無綫喺15年4月喺深夜時份播映神劇《大時代》，掀起一輪煲劇熱潮，搞到嗰段時間嘅收視上升，自此之後無綫安排咗唔少經典劇喺呢個時段播出，一連播映三輯嘅《妙手仁心》喺噚晚播映完大結局之後，依家重播嘅係1998年嘅《天地豪情》。呢套劇當年搵咗黃日華、羅嘉良、張家輝、蔡少芬等主演，嗰陣除咗收視成績好好，每集差唔多超過200萬觀眾收睇之外，羅嘉良飾演嘅大頭文，與及張家輝飾演奸到出汁嘅甘量宏，唔單止令觀眾又愛又恨，仲令佢哋喺台慶頒獎禮攞獎，羅嘉良成為視帝，張家輝亦得到戲劇組螢幕大躍進獎。查實呢套劇曾經喺03年2月同10年5月喺無綫重播，連埋今次在內，呢套劇已經第三次重播。羅嘉良喺出場嗰陣，講佢係一個終日游手好閒嘅賭仔，唔單止輸咗姑媽留俾低加拿大嘅餐館，甚至連飾演佢女友Apple嘅姚瑩瑩老竇嗰間餐館輸埋，於是撈家返香港問老竇胡楓借錢！郭藹明受胡楓所托去咗機場接機，撈家一落機即刻問郭藹明借錢賭馬，借輸咗八嚿水，當然有借冇回頭。雖然之後撈家去咗郭藹明間廠打工，點知佢知道郭藹明諗住搵細佬陳錦鴻去銀行幫佢入八萬八，呢筆錢原來係佢死慳死抵諗住用嚟買樓同男友李成昌結婚，撈家借啲意拎咗去賭錢，結果令陳錦鴻俾雪妮趕咗出門口，仲差啲令郭藹明結唔成婚！同郭藹明變咗做冤家嘅撈家，佢哋嘅八字認真唔夾，雖然佢最後喺細佬林曉峰嘅幫助下，還咗啲錢俾郭藹明，但係點知喺郭藹明同李成昌擺酒嗰晚，李成昌嘅老竇打牌贏咗舖十三么，興奮過度，心臟病猝死，一夜之間由紅事變白事，搞到佢哋覺得郭藹明係不詳人，之後撈家又撞破李成昌原來出便有第二個女人，結果佢同郭藹明關係變僵。呢三集除咗講撈頭同郭藹明之間鬥法，撈家同修哥嘅父子情，亦令人感動。劇情講陳錦鴻食死貓、俾阿媽雪妮以為佢學人賭錢輸咗家姐嗰八萬八，怒摑之餘將之逐出家門。修哥內疚，硬著頭皮向友人借錢，但大家食飽飽之後一聽到修哥想借錢就雞咁腳走，撈家目睹父親失落的背影，令人鼻酸。最後筆錢當然解決到，點知撈家仲唔知死，拎筆錢過大海想「翻身」，修哥及時趕到碼頭截住，二字箝羊馬將撈家按在地上，仲當眾除埋佢條褲……最後撈家舉手投降。當年呢套劇嘅幕前陣容好強勁，幕後亦都唔可以忽視，戚其義係監製，編審由周旭明、鮑偉聰、麥志誠擔任，陳維冠、林志華當年亦為呢套劇編導，0依家個個都有好好嘅發展！
| 撈嘉當年憑大頭文嘅角色，成為咗視帝。(電視截圖) | | |
| | | |
| | | |
| | | |
| | | |
| | | |
| | | |
| | | |
| | | |
| | | |
| | |
|
鍾意就快D Share啦！
|
|
|