網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2017年7月27日 星期四

學友懷柔政策 教女 17歲瑤華透視 bra top行中環 [壹週刊 - 1429] __,學友,張學友,M1,

屬骨感型的Zoe,穿起透視背心加bratop,顯得分外纖瘦。探熱針學友懷柔政策 教女17歲瑤華透視bratop行中環歌神張學友有女(張瑤華Zoe)初長 ...


屬骨感型的 Zoe,穿起透視背心加 bra top,顯得分外纖瘦。

探熱針

學友懷柔政策 教女 17歲瑤華透視 bra top行中環

歌神張學友有女(張瑤華 Zoe)初長成,早前 17歲的 Zoe與在社交網站自稱已婚的金髮 Mathis Ekkebus親熱攬照流出,加上留言互講 I love you,被指情竇初開搭上人夫,搞到歌神要主動為囡囡解畫。

開心「些牙」失驚無神變新聞熱話, Zoe心情冇影響,勢係假!這天下午 4時她坐住學友的七人車現身中環,悶悶不樂行 Adidas,目標明確專𥄫龍船般大的男裝鞋;買俾新歡,還是氹歌神 daddy一笑,只有 Zoe先知道!

睇男裝鞋

學友的大女張瑤華秉承了阿媽 May May(羅美薇)的纖瘦體形,驟眼望有幾分似成為人妻的舒淇, Zoe化行妝加埋一身 bra top襯透視背心上陣,十七歲女已經打扮得好性感,在人海茫茫的中環街頭分外搶眼,遺傳晒父母的星味。當日 Zoe目標明確行入 Adidas,走上二樓的女裝部,全程扁扁嘴左揭右撥都冇心水,便往下層睇波鞋,睇跑步的又睇出街著的,一律都是男裝,拎上手的全是龍船般大的尺碼,未知是想送俾心儀的男仔,還是搏歌神 daddy一笑?在鋪頭逗留十分鐘, Zoe篤住電話走人,經歷過攬照流出, Zoe分外警惕,不時四圍張望,然後便直上新世紀大廈。

Zoe同 Mathis的親密攬相流出,引起一陣騷動。

Zoe集中睇大碼男裝波鞋,唔通想送學友一份禮物?

Zoe單拖 shopping,全程扁嘴,悶悶不樂。

自小讀國際學校, Zoe分外熱情,與同學合照總會攬頭攬頸。

Zoe三點式示人,與同一班同學仔出海耍樂。

Zoe離開德瑞舊校多年,但定期同舊同學敍舊。

主動解畫

平日少有將女兒掛在口邊的學友,由內地返港後,主動提起並為女兒解畫。

這些年學友刻意將兩個女收埋,無非想她們可以過正常人的生活。隨着囡囡步入青春期,有自己生活圈子, Zoe毫不掩飾以真名真樣於社交網站上載近況,間接令自己同金髮 Mathis Ekkebus的攬到實合照流出,加上男方留言「 I love u so much」, Zoe又回話:「 I love u more」,令外間誤會她情竇初開,最複雜的是 Mathis於 Fb自稱已婚,搞到 Zoe無啦啦變第三者。

迫使學友於內地開完演唱會返港時,不得不主動代囡囡解畫澄清,指男方是 model又是設計師,是國際學校界的名人,對方只得十七、八歲,話自己已婚純粹是開玩笑。學友坦言自己未見過囡囡這張照片,但對 Zoe留言「 I love u more」,歌神淡言話:「其實自己平時都係咁同個女講,呢個係佢哋文化上面,好似講 bye bye咁,對於我嚟講,就冇咩特別!」

唔會偷睇電話

女大女世界,學友明白高壓嚴管,只會令囡囡變反叛,雙方關係變差,惟有做朋友先可以拉近大家距離。早年學友已在訪問透露,嚴控自己不偷睇 Zoe電話,不干涉社交生活,他更講明不會阻止她拍拖:「我會勸佢或者叫佢帶男朋友返嚟見,起碼知道佢同咩人一齊。」

Zoe自幼在國際學校讀書,又試過留學英國,鬼妹仔的熱情性格自然少不免,除了同 Mathis分外肉緊,查實與同學合照,大部分都是攬頭攬頸,兩父女最相似的地方就是重感情,即使離開德瑞國際學校多時, Zoe每年都會抽空同一班過氣同學聚會,當中不乏男同學,尚有一年, Zoe便高中畢業,要是她選擇出國留學,屆時歌神又要做空中飛人,有排忙!

13年學友親自陪 Zoe飛英國升學。

學友自小管接管送,同瑤華感情要好。

學友表示自己全力做好人與女兒成為朋友,至於 May May則充當嚴母角色,嚴厲執行屋企定下的規矩。

廿四孝老豆

出名顧家的張學友,錫兩個寶貝女(瑤華、瑤萱)錫到燶,為免女兒曝光,經常緊張大師上身,跟到實。

大罵記者

05年,工作完畢早機返港的學友,趕去瑤華位於半山的德瑞國際學校接放學,學友於校門外見到記者,即一反以往友善形象,衝向記者破口大罵:「你做咩影我個女?有咩好影?」記者更被學友逼到校巴旁,為防女兒容貌曝光。

旅行前後腳

09年,一家四口去日本旅遊,返到香港,為避耳目,小心翼翼的學友為兩女戴上口罩,請印傭帶她們先行過關離開,兩公婆留下等行李,其間學友更擁吻瑤華額頭安撫。

送英國開學

13年,學友送大女張瑤華到英國讀寄宿學校,學習獨立生活,即使電影《赤道》開工在即,學友依然不辭勞苦,親自送女到倫敦開學,為與女兒方便溝通,更不惜改用智能電話,開 Facebook,學用 WhatsApp。

撰文:娛樂組

攝影:余一駱


鍾意就快D Share啦!