掃呢頁CODE去手機

2017年7月22日 星期六

懶理老竇身家縮水 翠如BB絕世慳妹七日都唔洗頭 __,翠如,黃翠如,

懶理老竇身家縮水翠如BB絕世慳妹七日都唔洗頭黃翠如最近因為「翠如BB股」暴瀉,又再一次登上財經版!「翠如BB股」當然唔係指翠如BB個patpat,而係 ...


懶理老竇身家縮水 翠如BB絕世慳妹七日都唔洗頭

黃翠如最近因為「翠如BB股」暴瀉,又再一次登上財經版!「翠如BB股」當然唔係指翠如BB個pat pat,而係指黃翠如父親旗下嘅聯旺集團,呢隻奇股由舊年4月以配售價0.26元上市,炒到26元高位,但今個月頭,突然暴跌返落去4、5毫子,嗰種高山低谷式嘅瀉法,就好似旺角朗豪坊通天扶手電梯意外咁,愈後期入嗰啲,愈被責死晒!

「共享家姐」……啲衫

有冇人可以喺0.26元爆上26元,呢條足足百倍利錢嘅通天扶手電梯中全身而退?有,嗰個就係黃翠如!事關佢由第一日已經利申:「假如你問我這個瘋狂炒賣,我有沒有一毫子進帳,我答你,一毫子也沒有。」唔好以為翠如咁清高,視錢財如糞土,相反,佢係慳錢如命!就係因為慳錢怕輸,佢至唔敢入市,要做到翠如咁有定力真係唔容易,記得黃子華話曾經睇過有本書,以「沒有人比他更窮」嚟形容大畫家梵高,我Nuts哥就會形容同樣鍾意繪畫嘅黃翠如係「沒有人比她更慳」!

翠如父親由賣魚窮爸爸變身上市公司富爸爸,連帶翠如都身價飆升,被封「82億千金」,咁一定會有人問:咁富有,使乜慳呀?錯!就係愈富有先愈要慳,乜你唔知超級富豪都係戴日本錶咋,去波地踢波嘅地盤工友至戴「地通拿」!

翠如屋企話晒窮過、捱過,呢啲情況若然一旦富貴,唔係變暴發戶,就係比慳更慳!難得翠如一家就係後者典範,住過居屋嘅黃家七口,即使依家變得有錢有家底,都冇話要即刻搬去天價獨立屋,反而滿足於住喺馬鞍山私人屋苑,翠如嘅慳更加係入骨入血,被人發現佢喺尖沙咀買80元一條平民價頸巾,又連續兩日着同一件贊助商外套,同一條平民牛仔褲,比拍劇更加注重「連戲衫」!翠如仲會同家姐及三個妹輪流交換衫着,即係佢買一套衫,就已經日日都唔同衫o架喇,依家嗰啲乜鬼共享單車,都係脫胎自翠如屋企「共享家姐」呢個concept咋!

蕭正楠執到寶

咁都未算,翠如雖然話晒都係靚女,但做得慳妹,就豁咗出去!由細到大受黃媽媽薰陶嘅佢,原來「唔習慣洗頭」!翠如話最高紀錄試過七日唔洗頭,會唔會唔衞生?佢話:「頭油出出吓就唔出」權威過消委會今年4月發表嗰份超市洗頭水價格加幅勁嘅調查,事關世事就如頭油同超市,翠如晨早看透加埋出街食飯連餸汁都要打包,為慳的士錢而索性留喺無綫瞓覺,仲有平日擸擸埋埋贊助商用品,山大斬埋有柴!

難怪翠如男友蕭正楠當佢寶咁錫,因為要搵個識搵錢又唔鍾意使錢,屋企又有錢嘅女友,就好似連中三期六合彩咁難!所以蕭正楠都好珍惜,以往畀人感覺大花筒嘅佢,實行轉晒性,效法女友慳錢作風,以街坊裝踢拖去超市入平貨,贏得翠如公開讚慳家,前面可謂一條直路,大把好世界!唔理佢有冇二趾長過公,已經肯定唔使一世窮

Nuts哥


鍾意就快D Share啦!