網頁

掃呢頁CODE去手機
請LIKE FACEBOOK“新專頁”THANKS!
鍾意我? D 熱爆文章嗎?
即刻“讚”接收更多熱爆?!
唔要再顯示

2017年7月17日 星期一

【最欣賞李家鼎】初登場遇上壞爐 方太靠口述捱過直播7分鐘 __,李家鼎,

方太(任利莎)成名喺麗的時代,先後喺過《午間小叙》、《下午茶》同《方太生活廣場》等午間節目教煮餸,當時喺超群廚藝中心任教嘅方太,因為幫老闆頂替贊助嘅直 ...


方太(任利莎)成名喺麗的時代,先後喺過《午間小叙》、《下午茶》同《方太生活廣場》等午間節目教煮餸,當時喺超群廚藝中心任教嘅方太,因為幫老闆頂替贊助嘅直播電視節目,誤打誤撞成為烹飪節目主持,情況就好似港姐冠軍陪人去面試,最後贏埋冠軍一樣。當時好多曾超羣旗下嘅教師去完麗的嘅節目都投訴,話未整完個菜就俾人cut咗,最後曾超群搵方太出馬,當時都仲算係新人一名嘅方太都有啲驚:「班同事其實想害人『叫佢去啦』,咁老闆叫到都要去,冇辦法。」估唔到第一日出街就蝦碌,直播出街嘅節目冇得停,方太諗番起當時情況都覺好笑:「第一次上電視台你知唔知幾大鑊?撻唔着火呀,出緊街㗎。有試過,原來係最後一啖氣。撻唔着火個人茅晒,直播出緊街未夠鐘。惟有喺個節目講『真係唔好彩,今日係我第一次上電視,我準備好充足,但係點知個爐有問題。你哋睇烹飪節目多嘞,從來都冇睇過人用口講,我哋大家一齊用口教煮餸。』咁就捱咗7分鐘,返到公司俾老闆鬧到死,好在當時佢位心腹老工人在場,證明我真係試過個爐。」再做多一排,有一日麗的有個監製搵方太:「個監製叫周偉才,後來做咗港台台長,佢話想搵我主持個烹飪節目。佢要我一星期做5日,叫我開價。嗰時幫超群上節目,每次120蚊,咁我開200一個show,蠢到死,唔識開價,佢一口應承咗,就咁做到1999年,做咗20幾年。」人工一路加,到臨離開易手後嘅亞視,當時人工已經翻幾十翻,不過方太只係笑笑口唔肯講幾錢:「啲人話當時我同董驃,係亞視最高人工。」而當時董驃已經收緊10,000蚊出一集賽馬節目,方太應該都差唔多。一個月計20集烹飪主持,條數都好襟計。原來當初搵方太,係想佢教整鮑參翅肚,點知方太話:「我話如果教呢啲我唔做,我想教啲易整好食,又有營養,最後佢哋都同意。」方太之後問番監製點解咁多導師淨係搵佢,原來個監製話覺得方太教人煮餸認真之外,好多人都會留一手,但方太就真心想電視機前嘅觀眾學識:「冇保留咁教晒畀人,咁我真係想人識煮,點解要收埋啫?」高峰期方太除咗香港一星期5日出鏡,仲要主持新加坡一個飲食節目同一本雙周刊,每個月大大話要諗100個餸,所以每次外出食飯、出埠見到特色菜都會記低,試過鬧過一次笑話:「有次我將食譜寫咗係疊紙巾放係手袋,喺飛機去洗手間,唔小心用咗……成個行程寫嘅菜就咁冇咗。」問到方太出街食飯有冇着數?佢笑笑口話:「冇㗎,唔可以唔收錢,我亦唔會接受。如果人哋送咩送咩畀你,我咪貼士畀番相應嘅錢,唔可以攞着數。」佢話有時啲老闆會過嚟打招呼。講到近年「廚神」湧現,佢話冇乜留意,不過最欣賞就係李家鼎:「行家一睇就知得唔得,鼎爺真係叻嘅,有機會都想見吓佢,佢除咗刀功,煮同講嘅嘢都好有根據。」至於其他廚師,方太就話因為唔識,所以唔講。同丈夫維持咗33年嘅婚姻,最自豪嘅除咗事業就係湊大咗2仔3女,大女珍妮仲曾經係麗的力捧花旦,之後息影嫁咗畀法國大使,跟老公周圍飛,目前係北京定居;二女遺傳咗阿公同老竇從軍嘅事業,自細志願就係做警察,加入警隊,離職前任職機動部隊指揮官。因為掃黃工作出色,有「殺雞警司」稱號,老公亦係退休警司。

方太教煮餸,毫無保留,因為佢真係想多啲人識。(受訪者提供圖片) 原本電視台希望方太教煮鮑參翅肚,但方太卻想教巾營養嘅餸菜。(受訪者提供圖片)
方太除咗喺香港教煮餸,曾經同一時間喺新加坡都有節目,仲有雜誌要兼顧。(受訪者提供圖片) 方太話會趁外遊時,記得特色食物,mark低食譜。(攝影:周樂恒)

來源 source: http://s.nextmedia.com
鍾意就快D Share啦!