2017年7月2日 星期日

【獨家】梁家輝點煙孖細女共享 拖老婆慢行赤柱市集 __,家輝,梁家輝,張家輝,

貴為影帝級人馬嘅59歲梁家輝,雖然從影以嚟同過唔少樣靚身材正嘅女星合作,不過鮮有傳出緋聞,同老婆江嘉年結婚30年,一直都keep住咁恩愛,經常都見到佢 ...


貴為影帝級人馬嘅59歲梁家輝,雖然從影以嚟同過唔少樣靚身材正嘅女星合作,不過鮮有傳出緋聞,同老婆江嘉年結婚30年,一直都keep住咁恩愛,經常都見到佢哋十指緊扣咁拍拖行街街,梁家輝接受訪問嗰陣曾經講過,太太係世上最好嘅女人,係因為太太嘅好而激發咗佢嘅好,所以今生一定令佢哋母女成為世界上最幸福嘅人!遲啲梁家輝將會為中國電影版嘅《深夜食堂》擔任導演兼男主角,到時佢就會有排忙,所以喺開工前夕,梗係要爭取時間陪太太。前日大約喺下晝1點30左右,《蘋果》喺赤柱見到梁家輝同老婆江嘉年,仲有細孖Chloe,一行三人喺露天餐廳食lunch,嗰陣佢哋好悠閒咁邊食邊傾,食食吓Chloe行咗去室外近住海邊自拍,自娛咗一輪之後,Chloe行返去個位,仲將啲自拍相俾爹哋梁家輝欣賞!食多大約半個鐘,梁家輝同餐廳職員要求調位,原來佢哋食飽飯之後,諗住坐出去露天位置嘆番支事後煙!梁家輝同一對孖女嘅關係,可以話係情人又可以話係知己,到咗0依家都會拖住手去行街,又或者頭貼頭影合照擺上網。唔知係咪因為呢個原因,所以梁家輝同太太點完煙之後,佢好順手將支煙遞咗俾Chloe,Chloe吸咗2啖之後,又將支煙遞返俾爹哋!佢哋三個叉足電之後,本來Chloe諗住一盡孝心請父母食飯,點知發覺唔夠錢,最後三個哈哈大笑一輪,再一齊喺銀包拎錢出嚟埋單!離開餐廳之後,三人走咗去近海邊位置玩自拍,今次負責揸機嘅係梁家輝,不過似乎佢唔係好明白角度嘅重要,影影吓Chloe覺得唔係好對路,於是乎走去教爹哋點樣拎機先啱。影咗一輪後,佢哋向市集方面出發,梁家輝拖住老婆行,Chloe喺後面跟住,行到咁上下江嘉年睇中啲沙龍裙,梁家輝陪埋一齊入舖頭幫吓手俾意見,揀咗一輪之後,太太買咗心頭好之後,一齊行去停車場拎車走人。

採訪、攝影:徐錦池、畢紹基 食飽飯轉個位食支煙。 梁家輝點完支煙之後俾咗個女。
本來Chloe諗俾請爹哋媽咪食飯,點知最後好似冇撳錢。 Chloe教老竇角度嘅重要性。 梁家輝拖住老婆行街睇衫。
梁家輝有幫手俾意見。
買完衫之後攞車走人。 Chloe將老竇揸機嘅相放咗上ig。

來源 source: http://s.nextmedia.com
鍾意就快D Share啦!
Related Posts Plugin for WordPress, Blogger...