2017年7月27日 星期四

腦退化父親失蹤六日 黃又南:好擔心有日佢唔記得我 [壹週刊 - 1429] __,又南,黃又南,M1,

娛頭腦退化父親失蹤六日 黃又南:好擔心有日佢唔記得我今年三十三歲,入行十六年,Shine黃又南○三年開始,為生意失敗父親黃文藻孭債七百萬,試過日捱夜捱 ...


娛頭

腦退化父親失蹤六日 黃又南:好擔心有日佢唔記得我

今年三十三歲,入行十六年, Shine黃又南○三年開始,為生意失敗父親黃文藻孭債七百萬,試過日捱夜捱辛苦到入醫院,甚至在首映禮暈低,賭債未清,有指受打擊黃父又突然沉迷賭博,要又南跪地哭求才收手,還債六年才告甩身。

不過黃父近年患上腦退化,年多前試過失蹤的他,今個月十二號離家後又再失蹤六日,又南報警求助外,更要舉家出動尋父。

上週一(十七日)黃父在紅磡暢行道被尋回,孝順仔又南雖然鬆一口氣,但坦言有隱憂:「我好擔心佢有日唔記得我。」

專人照顧

今個月十二號,大部分黃又南身邊友人都接到他的 WhatsApp短訊,呼籲大家幫手尋父,原來現年六十三歲的黃父,近年患腦退化,當日趁老婆外出獨自離家,由於年多前試過迷路不懂返屋企,在舊日工作的鰂魚涌船塢里徘徊,又南一家今次曾到過上址尋父,不過並冇發現,又南於是報警求助,更即時搵親友幫忙留意。

失蹤六日,警方翻查其八達通紀錄,發現他曾先後搭港鐵到過曾居住的太古城、杏花邨,之後過九龍到美孚,再到鑽石山,直至本月十七日,流落街頭的父親黃文藻在紅磡暢行道尋回,雖然未有受傷,不過一家人已經十分擔心。週一(二十四日)下午,黃又南孖長髮女友離開寓所往停車場取車,對於父親早前下落不明六日,為免再度走失,他說已經請了專人照顧。

報警尋回

警方透過八達通,得知黃文藻先後坐地鐵到過舊居太古城等地,之後杳無音信。

走失兩次

黃又南跟家人住在將軍澳區,報警外,又在網上平台「將軍澳主場」呼籲同區居民幫手尋人。

父親黃文藻

又南上年 10月跟父母出席胞姐婚禮,一家人在沖繩開心合照。

又南週一孖女友離開屋企接受訪問,揸的是朋友借給他暫用的棍波凌志辣跑。

醫生跟進

「公司所有朋友都有幫手搵,亦好多謝香港警察,好快搵到。我一直同爸爸、媽咪一齊住,就係想多啲時間陪佢,同爸爸經歷咗好多嘢,今次媽咪亦好堅強,一家人一條心。我話唔擔心就假嘅,見番爸爸嗰一刻好感動,今次件事,令自己有醒覺,之前 plan好晒要訂 GPS(位置追蹤),但未到手已經發生呢件事,原來有好多嘢唔係發生咗先去面對,要早啲解決。好彩爸爸冇受傷。」黃又南說。

黃又南指父親近年開始患腦退化,一直有醫生跟進及服藥,他說:「因為年紀老,等於副偈行得耐都會壞,最緊要身體健康。(驚唔驚老竇會唔記得屋企人?)做仔女一定會擔心,有一日佢唔記得我,好彩佢依家仲記得邊個係媽咪,邊個係家姐。」

走數幾百萬

黃又南跟父親感情要好,入行未幾,開印刷廠的黃父生意失敗欠落周身債,為不想影響事業剛起步的又南,家人未有即時向他坦白經濟狀況,直至○三年沙士,黃父被走數幾百萬,他得悉後簽名做擔保人,父債子還。

代父還債 700萬捱到暈低

11年 12月,又南在北京出席首映禮,日捱夜捱的他,終於不支暈倒,要同事孭離場返後台休息。

又南揸了十幾年的 Audi舊車,今年他終於有錢換寶馬。

Shine合體明年 3月在紅館開騷,二人早前拍廣告開始谷宣傳。

演唱會喊爆

一二年跨年演唱會, Shine重組開紅館個唱,捱盡苦頭的又南三度喊爆講述借貸的艱苦日子。

他透露為要還父債七百萬,曾經每月得千多元可用,試過問圈中人借錢,又窮得厚着面皮叫朋友請食杯麵,生活就只有工作。一一年,他在北京出席電影《 2012來了》首映禮時,就因為休息不夠引致哮喘病發,在台上不支暈倒的他,要工作人員孭離場。

捱了多年的又南身體向來孱弱,但為在演唱會晒肌,他不得不勤力狂操。

Shine翻生,早前為同期出道的 Twins做演唱會嘉賓。

12年 Shine合體開紅館個唱,二人狀態 fit爆。

12年 Shine合體開騷,就連已解散的 Cookies也重組幫拖,可見二人在圈中好有人緣。

由陳果一手發掘,他拍了《香港有個荷里活》,翌年組成 Shine入樂壇。

跟陳果再合作網絡小說改編的《那夜凌晨我坐上了旺角開往大埔的紅 Van》,孭重飛的又南被指演技大進。

跟吳千語合作的《王家欣》,又南首次獲電影獎,奪美國加州獨立電影節「最傑出男演員」。

又南積極搵銀大小通吃,去年接拍大台劇《殭》,做男二角色增加知名度。

拍檔徐天佑 15年結婚,還晒債的又南指自己要積極儲錢,未有成家打算。

跪地求收手

有段日子,有指黃父不堪生意失敗打擊,一度沉迷賭博,他跪地喊住求父親收手:「佢還晒財仔嗰一筆大數,仲有借落親戚嘅要還,不過辛苦咗咁多年,近年終於還清。佢搏命搵錢,幾年前同朋友夾份開檔賣生果,近排又換咗車,唔再揸嗰架陳年 Audi,換咗一架寶馬。」知情者說。

父親是推動力

為父親付出多年,經歷起跌的又南一直抱積極態度,他說過:「我從來冇怪過爸爸,佢唔係我嘅負累,係我永遠偶像同動力。」

誠如入紙紅館六次才成功獲批,於明年三月開四面台個唱,曾經以為 Shine在○七年拆夥後已經「死咗」的他,近日跟拍檔徐天佑開始操肌,他說:「觀眾買飛支持,點都要有睇頭,我最希望練到二○○六年咁大隻,四十一吋胸、十三吋手臂同八塊腹肌。」

Shine 2001年出道,有的是青春活力,二人會在沙灘踢西瓜影相接受訪問。

為賺錢養家,近年經常返內地拍劇的又南,其實留在香港的時間不多。

冇工開,慳家的他最鍾意在朋友的車房打躉,吹水幾粒鐘才回家。

還債多年,又南都鮮有 po家人合照,近年經濟穩定,心情輕鬆的他才間唔中開心 share。

15年,又南還晒債後,跟金剛、喬寶寶合作搞了「三兄弟果欄」,他經常在 Facebook賣廣告。

陳曉東樊少皇雪中送炭

由於要代父還債,黃又南曾經每月只得千多元生活費,試過慘到問朋友:「可唔可以請我食碗即食麵頂肚?」

他坦言曾問圈中人借錢:「問過六、七個好熟嘅藝人朋友借錢,當中只有陳曉東同樊少皇肯借俾我,借咗唔夠一萬,佢哋仲問我有乜要幫手,但我冇問過幕後人或唔熟嘅人借錢。」他感激二人雪中送炭,之前已分期還清款項。

戀杜如風 陪大陸栢芝

多年來為父還債,黃又南一直錢銀不鬆動,但卻無阻他女友一個接一個。除杜如風和似足栢芝的內地演員朱聖禕之外,他的女友以圈外人為主。 07年陳奕迅與徐濠縈撮合他和杜如風,可惜拍拖不夠一年便告終。

14年又南跟空姐女友分手後,曾表示以事業為重,但話口未完就撻着翻版梁靖琪。今年初他被拍到跟朱聖禕孖住逛名店,高度戒備的又南刻意戴上口罩,但女方購物時從後攬實他,又將下巴放在他的膊頭,相當煙韌。之後遇到記者即分頭走,非常避忌。

杜如風

朱聖禕

翻版梁靖琪

Shine明年紅館合體

原名黃德謙的黃又南,自言初出道上位快,之後試過低潮,所以要把握工作機會。事實上,他的演藝事業一波幾折, 01年, 17歲的他被導演陳果發掘,拍電影《香港有個荷里活》入行,同期與徐天佑合組 Shine,簽約 EMI旗下。翌年 Shine橫掃各大傳媒的新人金獎,但至 04年, EMI取消中文部, Shine轉戰台灣,可惜沒做出成績。 05年回港簽約華納,無法收復失地,發展平平,至 07年他與天佑決定分道揚鑣。又南專攻影視,中港兩邊走,至今拍了四十多部電影。

12年, Shine為黃偉文的作品展合體再踏紅館,人氣反彈,同年在九展和紅館再開兩次騷,並推出新專輯,但之後二人繼續獨立發展。

為搵錢,前年他與金剛、喬寶寶等在果欄開檔做生果批發,連大閘蟹都賣埋。同年更憑《王家欣》,奪得美國加洲獨立電影節傑出男主角獎。明年 3月 Shine會在紅館合體開騷,孖住有錢途。

撰文、攝影、攝錄:娛樂組


鍾意就快D Share啦!
Related Posts Plugin for WordPress, Blogger...