2017年6月24日 星期六

娛刺撈飯:問你服未?伍詠薇W Cup最懂拆招 __,伍詠薇,

伍姑娘絕對係世界級拆彈專家。凍齡美魔女「伍姑娘」伍詠薇,前晚喺微博貼出同廣告界名人老公練海棠頭貼頭嘅sweetsweet合照,並以「相識非偶然……倒數 ...


伍姑娘絕對係世界級拆彈專家。

凍齡美魔女「伍姑娘」伍詠薇,前晚喺微博貼出同廣告界名人老公練海棠頭貼頭嘅sweet sweet合照,並以「相識非偶然……倒數結婚18周年 認識…… 18年+8個月好不容易……懂嗎?」,替兩人嚟緊7月1 日結婚18周年大日子提前放閃!

化花生為玉帛 贏盡掌聲

伍詠薇同老公能夠甜蜜迎接結婚18周年,呢種幸福,絕非必然!事關上年呢個時間,正正就係練海棠被爆密會大胸女,全港花生友等住睇伍姑娘嚎哭爆喊之時!但伍姑娘憑着出色嘅公關手腕、廣闊胸襟同堅毅嘅個性,向全港「不懂拆招的女人」,完美示範咗身為女人就算被把刀插住個心,眼淚在心裏流,都仍可以一力拆掂:「我代練海棠講聲唔好意思,佢自己玩完泥沙,要老婆出嚟執手尾!」輕易化花生為玉帛,贏盡掌聲。事關呢個時世, 眼淚唔值錢,反而堅強,先可以令男人走唔出五指山!

義字行頭 一吻解千怨

講真,伍姑娘有咩風浪未見過?月頭佢就同斷交六年嘅陳山聰「一吻解千怨」,正式復交,淨係呢份廣闊胸襟已經贏咗唔少人!想當年,陳山聰唔知發乜神經,失驚無神打畀契姐伍詠薇掟低句「你以後唔好再搵我!」伍姑娘雖然莫名其妙但都尊重對方決定,答句:「好呀!」從此冇搵山聰。事後山聰曾喺電台解釋:「嗰陣同人玩緊『真心話大冒險』,覺得佢玩得,所以打畀佢!」嘩,言下之意即係怪責伍姑娘唔玩得?伍姑娘不嬲義字行頭,一向玩開型,你叫以後唔搵,咪唔搵囉,好巴閉!不過近日見山聰連日本「偶遇」呢招都出埋,又喺社交網站留言「一吻解千怨!盡在不言中! I love you !」擁World Cup咁闊嘅胸襟的伍姑娘,當粉筆字抹晒。

嗒完人夫 斟茶認錯

真正有誠意嘅道歉係點?睇吓女中豪傑伍詠薇嘅示範!話說伍姑娘當年21歲,就嫁畀著名會計師事務所高級合夥人51歲嘅翁江培,但婚後13日,老公急性心肌梗塞猝逝,短短兩個禮拜內,經歷結婚、守寡,畀着其他人,癲咗雖然伍姑娘都有過精神幾乎崩潰、想自殺、酗酒嘅日子,但佢冇一沉不起,不過女人始終係感情嘅動物,喺呢個時間有個有婦之夫對佢噓寒問暖,結果雙方暗交四年,直到伍姑娘決定斬纜,仲約對方老婆見面,斟茶認錯,伍姑娘比相傳坦承斬斷櫻桃樹嘅華盛頓更夠薑!因為華盛頓阿爸唔會斬華盛頓,但大婆隨時打到你bra都飛甩埋,再發誓「三生三世,掘你桃花」,以洩心頭之恨!

無論練海棠、陳山聰定好似唔係好鍾意同女人玩嘅蔡一傑,都對伍姑娘有讚冇彈,事關做女人如果淨係騷在骨子裏,咁就太表面,應該好似伍詠薇咁,企喺男人前面永遠唔會獨沽一味、匿喺男人下面被男人壓住㗎!而當男人想女人配合佢哋大男人需要嘅時候,好似做港男評判睇啲靚仔咁,伍姑娘就連氧氣罩都自備,再自動波加送高潮眼,話知你只係扮高潮,總之男人最受落!做到咁樣張弛有致、一下鬆時一下緊咁,試問仲邊有男人走得出你五指山?


來源 source: http://hk.on.cc
鍾意就快D Share啦!
Related Posts Plugin for WordPress, Blogger...