探熱針
搬返曾僭建舊居 脹爆齊昕孖梁振英放狗踩嘢
去年被揭秘密入住沙田威爾斯親王醫院接受治療的梁齊昕，出院即飛倫敦散心，失踪一排因服抗抑鬱藥致身形暴脹，日前再脹兩個碼的她，就孖住過氣特首阿爸一齊放狗，卸任特首後的梁振英，冇得再住高高在上的禮賓府，結果他們一家搬返曾被揭僭建的山頂貝璐道裕熙園舊居。
現場所見，齊昕身形發福不少，圓口圓面再加一個大大肚腩，但係明顯精神唔錯，黐住阿爸亦顯得幾開心，不過，梁振英就唔好彩中伏踩到嘢，真係濕滯！
母女關係改善
梁齊昕身為前特首女兒，近年行為出位，曾經試過在 fb留言遭「家暴」，指遭阿媽梁唐青儀辱罵、掌摑、踢傷等，母女關係麻麻，但一五年萬聖節卻反過來，齊昕在中環夜蒲完，竟然上演一幕掌摑阿媽，當年令唔少市民拍爛手掌。
不過，去年底，齊昕被揭秘密入住沙田威爾斯親王醫院，當時特首梁振英和太太唐青儀，便不時探望愛女，住院兩個月，同媽咪關係反而拉近咗。今年三月，倫敦返港的齊昕，就被拍到同阿媽，在赤柱餐廳用膳又一齊放狗，兩人關係明顯有改善。
齊昕入院，去年十二月，梁振英就首度公開承認女兒情緒出問題要看醫生，亦決定為家人，放棄競逐連任特首一職，難得為港人帶來好消息。
爭啲認唔到
七月一日正式卸任特首，轉為全國政協副主席的梁振英，亦搬離禮賓府，搬返山頂舊居，這間位於山頂貝璐道 4號的獨立屋，
二○○○年梁振英以六千六百萬買入，一二年他參選特首時，就被揭發屋內有多達六處僭建，要出來公開道歉，搞到滿城風雨，未選先
𤓓爆！
七月六日傍晚九時，梁振英同吹脹兩個碼的女兒梁齊昕，加埋保鑣三人行，一齊在寓所外放狗，無見一排的齊昕，發福到腰間多埋士啤呔，同之前個樣有明顯分別，雖然肥咗但睇落精神不錯，有老豆陪住似乎幾開心，不過行行吓，梁振英卻唔知踩到咩！突然查看鞋底兼手指指，但四周環境昏暗，只見齊昕亦探頭幫眼望一望，之後繼續散步，三人放完狗就返入寓所。
「齊昕好鍾意狗，一得閒就會陪狗狗玩，依家間屋無禮賓府咁大，無咗個大花園，所以都成日會去寓所外邊放狗，除咗前特首阿爸，阿媽同細妹都成日陪佢！」知情者說。
因為患病，齊昕服藥後身形暴脹，去年八月去紅館看城城演唱會，就因為體重劇增，穿高跟鞋一時失平衡，落車行唔夠十步就仆低，搞到膝頭受傷，要工作人員扶去前門塗藥治療。
「齊昕因為貪靚，出親街都著高踭鞋，對對鞋都最少四、五吋高，好容易就失平衡，佢都唔只一次仆親！對腳好多瘀傷！」
舉動驚人
年僅 25歲，向來我行我素的梁齊昕，經常上演大龍鳳，反叛行為鑊鑊新鮮，一直是傳媒焦點。
自薦做 model
有鋪恨做明星癮的齊昕，瞞住父母發電郵到多間模特兒公司自薦做 model，更附上多張拋胸性感及比堅尼相，事件被揭後，齊昕死口唔認。
自爆被母虐打
15年，又於 fb連貼數文，指被龍蝦媽推埋牆、掌摑，兼爆粗鬧死蠢，家暴升級，齊昕頂唔順，決定要離家出走，一度在禮賓府露台落寞閒逛，引來大批傳媒。
撰文、攝影、攝錄：娛樂組
|
鍾意就快D Share啦！
|
|
|
