稱因為俾鄭家富𠝹票而落選嘅范國威(咖喱飯),表明會參選,而家就積極備戰。

一向注重形象嘅佢,一直有操開,跑步、打拳、做 gym樣樣齊。一五年區選時佢曾經同《壹》仔講,話從政者外表嘅每個細節都係向選民發放訊息,當年真係聽到《壹》仔毛管戙。

事隔兩年,咖喱飯身形無乜點變, 13吋嘅雙臂、 38吋半嘅胸肌,同黃宗澤個胸只係差 2吋,唔知係咪想突出自己可靠嘅「訊息」呢?佢就話對身形仲未滿意,想再降低體脂率,睇嚟 40吋巨胸指日可待。

補選仲未開波,佢就鬧政府用拖字訣,對當區選民好唔公道。雖然泛民有共識話會有初選,但遲遲未有動作;查實佢而家諗乜都無用,政治一日都嫌長,若果長毛、姚松炎、劉小麗同羅冠聰是但一個,或者同時被 DQ,到時成個策略就會唔同晒。

兩年前范國威已經開始「發功」,塑造胸肌。

殺雀源起 乜又係你呀民建聯!

政府講保育一直都係得個講字,好似上星期康文署因為雀屎問題,喺大埔鷺鳥林斬樹連啲鳥巢都斬埋,搞到鷺鳥慘死樹下。嘉道理農場暨植物園嘅野生動物拯救中心發言人同《壹》仔講,截至 12日為止,佢哋接收咗 22隻嚟自大埔墟鷺鳥林嘅鷺鳥,當中 9隻小白鷺、 1隻夜鷺同 1隻大白鷺仍接受治療,另外 11隻鷺鳥不幸身亡,真係心都痛埋。

外國處理雀鳥問題就文明好多,居住英國,喺大學工作嘅港人 Mandy就話,响英國如果遇到雀鳥繁殖期,政府為咗保護雀鳥,唔俾人類打擾佢哋,會索性封路唔俾人行。「無論係小動物、人類或者植物,都係大自然嘅一部分,你應該學識欣賞同尊重,一齊生活。」見到香港竟然因為有人投訴而斬樹, Mandy就覺得好驚訝。

之前康文署官員仲死唔認錯,話過往冇指引教員工修樹時遇到雀鳥或雀巢應該點處理。 Mandy直斥低能、低智,佢話保護雀鳥係基本嘅同理心,對大自然要關懷,而唔係因為犯唔犯法先去做。「香港應該要有個好層次啲嘅官員!」

其實唔少地方都面對雀屎問題,日本多郊區,雀仔喺公眾地方築巢孵蛋係好正常嘅事,但當地人就會想盡辦法去保護雀鳥。日本人會喺雀巢下方加設紙箱或板塊,去盛載雀屎,定時定候去清理,確保唔會發出異味影響他人。

康文署斬樹,變相殺生,可憐鷺鳥被毀家園,嘉道理農場連日來仍盡力搶救受傷雛鳥。(嘉道理農場提供圖片)

低智絕育方案

查實今次因斬樹,斷送咗咁多條命,源起又係民建聯。話說民建聯區議員黃碧嬌收到市民投訴話好多雀屎,於是就叫政府做嘢。民建聯議員「為民請命」,請出個大頭佛都唔係第一次;之前佢哋嘅北區支部執委廖超華,又係話收到居民投訴,話啲木棉絮亂飛,所以要求康文署剪木棉花果實,最後佢仲掛橫額「成功爭取」添。兩年前,呢班建制派議員仲厲害,响區議會上,建議幫木棉樹「絕育」,等佢哋唔使開花結果喎。

破壞樹木,擾亂生態,民建聯區議員竟還邀功表揚自己「功績」。

外國保護雀鳥不遺餘力,日本(左)會在鳥巢下方加設紙箱或板塊,盛載雀屎;而英國(右)遇上雀鳥繁殖更會將整條路封鎖。(網上圖片)

撰文:巫不言

news@nextdigital.com.hk


鍾意就快D Share啦!
Related Posts Plugin for WordPress, Blogger...