2017年6月5日 星期一

鍾舒漫噴血大整蠱 G.E.M.忘形晒事業線 __,G.E.M.,G.E.M,鍾舒漫,鄧紫棋,

整蠱對象到底係邊個?如果有人喺你面前突然吐血,你會點?報警、call救護車定搵人幫手呢?鄧紫棋(G.E.M.)就面對呢個難題,日前網紅李煒樂(笑波子) ...


整蠱對象到底係邊個?

如果有人喺你面前突然吐血,你會點?報警、call救護車定搵人幫手呢?鄧紫棋(G.E.M.)就面對呢個難題,日前網紅李煒樂(笑波子)就夥同鍾舒漫(Sherman)拍咗一段整蠱G.E.M.嘅片,兩個計劃齊齊喺G.E.M.面前扮吐血,睇吓G.E.M.有咩反應。點知聰明反被聰明誤,原來整蠱嘅對象並非G.E.M.,想知幕後黑手係邊個一齊睇片

片段一開始笑波子同Sherman就同大家講解點樣整血漿整蠱G.E.M.,嘩!又真係幾真喎,Sherman仲試吓點樣咬爆粒膠囊扮吐血,真係幾可亂真!之後鏡頭一轉,笑波子同Sherman加埋G.E.M.就去咗釣蝦場,釣佢哋人生第一次蝦。兩個女仔,畀啲跳跳紮嘅蝦嚇到𠵱嘩鬼叫,網民話佢哋兩個仲生猛過啲蝦,勁搞笑!

之後Sherman三個就將釣到嘅蝦煮熟嚟食,正當G.E.M.食到忘晒形,連胸前三吋事業線盡露都唔知嘅時候,戲肉嚟喇!Sherman突然唔舒服,用手掩住嘴,仲吐血添!嚇到坐喺隔離嘅G.E.M.不知所措,係咁問點算,仲諗住打電話call救護車。笑波子見G.E.M.愈來愈驚,驚場面一發不可收拾,就自爆其實係整蠱G.E.M.。以為咁就完?當G.E.M.知道真相之後,即刻勁嬲,仲話嬲到頭痛,仲用口罩遮住攝影機,話停機唔拍住。

笑波子見G.E.M.反應咁大,即刻面都青埋,係咁say sorry,又叫G.E.M.「你打我我錯喇!」睇到呢度大家估到邊個先係目標人物未呢?無錯!真正嘅被整蠱對象其實係笑波子。G.E.M.見到笑波子個緊張樣,最後忍唔住大笑,宣布任務成功!網民大讚G.E.M.真性情又可愛!其實笑波子都有唔少粉絲,佢目前自己嘅頻道訂戶已經超過52萬,總瀏覽次數已有過億次,係香港最紅YouTuber之一。

網民有話兒

MiXXXXXi:Gem好可愛呀!俾(畀)蝦哈哈嚇親,波子(笑波子)同Sherman嘅演技好好啊啊啊☻

GoXXXXXXXn:笑死! 太機智演得好逼真!

MIXXXXXn:唔小心跌出黎個下真心好笑

DaXXXXXn:啊gem 反應好得意

yaXXXXXn:俾(畀)人玩返(番)轉頭


來源 source: http://hk.on.cc
鍾意就快D Share啦!
Related Posts Plugin for WordPress, Blogger...