掃呢頁CODE去手機

2017年7月6日 星期四

印度佬蹺起來佬 [壹週刊 - 1426 - 財經] __,M1,

近幾年,此印度船王家族頻頻出手買香港商鋪,主席ChellaramShamLokumal(右二)是家族第二代,其子ChellaramVikram(左一) ...


近幾年,此印度船王家族頻頻出手買香港商鋪,主席 Chellaram Sham Lokumal(右二)是家族第二代,其子 Chellaram Vikram(左一)任集團行政總裁,並邀得蒲祿祺(左二)任公司 Mordril地產的非執董。

中環人語

印度佬蹺起來佬

若然喺中環撞到印度人,千祈唔好同「乜乜巴基明」混為一談,佢哋分分鐘係億萬富豪。最近羅傑承個女羅雪儀( Cherry)經營嘅「來佬餐廳」,收到印度籍業主通知要收回物業重建,正四出搵鋪搬,要喺中環搵番個成二千呎地鋪都唔容易, Cherry公開招攬業主,如有合適鋪位可直接搵佢,慳番個佣嘛。

此印度籍業主來頭甚猛,是香港五十大富豪之一的 Chellaram家族,創辦人 Shri Kishinchand Chellaram,一九一六年在印度做紡織,後來到日本、西非等地開海外貿易公司,至七九年涉獵船務,公司名為 K C Maritime,單是在香港已有十艘散裝貨船,專門運送水泥及建築材料,廿年前 K C Maritime個主席 Sham L Chellaram在倫敦成立 Mordril地產,公司仲邀請蒲祿祺做非執董,投資物業遍布英國、印度及香港,「來佬餐廳」所在的威靈頓街裕榮大廈地鋪,是這印度家族四年前以四億五千萬買入。正所謂不熟不買,此印度家族寫字樓就在另一條街——雲咸街的南華大廈,到時重建後單是大廈命名權就值回票價。

K C Maritime的創辦人是 Shri Kishinchand Chellaram,現時公司以香港為總部。

羅雪儀現正四出物色鋪位經營「來佬餐廳」,也會考慮新界人口密集的地區,如元朗或將軍澳。

來佬餐廳鋪頭面積有一千六百八十呎,月租一百一十萬元,將會搬到灣仔 Red Mr.同一幢建築物內。

龍蛇混雜中遠大廈

唔少股壇玩家都以中遠大廈為「竇」,包括呢排人氣急升的細價股玩家葉志輝( Stevens Yip),另外仲有結好老細洪漢文( George Hung),以及街市偉等,經常在樓下 Gaia餐廳煲煙飲咖啡。

其實中遠大廈有地利之勢吸引股壇玩家,樓下有間舒適堡,昔日唔少金融佬到樓下做 gym,專聘私人教練,而且肯大大張單簽 program,來 impress嗰啲「四肢發達」嘅教練,目的係將啲「冧巴」唱開佢,希望個教練向其他客仔一傳十、十傳百,唔少教練以為有「貼士」,最後都「賴」嘢輸到仆直,咁咪繼續要 one more two more咯!

街市偉(右)不時在中遠大廈地下的露天餐廳煲煙飲咖啡。

不單只細價股跌到四腳朝天,中遠大廈的舒適堡也由三層縮至一層,職員不時在樓下拉客。

中環寸嘴

楊國佳

呢件雞毫無賣相,仲以為係炸豆腐。

工廈大王楊耀松長子,八十年代往北美洲開山劈石,做一帶一路先頭部隊,自比為星仔變星爺前冇人懂欣賞其無厘頭文化,廿年後終於領略當中奧妙,與粉絲分享在北美洲各路人士交手經歷,絕不老點。

仲衰過九記牛腩催落單

上期寫曼谷間銀都魚翅,座落 Siam Paragon,個商場 tenant mix走英式路線,又有文華東方餅鋪,又有 Harrods Cafe,另一個近 Park Hyatt酒店商場 Central Embassy走美式 style,有 Ralph Lauren,仲有間 Dean& Deluca咖啡店,呢間嘢東京、大阪都有,唔似得其他地方咁,吓吓被 Starbucks corner晒。人哋一個款頭都盡量有 product differentiation,香港啲商場千篇一律,永遠搵 G-2000同埋 MaBelle做膽。

喺曼谷聽個做基金經理嘅團友支笛,去試咗間亞洲五十之最嘅餐廳—— Le Du,把鬼!個地點喺街市後巷咁滯,的士佬都唔識去,我睇啲人慕名而來都係想𥄫吓靚仔廚師。都唔似 fine dining,嗰碟主菜 Free Ranch Chicken,毫無賣相,仲以為俾碟炸豆腐我,最鬼乞人憎係條侍應猛咁催落單,仲衰過九記牛腩因為催遊客落單,搞到繼而動武再鬧上差館,認真係免費宣傳,雖然我鍾意泰式 massage,但未拜四角做儀式,都唔會動武出拳,唔夠人哋泰拳玩嘅,嘻嘻。

Le Du呢間餐廳俾客睇住廚師工作,順便𥄫吓靚仔廚師。

走英式路線嘅 Siam Paragon,最有代表性係呢間 Harrods Cafe。


鍾意就快D Share啦!