百變天后梅艷芳離開咗大家已13年，今年10月10日，是梅姐54歲忌辰，梅媽覃美金本擬於這天，為亡女成立梅艷芳國際紀念館悼念。讀者陳先生向《蘋果》爆料，指梅媽同兒子梅啟明以「梅艷芳國際紀念館有限公司」名義，租用銅鑼灣海灣大廈某單位開紀念館，但業主簽臨時租約後反悔，甚至唔想畀違約金，而呢位業主亦係名人，就係建制派議員兼律師謝偉俊及其妻白韻琹。陳先生接受電話訪問稱：「單位係謝偉俊嘅公司持有，白姐姐代表簽咗臨時租約，夜晚就話成份嘢唔見咗，要梅媽再開支票，攞上謝偉俊律師樓。點知隔兩日，謝偉俊話唔想出租。正常撻訂要賠一個月，但佢退票就算，唔肯賠償。」消息指，臨時租約上訂明用作梅艷芳國際紀念館，每月租金44,000元，簽兩年租約，換言之，理論上如業主反悔，應賠一個月租金給梅媽。《蘋果》分別致電向梅媽、白姐姐同謝偉俊了解，結果三方各有各說，出現三個唔同版本。租客一方嘅梅媽勞氣炮轟：「佢突然間唔肯租喎，正衰人！啲歌迷去睇過晒，個個都話得。」問到業主係咪白姐姐同謝偉俊？梅媽反問：「你又知？」接着大罵：「咁衰格！喂！你撻訂都要畀番訂我嘛，佢就咁畀番張票我就算，佢係要我咁樣收，佢話如果我唔收，就告佢喎！邊有咁無賴㗎！」問到係邊個同佢講？梅媽開名狠批：「謝偉俊呀，佢恃住佢係律師，佢話乜嘢，我唔收張票就告佢啦。」咁會唔會採取法律行動追究？梅媽表示：「同歌迷一齊商量吓先，睇吓佢點解咁無賴，我又唔係要求你多，你唔租畀我，梗要畀番（一個月賠償）我。但佢畀張白票我，話冇入到，成十日先畀番我話唔入。」問到雙方係咪簽咗臨時租約？梅媽話：「簽咗。」係咪白姐姐代表業主簽呢？梅媽承認：「係呀。」那何以之後反悔？有冇解釋？梅媽說：「唓，佢話喎，一來話業主立案法團唔畀，我話嗰度商住兩用，何況我租嗰度仲係一樓㖭，係咪？你講業主立案法團就唔通嘅，後來就話唔係幾方便，我有知名度，佢又有知名度，嘩，有乜嘢知名度啫，租地方啫嘛，乜嘢知名度呀，驚人追吖？佢話費事見記者，嘩！有乜記者又點呀！」o依家搞成咁，梅媽係咪好嬲？佢話：「梗係啦，通知晒啲人十月有得聚會，租到地方個個都好歡喜，可以聚埋一齊坐，唔使成日話飲茶先見。我都話阿梅冇嘢剩落畀我，剩番啲歌迷畀我。我唔想佢哋咁散，有個地方坐埋一齊，有會址有電話，我心願就係咁。」至於白姐姐同謝偉俊嘅講法，詳見另文。
|
鍾意就快D Share啦！
|
|
|
