2017年7月31日 星期一

娛樂專題:捱負評日日喊!蔡思貝誓爭氣 __,蔡思貝,

出道日子不長,Sisley多次獲得第一女主角嘅機會。由港姐入行至今,蔡思貝一直飽受負評,然而自小愛跑步的她將事業比喻為長跑比賽,表明要爭番口氣:「我都 ...


出道日子不長,Sisley多次獲得第一女主角嘅機會。

由港姐入行至今,蔡思貝一直飽受負評,然而自小愛跑步的她將事業比喻為長跑比賽,表明要爭番口氣:「我都畀人鬧咗咁耐都要爭氣!」被封「發電機」的她又搞笑伸冤指身邊都有同性閨蜜,一班姊妹更是其心靈雞湯:「我冇咗呢班閨蜜,條路就好難行!」

2013年勇奪港姐亞軍入行,蔡思貝(Sisley)出道日子不算長但屢次獲安排擔正劇集第一女主角,成為無綫力捧的花旦之一。備受注目的她不時被指演技未精,聲線吵耳,更一直緋聞纏身,被封為新一代「發電機」。面對種種負評,Sisley直言最初匿埋屋企狂喊,覺得「天塌下來」:「剛入行時我覺得好似天塌落嚟:『哎呀!好辛苦,又話我呀?我又澄清唔到,又全部都係負面。』我當時成日喊,喺屋企以淚洗面。(家人擔心?)唔會畀佢哋睇到,會自己匿埋喊。」

事業當長跑 學識避忌

痛定思痛過後,自幼是長跑好手的Sisley決定將事業比喻為一場長跑,渴望「爭番口氣」!她說:「細個長跑訓練影響我好多,長跑真係少啲堅持都唔得。(將工作比喻為長跑?)絕對係!事業唔係幾年就睇到結果嘅嘢,過程有上山落山,跑障礙賽會拗柴,我咪一路跑囉!我都畀人鬧咗咁耐,都要爭氣。」

Sisley自言對負評纏身亦有責任,日後會小心避忌:「依家慢慢地接受,又有前輩同朋友開解。同埋點解會引到咁多負面新聞,其實自己都有責任,就係冇避忌嘛!依家學識多啲。(多咗避忌?)絕對有,慢慢學習適應。(唔想再同工作拍檔傳緋聞?)我覺得傳一、兩次,證明大家有留意套劇,但如果寫到我好似搶人男友就好無奈。(點劃清界線?)惟有小心啲,工作環境就工作。(工作以外?)我依家好自閉,成日匿喺屋企。」

朋友支持:冇佢哋好難行

Sisley表示幸得一班閨蜜如張曦雯、賴慰玲、陳瀅及孫慧雪等對自己關懷備至,直言若失去朋友支持就會舉步維艱:「大家好似覺得我身邊淨係得男仔朋友!我同女仔都玩到好癲,好似張曦雯、賴慰玲、陳瀅同孫慧雪等等,我冇咗呢班朋友就好難行!」她笑言平日相當依賴朋友,還逐一點評身邊閨蜜的不同「功能」:「我哋好似家人咁,例如張曦雯成日見我食無定時,會逼我食咗嘢先准去返工;我無啦啦同賴慰玲講身體邊度好痛,佢就會好緊張咁傳啲身體檢查網址畀我;阿雪就傻更更,我哋會互呻去分享,陳瀅就負責同我去玩!」

講到劇接劇機會不絕,Sisley透露於無綫劇《踩過界》與王浩信有段轟烈戀情,自言現實中亦熱愛浪漫,更奉行不婚主義:「有一場講我同王浩信畀人活埋,佢哋真係挖咗個泥洞去攞啲泥嚟填我哋!咁轟烈嘅感情我覺得好正,可以同我鍾意嘅人被活埋好浪漫呀!(若有人好鋪張咁向你求婚,你會接受?)未必,我唔結婚都冇乜嘢。(不婚主義?)我不嬲都係咁諗,覺得兩個人如果鍾意大家,結唔結婚都冇所謂。一紙婚書當然有意義,但唔係話要強求嘅嘢。反而小朋友我就好想要,因為我好鍾意動物同小朋友,好鍾意照顧佢哋,所以你問我結婚定揀小朋友,我會揀小朋友多過結婚。(做未婚媽媽?)冇諗呀,第日一係生BB或者領養。」

期待與麥秋成關係昇華

講到「萬年」緋聞男朋友麥秋成,Sisley堅稱與對方只是好友,但透露嚮往由朋友昇華戀人的感情:「我同佢喺聖誕派對相識,於是跟佢學跳舞。(傳緋聞後仲敢跟佢學跳舞?)夠膽!佢咁大間學校都唔係得佢一個老師,跳舞係自我增值。(點解一定去佢呢間?)有贊助囉!(成日傳你哋拍拖,到底有冇諗過發展?)我依家專心事業。(由朋友昇華戀人?)絕對得,好朋友先可以做到戀人,如果戀人係好朋友會更加美麗,普通戀人淨係拍拖同食飯會好悶,但我可以同你無所不談,覺得呢件事係更加正嘅戀情。」

後記:日漸「圓」美

蔡思貝出道以來一直被指口直心快,得罪人亦不自知,惟今次見面後發現她的確有所進步,說話更為謹慎及圓滑,想必是她一路在負評當中打滾而修成的正果!堅持自我是一件美事,但從批評聲音中學習及消化亦是必須的,祝福這位長跑好手在演藝路上不忘學習,且「跑」且珍惜!

場地:香港九龍東皇冠假日酒店


來源 source: http://hk.on.cc
鍾意就快D Share啦!
Related Posts Plugin for WordPress, Blogger...